“এন আৰ চিৰ চূড়ান্ত খচৰা ওলাবৰ দিনা এটা আতংকময় পৰিস্থিতি হ’ব বুলি চৰকাৰ-প্ৰশাসনে ভাবিয়েই লৈছে। তাৰ বাবে তেওঁলোকে মকড্ৰিল পৰ্য্যন্ত আৰম্ভ কৰিছে। ইয়ে প্ৰমাণ কৰে যে এন আৰ চিত খেলিমেলি হৈছে। ” -এই তাৎপৰ্য্যপূৰ্ণ মন্তব্য প্ৰক্তন মুখ্য মন্ত্ৰী তৰুণ গগৈৰ।
গগৈয়ে লগতে এই বিষয়টোক লৈ প্ৰধান মন্ত্ৰী আৰু গৃহ মন্ত্ৰীলৈ পত্ৰ প্ৰেৰণ কৰিব বুলিও ঘোষণা কৰে। আনহাতে বিদেশী প্ৰসংগত প্ৰাক্তন মুখ্য মন্ত্ৰী গৰাকীয়ে কয়, “অসমত ৫০ – ৬০ লাখ বিদেশী নাই। মই চেলেঞ্জ দি ক’ব পাৰো। অলপ থাকিব পাৰে, কিন্তু ইমান নহয়।”
আনহাতে ২০১৪ আৰু ২০১৬ চনৰ ভোটাৰ তালিকাত থকা সকলোৰে নাম এন আৰ চিত অন্তৰ্ভুক্ত হ’ব লাগে বুলি উল্লেখ কৰি গগৈয়ে কয়, “তেওঁলোকৰ ভোটেৰেই সৰ্বানন্দ জিকেছে, মই জিকিছো, সকলো বিধায়ক আৰু সাংসদ জিকিছে।”
উল্লেখযোগ্য যে কেবিনেটত নাগৰিকত্ব সংশোধনী বিধেয়ক সন্দৰ্ভত কোনো সিদ্ধান্ত নোলোৱা বাবে মুখ্য মন্ত্ৰী সোণোৱালক সমালোচনা কৰি গগৈয়ে কয়— “মেঘালয়ৰ কেবিনেটে যদি পাৰে তোমালোকে কিয় নোৱাৰা। অসমৰ সুৰক্ষা সুনিশ্চিত কৰিম বুলি কৈ থাকিলেই ন’হব।”
একেখন সংবাদ মেলতে গগৈয়ে কয়, “মোদীৰ মেজিক এতিয়া লাহে লাহে নোহোৱা হৈ গৈছে। তেওঁলোকৰ বিকাশৰ শ্ল’গান শ্ল’গান হৈয়ে থাকিল। আশ্বাস দিয়া মতে একো কৰিব নোৱাৰিলে। অসমত পঞ্চায়ত নিৰ্বাচনত তেওঁলোকৰ অৱস্থা বেয়া হ’ব। তেওঁলোকে সেইকাৰণে নিৰ্বাচন পাতিব খোজা নাছিল।
আনহাতে অগপৰ দোধোৰ-মোধোৰ স্থিতিতো গগৈয়ে সন্দেহ ব্যক্ত কৰে। তেওঁ কয়, “অগপ যে চৰকাৰৰ পৰা ওলাই আহিব মোৰ সন্দেহ আছে।”
এনআৰচি প্ৰক্ৰিয়াত গভীৰ ষড়যন্ত্ৰৰ সন্দেহ প্ৰকাশ কৰি গগৈয়ে কয় যে চৰকাৰে ৩০ জুনৰ কথা কৈ আছে। আনহাতে যুটীয়া সংসদীয় সমিতিৰ অধ্যক্ষয়ো এন আৰ চিৰ কথা কয়। তেওঁৰ এন আৰ চিৰ লগত কি সম্পৰ্ক আছে।
ইফালে ৰাজ্যৰ উন্নয়নৰ দিশত চৰকাৰৰ ব্যৰ্থতাৰ অভিযোগ তুলি গগৈয়ে কয় যে এই চৰকাৰখনে কেৱল ডেডলাইন আৰু ৱাৰ্নিং দিয়ে। কামৰ নামত একো নকৰে। নমামি ব্ৰহ্মপুত্ৰ আৰু এডভাণ্টেইজ আছাম চব ফ্লপ শ্ব’ত পৰিণত হোৱা ৰাইজে দেখি আছে।
