ইন্দোৰক পুনৰ দেশৰ আটাইতকৈ পৰিষ্কাৰ চহৰ হিচাপে নিৰ্বাচিত কৰা হৈছে। ইয়াৰ লগে লগে অষ্টমবাৰৰ বাবে মধ্যপ্ৰদেশৰ ইন্দোৰে পৰিস্কাৰ চহৰৰ তালিকাত শীৰ্ষস্থান দখল কৰিছে।
এই তালিকাত দ্বিতীয় স্থানত আছে গুজৰাটৰ চুৰাট। তৃতীয় স্থানত আছে মহাৰাষ্ট্ৰৰ নৱী মুম্বাই।
প্ৰতি বছৰে কেন্দ্ৰীয় চৰকাৰে দেশৰ চহৰসমূহৰ পৰিষ্কাৰ-পৰিচ্ছন্নতাৰ জৰীপ কৰে। কেন্দ্ৰীয় গৃহ নিৰ্মাণ আৰু নগৰ উন্নয়ন মন্ত্ৰালয়ৰ উদ্যোগত বৃহস্পতিবাৰে দিল্লীৰ বিজ্ঞান ভৱনত এক সভা অনুষ্ঠিত হয়। তাতে ৰাষ্ট্ৰপতি দ্ৰৌপদী মুৰ্মুৱে ‘স্বচ্ছ সৰ্বেক্ষা ২০২৪-২৫’ৰ বিজয়ীৰ তালিকা ঘোষণা কৰে।
স্বচ্ছ সৰ্বেক্ষা অভিযানত মুঠ ৪৫০০ চহৰৰ জৰীপ কৰা হৈছিল। ৪৫ দিনীয়া এই সমীক্ষাত ১৪ কোটি নগৰবাসীৰ সৈতে কথা পতা হৈছিল। অনাময় আৰু আৱৰ্জনা নিষ্কাশন সেৱাকে ধৰি মুঠ ১০টা বিষয় চোৱাচিতা কৰি বিজয়ী চহৰসমূহ ঘোষণা কৰা হয়।
তিনিৰ পৰা দহ লাখ জনসংখ্যা থকা চহৰসমূহৰ ভিতৰত পৰিষ্কাৰ-পৰিচ্ছন্নতাৰ দিশৰ পৰা শীৰ্ষ স্থানসমূহ হ’ল – নয়ডা, নতুন দিল্লী পৌৰসভা, ভিটা (মহাৰাষ্ট্ৰ), পঞ্চাগনী। বাসিন্দাৰ সংখ্যা অনুযায়ী চহৰসমূহক বিভিন্ন শিতানত ভাগ কৰি বিজয়ীসকলৰ নাম ঘোষণা কৰা হয়।
বাকী শ্ৰেণীসমূহ হ’ল – ৫০ হাজাৰৰ পৰা তিনি লাখ বাসিন্দা, ২০ হাজাৰৰ পৰা ৫০ হাজাৰ বাসিন্দা আৰু ২০ হাজাৰতকৈও কম বাসিন্দা।২০১৪ চনত কেন্দ্ৰত মোডী চৰকাৰ ক্ষমতালৈ অহাৰ পিছত ২০১৬ চনত কেন্দ্ৰীয় চৰকাৰে স্বচ্ছ ভাৰত অভিযানৰ অধীনত এই বঁটা বিতৰণ অনুষ্ঠান আৰম্ভ কৰিছিল। সূত্ৰ অনুসৰি এই অভিযানৰ লক্ষ্য হৈছে মহানগৰবাসীক পৰিষ্কাৰ-পৰিচ্ছন্নতাৰ বিষয়ে সজাগ কৰা। সেয়েহে প্ৰতি বছৰে এই বঁটা প্ৰদান কৰা হয়। যাতে নাগৰিকে পৰিষ্কাৰ-পৰিচ্ছন্নতাৰ প্ৰতি অধিক গুৰুত্ব দিয়ে। বৃহস্পতিবাৰে ৰাষ্ট্ৰপতিগৰাকীয়ে মুঠ ৭৮টা বঁটা প্ৰদান কৰে।
