পেহেলগামত সংঘটিত সন্ত্ৰাসবাদী আক্ৰমণৰ প্ৰায় দুমাহ পাৰ হৈ গ’ল। এতিয়া জম্মু-কাশ্মীৰৰ চিত্ৰময় সৌন্দৰ্য্য চাবলৈ আকৈ সোঁত বৈছে পৰ্যটকৰ।
যোৱা ২২ এপ্ৰিলত বৈসাৰণ উপত্যকাত সংঘটিত ভয়ানক সন্ত্ৰাসবাদী আক্ৰমণত ২৫ জন পৰ্যটক আৰু স্থানীয় যুৱক এজনৰ কৰুণ মৃত্যু হৈছিল। ইয়াৰ পিছত সেই স্থানলৈ পৰ্যটকৰ আগমন প্ৰায় বন্ধ হৈ গৈছিল। কিন্তু চৰকাৰৰ সময়োপযোগী পদক্ষেপ আৰু নিৰাপত্তাৰ ব্যৱস্থাৰ উন্নতিৰ বাবে পেহেলগাম ক্ৰমান্বয়ে স্বাভাৱিক অৱস্থালৈ ঘূৰি আহিছে।
শেহতীয়াকৈ মধ্যপ্ৰদেশৰ এদল পৰ্যটকৰ দলে পেহেলগাম ভ্ৰমণ কৰি নিজৰ অভিজ্ঞতা ব্যক্ত কৰে। তেওঁলোকে কয়, “এইখন এখন ধুনীয়া আৰু আচৰিত ঠাই। ইয়াত আমাৰ তাৰ দৰে অসহ্য গৰম নাই। বতৰ বৰ সুখদায়ক। তাত পৰিস্থিতি এতিয়া সম্পূৰ্ণ স্বাভাৱিক। চাৰিওফালে পৰ্যাপ্ত নিৰাপত্তাৰ ব্যৱস্থা আছে। উপত্যকাটোৰ ক’তো আমি নিৰাপত্তাহীনতাত ভুগিবলগীয়া হোৱা নাই।” তেওঁলোকৰ এই বক্তব্যই স্পষ্টকৈ দেখুৱাইছে যে পৰ্যটকৰ মাজত আত্মবিশ্বাস ঘূৰি আহিবলৈ আৰম্ভ কৰিছে।
২২ এপ্ৰিলৰ আক্ৰমণৰ পিছত বন্ধ হৈ থকা কিছু পৰ্যটনস্থলী জম্মু-কাশ্মীৰ চৰকাৰে মুকলি কৰাৰ পিছতে পৰ্যটকৰ আগমন বৃদ্ধি পাবলৈ আৰম্ভ কৰিছে। পেহেলগামৰ শ্বাহী ৰেষ্টুৰেণ্টৰ স্বত্বাধিকাৰী হিলাল আহমেদে সন্তুষ্টি প্ৰকাশ কৰি কয় যে, “২২ এপ্ৰিলৰ পিছত প্ৰথমবাৰৰ বাবে পহলগাঁৱত ১৫ জুনত পৰ্যটকৰ ভিৰ দেখা গৈছে। দেশৰ বিভিন্ন প্ৰান্তৰ পৰা বহু পৰ্যটকৰ বাহন ইয়ালৈ আহিছে।”
উল্লেখ্য যে জম্মু-কাশ্মীৰত কমেও আঠটা গুৰুত্বপূৰ্ণ পৰ্যটনস্থলী মুকলি কৰাৰ সিদ্ধান্ত লৈছে চৰকাৰে। পৰ্যটকলৈ নিৰাপত্তাৰ বাৰ্তা প্ৰেৰণ কৰা হৈছে। ভেৰিনাগ গাৰ্ডেন, কোকেৰনাগ গাৰ্ডেন, আচাবাল গাৰ্ডেন, বদমৱাৰী পাৰ্ক, ডাক পাৰ্ক, টাকদীৰ পাৰ্ককে পেহেলগাম বজাৰৰ বেটাব উপত্যকা আৰু উদ্যানসমূহ পুনৰ মুকলি কৰাৰ কথা ঘোষণা কৰিছে লেফটেনেণ্ট গৱৰ্ণৰ মনোজ সিনহাই। এই পদক্ষেপসমূহে পৰ্যটকসকলক অধিক আগ্ৰহী কৰি তুলিছে।
পেহেলগামৰ হোটেল ব্যৱসায়ী সন্থাৰ সভাপতি জাভেদ বুৰ্জাই হোটেল বুকিং বৃদ্ধি পোৱাত সন্তুষ্টি প্ৰকাশ কৰে। তেওঁ কয়, ‘শূন্য শতাংশ বুকিংৰ পৰা পেহেলগামৰ হোটেলসমূহৰ বুকিং এতিয়া ১৫-২০ শতাংশ বৃদ্ধি পাইছে। পৰ্যটকৰ আগমনৰ সংখ্যা আৰু বৃদ্ধি হোৱাৰ আশা কৰি আছো।” তেওঁৰ এই বক্তব্যই স্থানীয় পৰ্যটন উদ্যোগৰ সৈতে জড়িত সকলোৰে মুখত হাঁহি বিৰিঙাইছে।
