চৰকাৰী বাছৰ পৰা ‘মণিপুৰ’ৰ নাম আঁতৰোৱাৰ অভিযোগ উত্থাপন কৰি ৰাজ্যপালক স্মাৰক পত্ৰ দাখিল কৰিবলৈ সময়তে আহত হয় ৭ গৰাকী মহিলা। খবৰ অনুসৰি আৰক্ষীৰ বাধাৰ সন্মুখীন হৈ একাংশ লোকে প্ৰতিবাদ আৰম্ভ কৰে। তাৰ পিছতে আৰক্ষীৰ সৈতে সংঘাত হয়। আৰক্ষীৰ দ্বাৰা নিক্ষেপ কৰা কন্দুৱা গেছ আৰু ৰবৰৰ গুলীত কেইবাজনো প্ৰতিবাদকাৰী আহত হোৱাৰ খবৰ পোৱা গৈছে।
জানিব পৰা মতে, যোৱা ২০ মে’ত মণিপুৰৰ চৰকাৰী বাছৰ পৰা ‘মণিপুৰ’ শব্দটো আঁতৰোৱাৰ বিৰোধিতা কৰি মণিপুৰৰ অখণ্ডতা সমন্বয় সমিতিয়ে (COCOMI ) প্ৰতিবাদৰ আহ্বান জনাইছিল।
দেওবাৰে সমিতিৰ সদস্যসকলে ৰাজ্যপালক সাক্ষাৎ কৰি স্মাৰক পত্ৰ দাখিল কৰাৰ কথা আছিল। কিন্তু ৰাজভৱন চৌহদত উপস্থিত হোৱাৰ লগে লগে আৰক্ষীয়ে তেওঁলোকক বাধা দিয়ে বুলি অভিযোগ উঠিছে। তাৰ পিছতে খণ্ডযুদ্ধ আৰম্ভ হয় ।
যোৱা ২০ মে’ৰ পৰাই এই ঘটনা আৰম্ভ হৈছিল। সেইদিনা কেইজনমান সাংবাদিক উদ্বোধনী অনুষ্ঠানলৈ গৈছিল। সকলোৱে এখন চৰকাৰী বাছত সভাস্থলীলৈ গৈ আছিল। হঠাৎ একাংশ নিৰাপত্তাৰক্ষীয়ে সাংবাদিক কঢ়িওৱা বাছখন যোৱাত বাধা দিয়ে। বাছখনৰ পৰা মণিপুৰ নামটো আঁতৰাবলৈ কোৱা হৈছিল।
ইয়াৰ প্ৰতিবাদত দ্য অল মণিপুৰ জাৰ্নেলিষ্ট ইউনিয়ন আৰু এডিটৰ গিল্ড মণিপুৰৰ হৈ ৰাজ্যপাললৈ এখন পত্ৰ প্ৰেৰণ কৰা হয়। ইয়াৰোপৰি চৰকাৰে গঠন কৰিছে দুজনীয়া তদন্ত সমিতিও গঠন কৰিছে। তাৰমাজতে, প্ৰতিবাদ সাব্যস্ত কৰিবলৈ গৈ আহত হয় ৭ গৰাকী মহিলা প্ৰতিবাদকাৰী।
