ভাৰতীয় নিৰ্বাচন আয়ুক্ত জ্ঞানেশ কুমাৰৰ পদত্যাগ আৰু তেওঁৰ বিৰুদ্ধে ফৌজদাৰী গোচৰ ৰুজু কৰাৰ দাবী জনাই মুম্বাইৰ ঐতিহাসিক শিৱাজী পাৰ্কত ‘ককৰোচ জনতা পাৰ্টি’য়ে এক বিশাল জেল ভৰো আন্দোলন আৰম্ভ কৰিছে। এছ আই আৰ প্ৰক্ৰিয়াত ব্যাপক খেলিমেলিৰ অভিযোগ তুলি এই দলটোৰ প্ৰতিষ্ঠাপক অভিজিত দীপকৰ নেতৃত্বত চলা এই আন্দোলনৰ বাবে দাদৰ আৰু শিৱাজী পাৰ্ক অঞ্চলত প্ৰবল পুলিচ বাহিনী মোতায়েন কৰা হৈছে। এই প্ৰতিবাদৰ খবৰে সমগ্ৰ দেশৰ ৰাজনীতিত তীব্ৰ চাঞ্চল্যৰ সৃষ্টি কৰিছে।
আন্দোলনৰ প্ৰতি সমৰ্থন জনাবলৈ হঠাতে শিৱাজী পাৰ্কৰ প্ৰতিবাদস্থলীত উপস্থিত হয় বিশিষ্ট অভিনেতা নাচিৰুদ্দিন শ্বাহ আৰু তেওঁ প্ৰতিবাদকাৰীসকলৰ সৈতে কথা পাতে। ইফালে কংগ্ৰেছৰ মুখপাত্ৰ পৱন খেড়াই ছচিয়েল মিডিয়াত কেন্দ্ৰীয় চৰকাৰক কঠোৰ ভাষাৰে সমালোচনা কৰি কয় যে চৰকাৰে মুখ্য নিৰ্বাচন আয়ুক্তগৰাকীক বচাবলৈ উঠি-পৰি লাগিছে। আয়োগে গণতন্ত্ৰ ধ্বংস কৰাৰ অভিযোগ তুলি তেওঁলোকক শীঘ্ৰেই পদৰ পৰা অপসাৰণ কৰাৰ দাবী উত্থাপন কৰা হৈছে।
এই তীব্ৰ আন্দোলনৰ মাজতে শিৱাজী পাৰ্কৰ স্থানীয় বাসিন্দাসকলে বাৰে বাৰে হোৱা ৰাজনৈতিক সভাই সৃষ্টি কৰা শব্দদূষণ আৰু ব্যৱসায়-বাণিজ্যৰ ক্ষতিৰ বিৰুদ্ধে মুকলিকৈ ক্ষোভ প্ৰকাশ কৰে। প্ৰতিবাদস্থলীত দোকান-পোহাৰ বন্ধ ৰাখিবলগীয়া হোৱাত ব্যৱসায়ীসকলে দুৰ্ভোগ ভুগিবলগীয়া হৈছে। স্থানীয় ৰাইজৰ এই সমস্যাক সমৰ্থন জনাই বিখ্যাত গীতিকাৰ জাভেদ আখতাৰে মন্তব্য কৰে যে নাগৰিকৰ অধিকাৰ আৰু শব্দদূষণৰ বিৰুদ্ধে সাধাৰণ ৰাইজ সৰৱ হৈ উঠাটো অতি ইতিবাচক কথা। লগতে তেওঁ আশা প্ৰকাশ কৰে যে ভৱিষ্যতে মহাৰাষ্ট্ৰৰ আন যিকোনো ডাঙৰ ৰাজনৈতিক দলৰ সভা বা আন্দোলনৰ বিৰুদ্ধেও স্থানীয় ৰাইজে ঠিক একেদৰে সমান শক্তিৰে প্ৰতিবাদ জনাব।
মহাৰাষ্ট্ৰ পুলিচৰ অনুমতি অবিহনেই আৰম্ভ হোৱা এই বিক্ষোভে ক্ৰমাৎ দেশৰ অন্যান্য চহৰতো ভৰি পৰাৰ ইংগিত দিছে আৰু চলিত মাহৰ শেষৰ ফালে দিল্লীৰ যন্তৰ মন্তৰতো একে ধৰণে আন্দোলন কৰাৰ কথা ঘোষণা কৰিছে ককৰোচ জনতা পাৰ্টিয়ে।
