কেন্দ্ৰই বিভিন্ন দেশলৈ সৰ্বদলীয় প্ৰতিনিধি দল প্ৰেৰণ কৰি পাক পৃষ্ঠপোষকতাত পেহেলগামত সংঘটিত সন্ত্ৰাসবাদী আক্ৰমণ আৰু তাৰ পিছত অপাৰেচন সিন্দুৰৰ বিষয়ে বাৰ্তা প্ৰেৰণ কৰিছে। ডি এম কেৰ সাংসদ কানিমোঝি কৰুণানিধিয়ে স্পেইনত এই প্ৰতিনিধি দলৰ নেতৃত্ব দিছে। তাতেই তেওঁক সোধা হৈছিল, ভাৰতৰ জাতীয় ভাষা কি? ডি এম কেৰ সাংসদ কানিমোঝি কৰুণানিধিয়ে দিয়ে এক স্তম্ভিত কৰি তোলা উত্তৰ।
কি উত্তৰ দিলে এইগৰাকী ডি এম কে সাংসদে? কানিমোঝিয়ে কয়, “ভাৰতৰ জাতীয় ভাষা হৈছে ঐক্য আৰু বৈচিত্ৰ্য। এই প্ৰতিনিধি দলটোৱে সেই বাৰ্তা বিশ্ববাসীক দিবলৈ আহিছে। আজিৰ সময়ত এইটোৱেই আটাইতকৈ গুৰুত্বপূৰ্ণ কথা।” অৰ্থাৎ কামিমোঝিয়ে বৈচিত্ৰ্যৰ মাজত ঐক্যৰ বিষয়টো তুলি ধৰে।
উল্লেখ্য যে ৰাষ্ট্ৰীয় শিক্ষা নীতি (এন ই পি) ২০২০ত প্ৰস্তাৱিত তিনি ভাষাৰ সূত্ৰৰ কেন্দ্ৰীয় সিদ্ধান্তৰ বিৰুদ্ধে ডি এম কে প্ৰতিবাদত সৰৱ।
স্পেইনত ভাৰতৰ প্ৰতিনিধি দল নেতৃত্ব দিছে কানিমোঝিয়ে। অপাৰেচন সিন্দুৰ আৰু পেহেলগাম সন্ত্ৰাসবাদী আক্ৰমণৰ পিছত ভাৰতৰ কূটনৈতিক প্ৰচাৰ কাৰ্যসূচীৰ দায়িত্ব দিয়া সাতটা প্ৰতিনিধি দলৰ ভিতৰত এটাৰ নেতৃত্ব দি আছে ডি এম কেৰ সাংসদ কনিমোঝি কৰুণানিধিয়ে।
কানিমোঝিৰ উপৰিও প্ৰতিনিধি দলটোত আছে সমাজবাদী পাৰ্টিৰ ৰাজীৱ কুমাৰ ৰায়, বিজেপিৰ বৃজেশ চৌত্তা, আৰজেডিৰ প্ৰেম চান্দ গুপ্তা, আপৰ অশোক মিট্টাল আৰু ইউৰোপীয় ইউনিয়ন আৰু নেপালত ভাৰতৰ প্ৰাক্তন ৰাষ্ট্ৰদূত মঞ্জীৱ সিং পুৰী।
পাঁচখন দেশৰ ভ্ৰমণৰ অন্তিম পৰ্যায়ত শনিবাৰে স্পেইনত উপস্থিত হয় প্ৰতিনিধি দলটোৱে। এই ভ্ৰমণৰ সময়ত দলটোৱে সন্ত্ৰাসবাদৰ বিৰুদ্ধে শূন্য সহনশীলতা নীতি সন্দৰ্ভত ভাৰতৰ স্থিতি স্পেইন চৰকাৰৰ সদস্য আৰু নাগৰিক সমাজৰ প্ৰতিনিধিৰ আগত দাঙি ধৰে।
