১৯৯ কোটি টকাৰ আয়কৰ ফাঁকিৰ গোচৰত পুনৰ বিপদত পৰিল কংগ্ৰেছ। কংগ্ৰেছে আয়কৰ আপীল ন্যায়াধিকৰণৰ কাষ চাপিছিল আৰু সেই বৃহৎ কৰ কৰ্তনৰ দাবী জনাইছিল। কিন্তু সেইটোৱে কংগ্ৰেছ শিবিৰৰ কাকো কোনো সকাহ নিদিলে।
আয়কৰ বিভাগে ২০১৮-১৯ বিত্তীয় বৰ্ষত ১৯৯ কোটি টকাৰ আয়কৰ ফাঁকি দিয়াৰ অভিযোগ উত্থাপন কৰিছে কংগ্ৰেছে। কংগ্ৰেছে দাবী কৰিছিল যে, তেওঁলোকে সেই ১৯৯ কোটি টকা অনুদান হিচাপে পাইছিল। গতিকে কৰ ৰেহাই পোৱা উচিত। সমস্যাটো হ’ল, কংগ্ৰেছ শিবিৰে সেই বছৰৰ নিৰ্ধাৰিত তাৰিখত আয়কৰ দাখিল কৰা নাছিল। কংগ্ৰেছে ২০১৯ চনৰ ২ ফেব্ৰুৱাৰীত সেই বছৰৰ আয়কৰ দাখিল কৰিছিল।কিন্তু সেই বছৰৰ ইনকম টেক্স ৰিটাৰ্ণ দাখিলৰ অন্তিম তাৰিখ আছিল ৩১ ডিচেম্বৰ।
ইয়াতেই শেষ নহয়, নিৰ্বাচন আয়োগে অভিযোগ কৰিছিল যে কংগ্ৰেছে দাবী কৰিছিল যে তেওঁলোকৰ পুঁজিত জমা হোৱা সমগ্ৰ ধন সেই বছৰৰ অনুদানহে। ফলত আয় শূন্য। কিন্তু পিছত তদন্তত প্ৰকাশ পাইছে যে সেই বছৰ কংগ্ৰেছে ১৪.৪৯ লাখ টকাৰ নগদ অনুদান লাভ কৰিছিল, আনহাতে প্ৰতিজন দাতাৰ বাবে ২০০০ টকাতকৈ অধিক অনুদানৰ বাবে ই আইনৰ বিৰুদ্ধে। কাৰণ আইন অনুসৰি চেক বা বেংক ট্ৰেন্সফাৰৰ জৰিয়তে ২০০০ টকীয়াতকৈ অধিক চান্দা লাভ কৰাটো বাধ্যতামূলক। এই অনিয়মৰ ভিত্তিত আয়কৰ বিভাগে সমগ্ৰ ধনৰ ওপৰত কৰ আদায়ৰ দাবী জনাইছে। সেই সিদ্ধান্তৰ বিৰুদ্ধে কংগ্ৰেছ আয়কৰ আপীল ন্যায়াধিকৰণৰ কাষ চাপিছিল। কিন্তু তাত কোনো সকাহ নাছিল। সময়মতে আয়কৰ ৰিটাৰ্ণ দাখিল নকৰাৰ বাবে কংগ্ৰেছে কৰ ৰেহাইৰ সুবিধা লাভ নকৰে বুলি ন্যায়াধিকৰণে জানিবলৈ দিয়ে।
উল্লেখ্য যে ২০২৪ চনৰ লোকসভা নিৰ্বাচনৰ আগৰে পৰাই আয়কৰৰ সমস্যাৰ সন্মুখীন হৈ আহিছে কংগ্ৰেছ শিবিৰ। আয়কৰ বিভাগে কংগ্ৰেছৰ কেইবাটাও একাউণ্টো ফ্ৰীজ কৰি ৰাখিছিল। ২৪ সংখ্যক লোকসভা নিৰ্বাচনৰ পূৰ্বে কংগ্ৰেছে লাভ কৰিছিল প্ৰায় ১৭০০ কোটি টকাৰ আয়কৰৰ জাননী। কোৱা হৈছে যে ২০১৪-১৫ আৰু ২০১৬-১৭ বিত্তীয় বৰ্ষৰ বাবে ১৭৪৫ কোটি টকা জৰিমনা ভৰিব লাগিব। ইয়াৰ পূৰ্বে ১৯৯৪-৯৫, ২০১৭-১৮ চনৰ পৰা ২০২০-২১ বিত্তীয় বৰ্ষৰ বাবে আয়কৰৰ জাননী প্ৰেৰণ কৰা হৈছিল। সেই সংখ্যা আছিল প্ৰায় ১৮ বিলিয়ন। ফলত কংগ্ৰেছক মুঠ ৩৫৬৭ কোটি টকা জৰিমনা আদায় দিবলৈ কোৱা হৈছে।
