পূৰ্বেও ৰটৱেইলাৰ আৰু পিটবুল কুকুৰে শিশুক কামোৰাৰ ঘটনা সংঘটিত হৈছে। পুনৰ যাতে এনে ঘটনা নহয় তাৰ বাবে বিধানসভাত নতুন আইন প্ৰণয়ন কৰা হৈছে।
এই আইনত উল্লেখ কৰা হৈছে যে বিপজ্জনক বুলি শ্ৰেণীভুক্ত কৰা কোনো জন্তু ঘৰত পুহিলে ৩ মাহ পৰ্যন্ত কাৰাদণ্ড হ’ব পাৰে।
‘গোৱা পশু প্ৰজনন আৰু পোহনীয়া জন্তু (নিয়ন্ত্ৰণ আৰু ক্ষতিপূৰণ) বিধেয়ক ২০২৫’ অনুসৰি ৰাজ্য চৰকাৰে চৰকাৰী ৰাজপত্ৰৰ জৰিয়তে কোনো বিশেষ প্ৰাণী বা প্ৰজাতিক ‘আক্ৰমণাত্মক বা বিপজ্জনক’ বুলি ঘোষণা কৰিব পাৰে। ঘোষণা কৰাৰ পিছত সেই জন্তুটো ৰখা, প্ৰজনন বা আমদানি কৰা নিষিদ্ধ হ’ব।
বিধেয়কখন উত্থাপন কৰাৰ সময়ত বিৰোধী দলৰ নেতা ইউৰি আলেমাও, গোৱা ফৰৱাৰ্ড পাৰ্টিৰ বিধায়ক বিজয় চৰ্দেছাই আৰু কংগ্ৰেছৰ কাৰ্লোছ ফেৰেইৰাই এই সন্দৰ্ভত বিতং আলোচনাৰ দাবী জনায়। কিন্তু মুখ্যমন্ত্ৰী প্ৰমোদ সাৱন্তই স্পষ্টকৈ কয় যে, ‘মানুহৰ সুৰক্ষাৰ কথা মনত ৰাখি এই পদক্ষেপ গ্ৰহণ কৰা হৈছে।’
আইনে কি কয়?
• যদি কোনো জন্তু বিপজ্জনক জন্তু বুলি চিনাক্ত হয় তেন্তে ৩০ দিনৰ ভিতৰত পশুপালন বিভাগক সেই জন্তুৰ মালিকে খবৰ দিব লাগিব।
• ৬০ দিনৰ ভিতৰত জন্তুটোক বীজাণুমুক্ত কৰিব লাগিব।
• আইন মানি নচলিলে নূন্যতম ১৫ দিন আৰু সৰ্বাধিক ৩ মাহৰ কাৰাদণ্ডৰ লগতে ৫০ হাজাৰ টকাৰ জৰিমনা আৰু সামূহিক সেৱাও শাস্তি হিচাপে দিয়া হ’ব পাৰে।
• আদালতে ইচ্ছা কৰিলে জেলৰ পৰিৱৰ্তে সামূহিক সেৱা জাপি দিব পাৰি।
এই আইনত উল্লেখ আছে যে কোনো আক্ৰমণাত্মক জন্তুৰ বাবে কোনো লোক আঘাতপ্ৰাপ্ত হ’লে বা মৃত্যু হ’লে ক্ষতিপূৰণ বিচাৰিব পাৰি। ঘটনাৰ ৬ মাহৰ ভিতৰত ইয়াৰ বাবে আবেদন দাখিল কৰিব লাগিব, আৰু সংশ্লিষ্ট কৰ্তৃপক্ষই ৩ মাহৰ ভিতৰত নিষ্পত্তি কৰিব লাগিব। পশুপালন সঞ্চালকালয়ে জীৱ-জন্তুৰ এখন তালিকা ৰক্ষণাবেক্ষণ কৰিব।
উল্লেখ্য যে ২০২৪ চনত কেন্দ্ৰীয় চৰকাৰে পিটবুল, ৰটৱেইলাৰ, আমেৰিকান বুলডগ, কেন কৰ্চো, মাষ্টিফকে ধৰি ২৩টা ‘বিপজ্জনক কুকুৰ’ জাতৰ আমদানি, বিক্ৰী আৰু প্ৰজনন নিষিদ্ধ কৰিছিল।
