ভাৰতীয় প্ৰযুক্তিবিদ্যা প্ৰতিষ্ঠান ,দিল্লীৰ (Indian Institute of Technology, Delhi) পদাৰ্থ বিজ্ঞান বিভাগৰ গৱেষক ছাত্ৰ পংকজ বৰাই তেওঁৰ গৱেষণা গ্ৰন্থ “Cosmic Phase Transitions and Gravitational Waves: a quest for physics beyond the Standard Electroweak Model”ৰ বাবে ডক্টৰেট ডিগ্ৰী লাভ কৰিছে।বৰাই ভাৰতীয় প্ৰযুক্তিবিদ্যা প্ৰতিষ্ঠান, দিল্লীৰ অধ্যাপক ড° প্রদীপ্ত ঘোষৰ তত্বাৱধানত গৱেষণা কাৰ্য সম্পাদন কৰিছে। গৱেষণাৰ মূল বিষয় তাত্বিক কণিকা পদাৰ্থবিজ্ঞান আৰু মহাকাশবিদ্যাৰ সংযোগস্থলত অৱস্থিত | বিশেষকৈ, Electroweak Phase Transition, মধ্যাকৰ্ষণিক তৰংগ, কৃষ্ণ পদাৰ্থ আৰু নতুন পদাৰ্থবিজ্ঞান বিচাৰৰ দৰে বিষয়সমূহত গৱেষণা কৰিছিল বৰাই।
উল্লেখ্য যে , পংকজ বৰাই ২০১২ চনত গহপুৰ উচ্চতৰ মাধ্যমিক বিদ্যালয়ৰ পৰা হাইস্কুল শিক্ষান্ত পৰীক্ষাত ৮৬.৬৭% নম্বৰ লাভ কৰি সুখ্যাতিৰে উত্তীৰ্ণ হৈছিল। ২০১৪ চনত ছয়দুৱাৰ মহাবিদ্যালয়ৰ পৰা উচ্চতৰ মাধ্যমিক পৰীক্ষাত ৯০.৮% আৰু ২০১৭ চনত কটন বিশ্ববিদ্যালয়ৰ পৰা পদাৰ্থ বিজ্ঞানত স্নাতক ডিগ্ৰী লাভ কৰি ৮৭.২০% (CGPA ৮.৭২)-সহ তৃতীয় স্থান দখল কৰিছিল।
পংকজ বৰাই ২০১৯ চনত ভাৰতীয় প্ৰযুক্তিবিদ্যা প্ৰতিষ্ঠান গান্ধীনগৰৰ পৰা পদাৰ্থ বিজ্ঞানত ৮৪.১০% নম্বৰেৰে স্নাতকোত্তৰ ডিগ্ৰী লাভ কৰে।
পংকজ বৰা, গহপুৰ কলেজ গুৰিৰ নিবাসী প্ৰবীণ বৰা আৰু জানমণি বৰাৰ পুত্ৰ।
