মধ্যপ্ৰদেশৰ ইন্দোৰৰ বাসিন্দা ৰাজা ৰঘুবংশী আৰু তেওঁৰ পত্নী সোণম যোৱা ২৩ মে’ৰ পৰা সন্ধানহীন হৈ আছিল। নৱবিবাহিত দম্পতীহালে মধুচন্দ্ৰিকাৰ বাবে মেঘালয়লৈ আহিছিল। ইয়াৰ পিছত ২৩ মে’ৰ পৰা তেওঁলোকক পৰিয়ালে বিচাৰি পোৱা নাই।
এজাহাৰ পোৱাৰ পিছতে প্ৰশাসনে অনুসন্ধান আৰম্ভ কৰে। সোমবাৰে (২ জুন) মেঘালয়ত ৰাজাৰ মৃতদেহ উৱলি যোৱা অৱস্থাত উদ্ধাৰ হোৱা বুলি জানিব পৰা গৈছে। খবৰ অনুসৰি মেঘালয়ৰ চোহৰা অঞ্চলত মৃতদেহটো উদ্ধাৰ কৰা হৈছে। অৱশ্যে ৰাজাৰ পত্নী সোণমৰ সন্ধান এতিয়াও অব্যাহত আছে।
চেৰাপুঞ্জী নামেৰেও পৰিচিত মেঘালয়ৰ পূব খাছী পাহাৰৰ চোহৰা অঞ্চলৰ পৰা সন্ধীনহীন হৈছিল ৰাজা ৰঘুবংশী আৰু তেওঁৰ পত্নী।
মধ্যপ্ৰদেশৰ ইন্দোৰৰ উপ-আয়ুক্ত ৰাজেশ কুমাৰ ত্ৰিপাঠীয়ে কয়, “সোমবাৰে মেঘালয় আৰক্ষীয়ে এটা মৃতদেহ উদ্ধাৰ কৰে, যিটো মৃতদেহ ৰাজা ৰঘুবংশীৰ বুলি তেওঁৰ ভাতৃ বিপিন ৰঘুবংশীয়ে চিনাক্ত কৰে। মৃত্যুৰ সময় আৰু অন্যান্য সবিশেষ মৰণোত্তৰ পৰীক্ষাৰ প্ৰতিবেদনৰ পিছত জানিব পৰা যাব। আৰক্ষীয়ে এতিয়াও সোণম ৰঘুবংশী সম্পৰ্কে কোনো সূত্ৰ পোৱা নাই।”
ক’ত আছে ৰাজৰ পত্নী সোণম? কি হৈছিল তেওঁলোকৰ?’ এই প্ৰশ্নৰ উত্তৰ এতিয়াও পোৱা হোৱা নাই। অৱশ্যে প্ৰশাসনে সোণমৰ সন্ধান অব্যাহত ৰাখিছে।
ৰাজাৰ ভাতৃ শচীনে দাবী কৰিছে যে দম্পতীহালক সম্ভৱতঃ অপহৰণ কৰা হৈছিল। পৰিয়ালৰ লোকে সোণমক বিচাৰি সেনা মোতায়েন কৰিবলৈ দাবী জনাইছে। পৰিয়ালৰ লোকে আশংকা কৰিছে যে তাত থকা স্থানীয় হোটেলৰ কৰ্মচাৰীসকলো এই ঘটনাৰ সৈতে জড়িত হ’ব পাৰে।
সকলো দিশ চালিজাৰি চোৱাৰ পিছতো এই ভয়ানক মৃত্যুক লৈ প্ৰশ্ন উত্থাপন হৈয়েই আছে। ইফালে সোণমক বিচাৰি হাবাথুৰি খাইছে প্ৰশাসন। তেওঁলোকৰ সৈতে কি ঘটিছে তাক লৈ উদ্বেগ বাঢ়িছে।
