বৃহস্পতিবাৰে পুৱা গুৱাহাটীৰ চুপাৰ মাৰ্কেট অঞ্চলৰ এটা লজৰ সমীপত ৰহস্যজনক পৰিস্থিতিত এজন লোকৰ মৃতদেহ উদ্ধাৰ হোৱাত চাঞ্চল্যৰ সৃষ্টি হয়। ইতিমধ্যে আৰক্ষীয়ে তদন্তত নামিছে।
গুৱাহাটী নিউৰ’লজিকেল ৰিচাৰ্চ চেণ্টাৰ (জিএনআৰচি)ৰ সমীপত অৱস্থিত বিভাছ লজৰ সমীপত উদ্ধাৰ হয় মৃতদেহটো।
মৃত ব্যক্তিজনৰ পৰিচয় জানিব পৰা হোৱা নাই যদিও প্ৰাথমিক তথ্য অনুসৰি তেওঁ পত্নীৰ চিকিৎসাৰ বাবে গুৱাহাটীত উপস্থিত হৈছিল আৰু লজটোত থাকিবলৈ লৈছিল।
সূত্ৰসমূহৰ পৰা জানিব পৰা মতে, লোকজনে পুৱাই লজৰ পৰা ওলাই আহিছিল আৰু তাৰ পিছতে পথৰ কাষত তেওঁৰ মৃতদেহ উদ্ধাৰ হয়। ঘটনাৰ সময়ত তেওঁৰ পত্নী আৰু মাতৃ লজটোৰ ৪ নং কোঠাত থকা বুলি জানিব পৰা গৈছে।
খবৰ পোৱাৰ লগে লগে স্থানীয় আৰক্ষীয়ে সেই স্থানত উপস্থিত হয় আৰু লোকজনৰ মৃত্যুৰ ঘটনাৰ তদন্ত আৰম্ভ কৰিছে। তদন্তকাৰী আৰক্ষীয়ে সম্ভাৱ্য সকলো দিশ চালিজাৰি চাই আছে।
