ৰাজহ চোৰাংচোৱা সঞ্চালকালয়ে(ডিআৰআই) চোৰাং মেথামফেটামাইন টেবলেটৰ বিশাল চালান সৰবৰাহৰ চেষ্টা বিফল কৰে। ডিআৰআইয়ে ৩ জুন, ২০২৫ত আইজলৰ সমীপৰ আইজল-চাম্ফাই পথত এখন বাহন জব্দ কৰে।
সৰবৰাহকাৰীয়ে পিছফালৰ আসনৰ তলত আৰু ইন্ধনৰ টেংকীত বিশেষভাৱে নিৰ্মিত কোঠাত চতুৰালিৰে গুলপীয়া/কমলা ৰঙৰ টেবলেট থকা ১৬টা ইটাৰ আকাৰৰ টোপোলা লুকুৱাই হৈছিল। তালাচীৰ সময়ত উদ্ধাৰ হোৱা টেবলেটবোৰ মেথামফেটামাইন নামৰ নিষিদ্ধ ড্ৰাগছ বুলি ধৰা পৰে। আন্তঃৰাষ্ট্ৰীয় অবৈধ ড্ৰাগছৰ বজাৰত ১৬ কোটি টকাৰ মূল্যৰ ১৬ কিলোগ্ৰাম ওজনৰ নিষিদ্ধ ড্ৰাগছ বাহনখনৰ সৈতে জব্দ কৰা হৈছে আৰু চালক আৰু তেওঁৰ সহযোগীক নাৰ্কটিক ড্ৰাগছ এণ্ড চাইকোট্ৰপিক ছাবষ্টেন্স (এনডিপিএছ) এক্ট, ১৯৮৫ৰ অধীনত গ্ৰেপ্তাৰ কৰা হৈছে।
প্ৰাথমিক তদন্তত এই নিষিদ্ধ ড্ৰাগছ ম্যানমাৰৰ পৰা সৰবৰাহ কৰা বুলি জানিব পৰা গৈছে। পৰৱৰ্তী সময়ত ডিআৰআইৰ বিষয়াসকলে ৪ জুনৰ পুৱা আটকাধীন ব্যক্তিদ্বয়ক আদালতত হাজিৰ কৰে। সেইসময়তে গ্ৰেপ্তাৰ হোৱা এজন ব্যক্তিয়ে বিষয়াসকলক আক্ৰমণ কৰি জিম্মাৰ পৰা পলায়ন কৰে।
পৰৱৰ্তী সময়ত ডিআৰআইয়ে স্থানীয় আৰক্ষী আৰু জনগোষ্ঠীৰ সহায়ত ক্ষিপ্ৰতাৰে অভিযান চলাই অভিযুক্ত ব্যক্তিজনক আইজলৰ বাহিৰৰ টলাংনুৱামৰ হৃদৈকাউনত গ্ৰেপ্তাৰ কৰে। এসপ্তাহ নৌহওঁতেই মিজোৰামত ডিআৰআইৰ দ্বাৰা মেথামফেটামাইন টেবলেটৰ বৃহৎ চালান জব্দ কৰা এইটো দ্বিতীয়টো ঘটনা। ইয়াৰ পূৰ্বে ৩০ মে’ত ৯.৭২ কেজি মেথামফেটামাইন টেবলেট জব্দ কৰাৰ লগতে চেলিঙত এজন লোকক গ্ৰেপ্তাৰ কৰিছিল।
এনডিপিএছ আইনৰ অধীনত অপৰাধীক ১০ বছৰ পৰ্যন্ত কঠোৰ কাৰাদণ্ডকে ধৰি কঠোৰ শাস্তি বিহা হৈছে।
