ভাৰত চৰকাৰে পাকিস্তানী সন্ত্ৰাসবাদী নিধনৰ বাবে চলোৱা অপাৰেশ্যন সিন্দুৰৰ সম্পৰ্কে সংসদত বিতৰ্ক চলি থকাৰ সময়তে প্ৰধানমন্ত্ৰী মোদীয়ে নিজৰ স্পষ্টীকৰণ দাঙি ধৰিছে।
মোদীয়ে কয় যে ১০ মে’ত যুদ্ধ বিৰতিৰ বাবে পাকিস্তানে কাতৰ অনুৰোধ জনোৱাৰ পিছতহে ভাৰতে অস্ত্ৰ সম্বৰণ কৰিছিল। কোনো বিশ্বৰ নেতাই যুদ্ধ বন্ধ কৰিবলৈ কোৱা নাছিল।
মঙলবাৰে লোকসভাত অপাৰেচন সিন্দুৰ আৰু পহলগাম সন্ত্ৰাসবাদী আক্ৰমণৰ বিতৰ্কৰ প্ৰতিক্ৰিয়া প্ৰকাশ কৰি প্ৰধানমন্ত্ৰী মোদীয়ে বিৰোধী আৰু বিৰোধী দলৰ নেতা ৰাহুল গান্ধীক তীব্ৰ সমালোচনা কৰে।
ভাৰত আৰু পাকিস্তানক যুদ্ধবিৰতিৰ বাবে সন্মতি দিয়া বুলি আমেৰিকাৰ ৰাষ্ট্ৰপতি ড’নাল্ড ট্ৰাম্পে জনোৱা দাবীক বিৰোধীয়ে কিয় প্ৰত্যাহ্বান জনোৱা নাই বুলিও প্ৰশ্ন কৰে নৰেন্দ্ৰ মোদীয়ে।
উল্লেখ্য যে ইয়াৰ পূৰ্বে ভাৰত-পাকিস্তানৰ যুদ্ধ ডনাল্ড ট্ৰাম্পৰ আহ্বানমৰ্মে বন্ধ হৈছে বুলি তেওঁ কেইবাবাৰো দাবী জনাই আহিছিল। আনকি, ভাৰত পাকিস্তানৰ যুদ্ধ ৰোধ কৰাৰ বাবে ড’নাল্ড ট্ৰাম্পক শান্তিৰ নোবেল বঁটাৰ বাবেও মনোনীত কৰিছিল পাকিস্তানে। ইয়াকে লৈ বিৰোধী নেতাসকলে নৰেন্দ্ৰ মোদীক সমালোচনা আৰু প্ৰশ্ন কৰি আহিছিল।
