দেশৰ শ্ৰমিক সংগঠনসমূহে ৯ জুলাইত আহ্বান কৰা দেশজোৰা সৰ্বাত্মক ধৰ্মঘটলৈ ভাৰতৰ গণতান্ত্ৰিক যুৱ ফেডাৰেছন (ডি ৱাই এফ আই)ৰ অসম ৰাজ্যিক কমিটিয়ে পূৰ্ণ সমৰ্থন আগবঢ়াইছে আৰু ধৰ্মঘট সফল কৰি তুলিবলৈ সকলো অংশৰ ৰাইজলৈ আহ্বান জনাইছে। শ্ৰম সংহিতা বাতিল কৰা, কামৰ সময় নিশ্চিত কৰা, ন্যুনতম মজুৰি নিশ্চিত কৰা,সামাজিক সুৰক্ষা নিশ্চিত কৰা, মাটি-সম্পত্তি আৰু প্ৰকৃতিৰ ওপৰত কৰ্পৰেট লুণ্ঠন বন্ধ কৰা, দেশৰ বেংক-বীমাসহ ৰাজহুৱা খণ্ডৰ উদ্যোগসমূহ ব্যক্তিগত খণ্ডক গতাই দিয়াৰ সৰযন্ত্ৰ বন্ধ কৰা, নতুন পদ সৃষ্টিৰ লগতে সকলো খালী পদ পৰ্যায়ক্ৰমে পূৰণ কৰাৰ দাবীত এই ধৰ্মঘট আহ্বান কৰা হৈছে।
ডি ৱাই এফ আইয়ে উদ্বেগ প্ৰকাশ কৰিছে যে বিজেপি নেতৃত্বাধীন কেন্দ্ৰীয় আৰু ৰাজ্য চৰকাৰে দ্ৰুত হাৰত ৰাজহুৱা সম্পদ বিক্ৰী আৰম্ভ কৰিছে। ইয়াৰ ফলত কৰ্মসংস্থানৰ লগতে অৰ্থনৈতিক ক্ষেত্ৰত গুৰুতৰ প্ৰভাৱ পৰিছে। শ্ৰম সংহিতাৰ নামত শ্ৰমিকৰ অধিকাৰ ওপৰত প্ৰচণ্ড আঘাত নমাই অনা হৈছে। কামৰ সময় ৮ ঘণ্টাৰ সলনি ১২/১৪ ঘণ্টা কৰিব বিচৰা হৈছে।
নতুন সুৰক্ষামূলক আইন আনি পৰিবহন শ্ৰমিকসকলৰ ওপৰত ডাঙৰ আক্ৰমণ আনিব বিচাৰিছে। দেশৰ বেছি সংখ্যক শ্ৰমিকক অতি কম মজুৰত কাম কৰিবলৈ বাধ্য কৰোৱা হৈছে। কাম কৰাৰ সময়ত পাবলগীয়া সামাজিক সুৰক্ষাকে ধৰি কোনো নিৰাপত্তাৰ ব্যৱস্থা নোহোৱা কৰি দিয়া হৈছে। এগৰাকী চাহ শ্ৰমিকে আজিৰ দিনত ব্ৰহ্মপুত্ৰ উপত্যকাত মাত্ৰ ২৫০ টকা আৰু বৰাক উপত্যকাত মাত্ৰ ২২৮ টকা দৈনিক মজুৰিত কাম কৰিবলগীয়া হৈছে। দেশৰ নিবনুৱা সমস্যাই ভয়াবহ ৰূপ লৈছে।
নতুন কৰ্মসংস্থান সৃষ্টিৰ সলনি বিজেপি নেতৃত্বাধীন চৰকাৰখনে কৰ্মসংকোচনৰ নীতিহে দ্ৰুততাৰে কাৰ্যকৰী কৰিছে। এই পৰিস্থিতিতেই কেন্দ্ৰীয় ট্ৰেড ইউনিয়নসমূহে সাধাৰণ ধৰ্মঘটৰ আহ্বান জনাইছে।
ডি ৱাই এফ আইয়ে এই ধৰ্মঘটলৈ পূৰ্ণ সমৰ্থন জ্ঞাপন কৰাৰ লগতে ধৰ্মঘট সফল কৰি তুলিবলৈ সকলো অংশৰ ৰাইজলৈ আহ্বান জনাইছে।
