বীৰ লাচিত সেনাৰ প্ৰশাসনিক সচিব শৃংখল চলিহাক শুকুৰবাৰে পুৱাই চেপনৰ পৰা আৰক্ষীয়ে আটক কৰে। ১২ ঘণ্টীয়া দুলীয়াজান বন্ধৰ কাৰ্যসূচী ৰূপায়ন কৰিবলৈ যোৱাৰ সময়তে চেপনত আৰক্ষীয়ে আটক কৰে শৃংখল চলিহাক। আৰক্ষীয়ে লগতে সংগঠনটোৰ সাংগঠনিক সম্পাদক হৰ কুমাৰ গগৈকো আটক কৰিছে।
আৰক্ষীয়ে সংগঠনটোৰ ৫০ জনৰো অধিক সদস্যৰ সৈতে দুয়োকে কটকটীয়া নিৰাপত্তাৰ ব্যৱস্থাৰ মাজেৰে জিম্মাত লয়।
উল্লেখ্য যে বীৰ লাচিত সেনাক বন্ধ প্ৰত্যাহাৰ কৰিবলৈ দুলীয়াজান আৰক্ষীৰ তৰফৰ পৰা শৃংখল চলিহালৈ এক জাননী প্ৰেৰণ কৰিছিল। দুলীয়াজান আৰক্ষীয়ে জাননীৰ জৰিয়তে বন্ধ কাৰ্যসূচী প্ৰত্যাহাৰ কৰি শান্তি বজাই ৰখাত সহযোগিতা কৰিবলৈ আহ্বান জনাইছিল। অন্যথা আইনী ব্যৱস্থা গ্ৰহণ কৰাৰ কথাও উল্লেখ কৰিছিল।
জানিব পৰা মতে শৃংখল চলিহাৰ নেতৃত্বত দলটোৱে তনু শ্বাহীক গ্ৰেপ্তাৰ কৰাৰ দাবীৰে প্ৰতিবাদত যোগদান কৰিবলৈ দুলীয়াজানলৈ গৈছিল। চলিহাক অধিক সোধা-পোছাৰ বাবে ডিব্ৰুগড়ৰ আৰক্ষী অধীক্ষকৰ কাৰ্যালয়লৈ লৈ যোৱাৰ বিপৰীতে বাকীসকলক মৰাণ থানাত ৰখা হৈছে।
ইপিনে, দুলীয়াজানতো আৰক্ষীয়ে গুৰুত্বপূৰ্ণ আঞ্চলিক নেতাকে ধৰি কমেও ১৫ জন প্ৰতিবাদকাৰীক আটক কৰি ডিব্ৰুগড় থানালৈ নিয়া বুলি জানিব পৰা গৈছে।
আটক কৰাসকলৰ ভিতৰত আছে অসমীয়া মহিলা মঞ্চৰ সভাপতি মিনাক্ষী গগৈ আৰু সংগঠনটোৰ সম্পাদক ৰানু তামুলীও। সদৌ অসম চাহ জনজাতি ছাত্ৰ সন্থাৰ বৰডুবি শাখাৰ সভাপতি জ্যোতিষ্মান হাজৰিকাকো জিম্মাত লোৱা হৈছে।
