ৰক্তচাপৰ সমস্যা কেৱল বয়স্কসকলৰ ক্ষেত্ৰতহে হয় বুলি থকা ধাৰণাটো এতিয়া শুদ্ধ নহয়। যুৱক-যুৱতীসকলো এতিয়া ৰক্তচাপৰ তাৰতম্যৰ ফলত অধিক ক্ষতিগ্ৰস্ত হৈছে। ৰাতি টোপনিৰ অভাৱ, অস্বাস্থ্যকৰ খাদ্য গ্ৰহণ, অত্যধিক মদ্যপানৰ বাবে ৰক্তচাপৰ তাৰতম্য হৈছে।
যদি আপোনাৰ হাইপাৰটেনচন বা উচ্চ ৰক্তচাপ থাকে তেন্তে সকলো সময়তে ঔষধ হাতত ৰাখিব লাগিব। মাজে মাজে ৰক্তচাপ জোখাটোও জৰুৰী। কিন্তু যদি আপুনি এনে পৰিস্থিতিত পৰে য’ত আপোনাৰ হাতত কোনো ঔষধ নাই আৰু আপোনাৰ ৰক্তচাপৰ তাৰতম্য ঘটিছে, তেন্তে কি কৰিব?
হঠাতে ৰক্তচাপ বৃদ্ধি হোৱাটো ভাল লক্ষণ নহয়। ইয়াৰ ফলত হাৰ্ট এটেকও হ’ব পাৰে। যদি আপুনি লক্ষ্য কৰে যে আপোনাৰ বুকুখন ধপধপাইছে, আপোনাৰ মূৰ ঘূৰোৱা বা বমি হৈছে, আপুনি চকুৰ সন্মুখত আন্ধাৰ দেখাবলৈ আৰম্ভ কৰিছে, আৰু আপোনাৰ হাত-ভৰিৰ পেশীবোৰ টান হৈছে, তেন্তে আপুনি সাৱধান হোৱাটো প্ৰয়োজন।
যদি আপোনাৰ ৰক্তচাপ উচ্চ হয় তেন্তে ইয়াক হ্ৰাস কৰাৰ উপায় আছে। ঔষধ নাথাকিলেও চিন্তা নকৰিব। সাময়িকভাৱে ৰক্তচাপ নিয়ন্ত্ৰণ কৰি বিপদৰ পৰা হাত সাৰিবলৈ কিছুমান পদ্ধতি জনাটো ভাল।
গভীৰ উশাহ লোৱা
ৰক্তচাপ দ্ৰুতভাৱে নিয়ন্ত্ৰণৰ বাবে শ্বাস-প্ৰশ্বাসৰ ব্যায়ামেই আদৰ্শ। শান্ত হৈ বহি দীঘলকৈ উশাহ লওক। কেইমুহূৰ্তমান উশাহ বন্ধ কৰি ৰাখক আৰু তাৰ পিছত লাহে লাহে এৰি দিয়ক। গোটেই প্ৰক্ৰিয়াটো ১০-২০ ছেকেণ্ডৰ বাবে কৰিব লাগে। ৰক্তচাপ নিয়ন্ত্ৰণত ৰাখিবলৈ একেৰাহে ৩বাৰ কৰক। এই পদ্ধতিয়ে শৰীৰৰ পেৰাচিম্পেথেটিক স্নায়ুতন্ত্ৰ সক্ৰিয় কৰি তোলে। ফলত অত্যধিক উত্তেজনা আৰু অস্থিৰতা কমি যায়। হৃদস্পন্দনও নিয়ন্ত্ৰিত হয়।
ঠাণ্ডা পানীৰ প্ৰয়োগ
অতি উপকাৰী পদ্ধতি। মুখ আৰু ডিঙিত ঠাণ্ডা পানী প্ৰয়োগ কৰিলে শৰীৰৰ উষ্ণতা নিয়ন্ত্ৰণ হয়। ইয়াৰ ফলত ৰক্তবাহী নলীত তেজ জমা হোৱাৰ সম্ভাৱনা কম হয়। চিকিৎসকে কয় যে শৰীৰত অস্বস্তি অনুভৱ কৰাৰ লগে লগে যদি মূৰ, ডিঙি, মুখ আৰু ভৰি ঠাণ্ডা পানীৰে ধুই লয় তেন্তে বিপদ বহু পৰিমাণে কমি যাব।
নেমুৰ পানী
নেমুত প্ৰচুৰ পৰিমাণে পটাছিয়াম থাকে। চেনি আৰু নিমখ মিহলি নকৰাকৈ নেমুৰ পানী খালে ৰক্তচাপ নিয়ন্ত্ৰণত থাকিব। আধা নেমুৰ ৰস এগিলাচ পানীত মিহলাই খালে শৰীৰত থকা পানী আৰু খনিজ পদাৰ্থৰ অভাৱ বহু পৰিমাণে নাইকিয়া হ’ব। নেমুৰ এন্টিঅক্সিডেন্টে শৰীৰক শক্তি প্ৰদান কৰিব।
লাহে লাহে পানী খাব
এগিলাচ পানী লাহে লাহে পান কৰক। যদি আপুনি ধপধপনি, ঘাম ওলোৱা, মূৰ ঘূৰোৱা অনুভৱ কৰে তেন্তে প্ৰথমে স্থিৰ হৈ বহি পানী খাব লাগে। ইয়াৰ ফলত ৰক্ত সঞ্চালন স্বাভাৱিক হ’ব। অৱশ্যে শীতল পানীয় বা চোডা নাখাব। ই হিতে বিপৰীত হ’ব।
তুলসীৰ পাত আৰু নহৰু
নহৰুত এলিচিন নামৰ যৌগ থাকে, যিয়ে ৰক্ত সঞ্চালন স্বাভাৱিক কৰি তেজ জমা হোৱাত বাধা দিয়ে। তুলসীৰ পাতত থকা এন্টিঅক্সিডেন্টে শৰীৰৰ ৰোগ প্ৰতিৰোধ ক্ষমতা বৃদ্ধি কৰে। ইয়াৰ উপৰিও তুলসীৰ প্ৰদাহ নিবাৰণকাৰী গুণো আছে। কেইটামান তুলসীৰ পাত চোবাই খালে বা পানীত তিয়াই খালে শৰীৰৰ প্ৰদাহ অতি সোনকালে কমি যায়।
