সমগ্ৰ দেশতে খালী হৈ আছে প্ৰায় ১০ লাখ শিক্ষকৰ পদ। ইয়াৰ ভিতৰত কেন্দ্ৰীয় বিদ্যালয়, নৱোদয় বিদ্যালয় আৰু ৰাজ্য চৰকাৰৰ দ্বাৰা পৰিচালিত বিদ্যালয়সমূহো অন্তৰ্ভুক্ত। দেশৰ শিক্ষাৰ ছবিখনক উজ্জ্বল কৰি তোলাৰ সমান্তৰালকৈ সংসদৰ শিক্ষা, মহিলা, শিশু, ক্ৰীড়া আৰু যুৱ কল্যাণৰ স্থায়ী সমিতিয়ে কেন্দ্ৰীয় চৰকাৰক সমালোচনাৰে থকা-সৰকা কৰি তুলিছে।
কমিটীৰ অধ্যক্ষ কংগ্ৰেছৰ সাংসদ দিগ্বিজয় সিঙে কেন্দ্ৰক প্ৰতিবেদনত সকীয়াই দিছে যে অস্থায়ী শিক্ষক নিযুক্তি এতিয়া বন্ধ কৰি স্থায়ী নিযুক্তি দিব লাগে। কমিটীৰ সদস্য সাংসদ বিকাশ ভট্টাচাৰ্যই কয় যে কেন্দ্রীয় চৰকাৰে শিক্ষা ব্যৱস্থাক অচল কৰি তুলিব বিচাৰিছে৷ ৰাষ্ট্ৰীয় শিক্ষা নীতি কাৰ্যকৰী হ’লে ধনীসকলেহে পঢ়া-শুনা কৰিব পাৰিব। সমগ্ৰ দেশতে ৰাষ্ট্ৰীয় শিক্ষা নীতি ৰূপায়ণৰ বাবে লৰালৰি কৰিছে কেন্দ্ৰীয় চৰকাৰে। এই শিক্ষা নীতিয়ে দেশৰ পিছপৰা, দৰিদ্ৰ, অনুসূচিত জাতি আৰু অনুসূচিত জনজাতিৰ শিক্ষাৰ্থীসকলক আৰু অধিক পিছুৱাই নিব বুলি সমিতিখনে স্পষ্ট কৰি দিয়ে।
প্ৰতিবেদনত উল্লেখ কৰা হৈছে যে নতুন শিক্ষা নীতিক আৰু বহু ভাগত বিভক্ত কৰা হৈছে। কিন্তু ইয়াৰ সুফল ছাত্ৰ-ছাত্ৰীয়ে পোৱা নাই। গতিকে এনচিইআৰটিৰ পাঠ্যক্ৰমত এক ব্যাপক সংস্কাৰৰ প্ৰয়োজন। লগতে স্নাতক বি এড কাৰ্যসূচীয়ে যোৱা তিনিটা দশক ধৰি প্ৰাথমিক পৰ্যায়ত শিক্ষক উৎপাদনৰ বাবে অবিৰতভাৱে কাম কৰি আহিছে। প্ৰতিবেদনত উল্লেখ কৰা হৈছে যে কেন্দ্ৰটোৰ বৰ্তমানৰ শিক্ষা নীতিয়ে সেই ব্যৱস্থা ভংগ কৰিবলৈ চেষ্টা কৰিছে। কোৱা হয় যে ১৯৯৯ চনৰ পৰা এনচিইআৰটিয়ে শিক্ষক নিযুক্তি দিয়া নাই।ফলত শিক্ষক পদত এই বিশাল শূন্যতাৰ সৃষ্টি হৈছে। কংগ্ৰেছৰ সাংসদ জয়ৰাম ৰমেশে ছ’চিয়েল মিডিয়াত লিখিছে যে কেন্দ্ৰীয় চৰকাৰে শিক্ষাৰ ক্ষেত্ৰত কৌশল খেলিছে।
