জেলিপি-চিঙৰা খোৱাটো অভ্যাসত পৰিণত হৈছে নেকি? এই সকলোবোৰ খাদ্য চিগাৰেটৰ দৰেই ক্ষতিকাৰক! গতিকে ধঁপাতজাতীয় সামগ্ৰীৰ দৰেই জেলিপি-চিঙৰাৰ ওপৰতো সতৰ্কবাণী জাৰি কৰা হ’ব। স্বাস্থ্য মন্ত্ৰালয়ে গ্ৰহণ কৰিছে এক সিদ্ধান্ত।
আনুষ্ঠানিকভাৱে নিৰ্দেশ দিয়া হৈছে যে এতিয়াৰ পৰা নাগপুৰ এইমছকে ধৰি কেন্দ্ৰীয় চৰকাৰৰ সকলো প্ৰতিষ্ঠানে দৈনন্দিন ‘জলপান’ৰ সন্দৰ্ভত সতৰ্কবাণী থকা বৰ্ড ওলোমাই দিব লাগিব। ইয়াত স্পষ্টকৈ উল্লেখ কৰা হ’ব যে প্ৰতিটো খাদ্যত কিমান পৰিমাণৰ চেনি বা তেল থাকে। চিঙৰা, জেলিপি, বৰা পাও, লাড্ডু, শীতল পানীয়, জাম-জুচ আদি সকলো খাদ্য এই তালিকাত থাকিব।
চিগাৰেট আৰু অন্যান্য ধঁপাতজাতীয় সামগ্ৰীৰ স্বাস্থ্যজনিত বিপদৰ বিষয়ে স্পষ্টকৈ উল্লেখ কৰাৰ দীৰ্ঘদিন ধৰি নিয়ম চলি আহিছে। এইবাৰ চিঙৰা আৰু জেলিপিকো একেখন তালিকাত অন্তৰ্ভুক্ত কৰা হৈছে। অৱশ্যে কোনো ধৰণৰ নিষেধাজ্ঞা আৰোপ কৰা হোৱা নাই।
মন্ত্ৰালয়ৰ মতে, দৈনন্দিন খাদ্যৰ ক্ষতিকাৰক দিশসমূহ সন্মুখলৈ অনাৰ বাবে এই পদক্ষেপ। সাধাৰণতে এনে খাদ্য পোৱা ঠাইত উজ্জ্বল হালধীয়া-নীলা ৰঙৰ বৰ্ড লগোৱা হ’ব। বৰ্ডবোৰত প্ৰতিটো খাদ্যবস্তুৰ নাম আৰু ছবিৰ লগতে প্ৰত্যেকটোত কিমান চামুচ তেল, ঘিউ, মাখন আদি আৰু চেনি (চৰ্বি) আছে, সেয়া লিখা থাকিব।
সেইবোৰে ইয়াৰ ক্ষতিকাৰক দিশৰ বিষয়ে সকলোকে সচেতন কৰি তুলিব। ফলত স্বাস্থ্য মন্ত্ৰালয়ৰ মতে স্বাস্থ্যসন্মত খাদ্যৰ প্ৰতি জনসাধাৰণৰ প্ৰৱণতা বৃদ্ধি পাব। এই অভিযান প্ৰথমে নাগপুৰ এইমছৰ পৰা আৰম্ভ হৈছে।
জনস্বাস্থ্যৰ ওপৰত কাম কৰা বিশেষজ্ঞসকলৰ মতে ধঁপাতজাতীয় সামগ্ৰীৰ দৰে অত্যধিক তেল আৰু চেনি থকা খাদ্য এই মুহূৰ্তত অতি বিপদজনক। এফালে ডায়েবেটিছ বাঢ়িছে, আনফালে হৃদৰোগ, উচ্চ ৰক্তচাপৰ দৰে সমস্যাৰো উত্থান ঘটিছে। মেদবহুলতা (ওবেচিটি) নীৰৱে নিয়ন্ত্ৰণৰ বাহিৰলৈ গৈছে। বৰ্তমান ভাৰত বিশ্বৰ মধুমেহ ৰোগৰ ৰাজধানী।
বিশ্ব স্বাস্থ্য সংস্থাই দাবী কৰিছে যে ভাৰতত ৭.৭ কোটি লোক টাইপ ২ ডায়েবেটিছত আক্ৰান্ত। আন ২.৫ কোটি লোক প্ৰি-ডায়েবেটিছ, অৰ্থাৎ তেওঁলোকৰ ডায়েবেটিছ হোৱাৰ উপক্ৰম হৈছে। দেশৰ ৫০ শতাংশ জনসাধাৰণে নাজানে তেওঁলোকৰ তেজতচেনিৰ মাত্ৰা কিমান।
তদুপৰি বিভিন্ন মেডিকেল জাৰ্নেলৰ প্ৰতিবেদনত কোৱা হৈছে যে ২০৫০ চনৰ ভিতৰত ভাৰতৰ প্ৰায় ৪৫ কোটি লোক মেদবহুলতাৰ চিকাৰ হ’ব। মেদবহুলতাৰ মাপকাঠীৰ ক্ষেত্ৰত কেৱল আমেৰিকাহে আমাৰ আগত থাকিব। বৰ্তমান ভাৰতৰ প্ৰতি পাঁচজন নাগৰিকৰ ভিতৰত এজনে অতিৰিক্ত ওজনৰ বাবে শাৰীৰিক সমস্যাত ভুগি আছে। ২০৫০ চনৰ ভিতৰত এই সংখ্যা প্ৰতি তিনিজনৰ ভিতৰত এজন হ’ব।
ওজন বৃদ্ধিৰ অন্যতম কাৰণ হৈছে খাদ্যাভ্যাস। হৃদৰোগৰ ক্ৰমাৎ বৃদ্ধি পোৱা ধাৰাটোৱেও উদ্বেগৰ সৃষ্টি কৰিছে। তথ্য অনুসৰি দেশত প্ৰতি বছৰে কমেও ৭ লাখ লোক হাৰ্ট এটেক (হঠাৎ হৃদৰোগ)ত আক্ৰান্ত হয়। ইয়াৰ এটা কাৰণ হ’ল অস্বাস্থ্যকৰ খাদ্যাভ্যাস।
মধুমেহ বিশেষজ্ঞ ডাঃ সুনীল গুপ্তাই কয় যে, “যদি মানুহে জানে যে এটা গুলাব জামুনত পাঁচ চামুচ চেনি থাকে, তেন্তে খোৱাৰ আগতে দুবাৰ ভাবিব।” কেন্দ্ৰৰ এই পদক্ষেপক শলাগ লৈছে ভাৰতীয় কাৰ্ডিঅ’লজিকেল ছ’চাইটি (নাগপুৰ শাখা)ৰ সভাপতি অমল আমালে। তেওঁৰ মতে, চেনি আৰু ট্ৰেন্স ফেট এই মুহূৰ্তত ধঁপাতৰ দৰেই ক্ষতিকাৰক।
