বিহাৰৰ ব্যৱসায়ী গোপাল খেমকাৰ হত্যাকাণ্ডৰ ৰহস্য এতিয়াও উন্মোচন হোৱা নাই। তাৰমাজতে বিহাৰত সংঘটিত হৈছে আন এক হত্যাকাণ্ডৰ ঘটনা। দেওবাৰে সন্ধিয়া ৰাজহুৱা স্থানত এজন ব্যক্তিগত বিদ্যালয়ৰ মালিকক গুলীয়াই হত্যা কৰা হয়। বিহাৰৰ পাটনাৰ খগৌল অঞ্চলত সংঘটিত হৈছে এই ঘটনা।
আৰক্ষীৰ সূত্ৰ অনুসৰি দেওবাৰে সন্ধিয়া খগৌলৰ ডি এ ভি স্কুলৰ সন্মুখত অচিনাক্ত দুষ্কৃতিকাৰীয়ে অজিত কুমাৰ নামৰ এজন ব্যক্তিক গুলীয়াই হত্যা কৰে। তেওঁৰ বয়স প্ৰায় ৫০ বছৰ। তেওঁ বিহাৰৰ মুস্তাফাপুৰ অঞ্চলৰ বাসিন্দা।
প্ৰাথমিক তদন্তত প্ৰকাশ পাইছে যে অজিত কুমাৰে পাটনাত এখন বিদ্যালয় চলায়। দেওবাৰে মটৰবাইক চলাই দুষ্কৃতিকাৰীয়ে গুলীচালনা কৰি পলায়ন কৰে। অজিতক কোনে বা কিহৰ বাবে হত্যা কৰিলে সেয়া এতিয়াও জানিব পৰা হোৱা নাই। অজিত হত্যাৰ সঠিক কাৰণক লৈও বিভ্ৰান্তিৰ সৃষ্টি হৈছে।
তথ্য লাভ কৰাৰ পিছতে আৰক্ষীয়ে ততাতয়াকৈ সেই স্থানত উপস্থিত হয়। পাটনা চহৰৰ (পশ্চিম) আৰক্ষী অধীক্ষক ভানু প্ৰতাপ সিঙে জানিবলৈ দিয়া মতে, ফৰেনছিক দলে ঘটনাস্থলীত গৈ প্ৰমাণ সংগ্ৰহ কৰিছে। পাটনা আৰক্ষীয়ে SIT (Special Investigation Team) গঠন কৰি ঘটনাৰ তদন্ত আৰম্ভ কৰিছে। চাৰিওফালৰ অঞ্চলৰ পৰা চিচিটিভিৰ ফুটেজ সংগ্ৰহ কৰি দুষ্কৃতিকাৰীক চিনাক্ত কৰাৰ প্ৰয়াস কৰা হৈছে।
ধাৰাবাহিক হত্যাকাণ্ডৰ পিছত বিহাৰৰ আইন-শৃংখলা পৰিস্থিতিক লৈ প্ৰশ্ন উত্থাপন হৈছে। সন্মুখত বিধানসভা নিৰ্বাচন। ইয়াৰ পূৰ্বে নীতিশ কুমাৰৰ চৰকাৰে এনে ঘটনাত বাবে সমালোচনাৰ সন্মুখীন হৈ আহিছে।
বিৰোধীৰ অভিযোগ যে ৰাজ্যখনৰ ওপৰত নীতিশৰ কোনো নিয়ন্ত্ৰণ নাই। উল্লেখ্য যে ব্যৱসায়ী গোপাল খেমকাৰ হত্যাকাণ্ডৰ প্ৰসংগত কংগ্ৰেছ নেতা ৰাহুল গান্ধীয়ে বিহাৰক দেশৰ ‘অপৰাধৰ ৰাজধানী’ বুলি অভিহিত কৰে। তাৰমাজতে পুনৰ আন এক হত্যাকাণ্ডই স্বাভাৱিকতে চৰকাৰৰ অস্বস্তি বৃদ্ধি কৰিছে।
