ইণ্ডিয়া মিত্ৰজোঁটৰ সাংসদসকলে ভাৰতীয় কনষ্টিটিউচন ক্লাবত সোমবাৰে এক যুটীয়া সংবাদমেলত নিৰ্বাচন আয়োগৰ বিৰুদ্ধে পক্ষপাতিত্বৰ গুৰুতৰ অভিযোগ উত্থাপন কৰিছে। কংগ্ৰেছৰ সাংসদ গৌৰৱ গগৈৰ নেতৃত্বত বিৰোধী নেতাসকলে নিৰ্বাচনত অসৎ আচৰণৰ অভিযোগ অভিযোগ উত্থাপন কৰি লোকসভা তৎক্ষণাত ভংগৰ দাবী জনাইছে। তৃণমূল কংগ্ৰেছৰ সাংসদ মহুৱা মৈত্ৰয়েও এই দাবীক সমৰ্থন কৰি নিৰ্বাচনী প্ৰক্ৰিয়াৰ স্বচ্ছতাৰ ওপৰত প্ৰশ্ন উত্থাপন কৰিছে।
উল্লেখ্য যে এই সংবাদমেলত কংগ্ৰেছৰ গৌৰৱ গগৈ, সমাজবাদী পাৰ্টীৰ ৰামগোপাল যাদৱ, তৃণমূল কংগ্ৰেছৰ মহুৱা মৈত্ৰ, আৰজেডিৰ মনোজ ঝা আৰু আপৰ সঞ্জয় সিং আদি জ্যেষ্ঠ নেতা উপস্থিত আছিল। গগৈয়ে অভিযোগ কৰে যে নিৰ্বাচন আয়োগে মহাৰাষ্ট্ৰত ভোটাৰ তালিকাত অমিল, ভিডিঅ’ ডাটা মচি পেলোৱা আৰু বিহাৰত বিশেষ পুনৰীক্ষণ (SIR) প্ৰক্ৰিয়াৰ ক্ষেত্ৰত নিমাত হৈ আছে। তেওঁ কয়, “নিৰ্বাচন আয়োগ পক্ষপাতদুষ্ট বিষয়াৰ নিয়ন্ত্ৰণত আছে। মহাৰাষ্ট্ৰ আৰু বিহাৰৰ নিৰ্বাচনত ৭০ লাখ নতুন ভোটাৰ কেনেকৈ যোগ হ’ল, তাৰ কোনো ব্যাখ্যা নাই।” তেওঁ আৰু দাবী কৰে যে আয়োগে বিৰোধীৰ অভিযোগৰ তদন্ত কৰাৰ আগত প্ৰথমে নিজৰ ভোটাৰ তালিকাৰ শুদ্ধতাৰ শপতনামা দিব লাগে।
তৃণমূল কংগ্ৰেছৰ মহুৱা মৈত্ৰই কয়, “পশ্চিম বংগৰ মুখ্যমন্ত্ৰীয়ে ডুপ্লিকেট ভোটাৰ কাৰ্ডৰ বিষয় উত্থাপন কৰিছিল, কিন্তু কোনো সমাধান হোৱা নাই। প্ৰৱঞ্চনামূলক ভোটাৰ তালিকাৰ বাবে নিৰ্বাচন আয়োগৰ বিৰুদ্ধে ব্যৱস্থা গ্ৰহণ কৰা উচিত আৰু লোকসভা তৎক্ষণাত ভংগ কৰাৰ প্ৰয়োজন।” শিৱসেনা (UBT)ৰ অৰবিন্দ সাৱন্তে মুখ্য নিৰ্বাচন আয়ুক্তক বিজেপিৰ মুখপাত্ৰৰ দৰে আচৰণ কৰাৰ অভিযোগ উত্থাপন কৰি নিৰ্বাচনী প্ৰক্ৰিয়াৰ নিৰপেক্ষতাৰ প্ৰশ্ন তুলিছে। এই সংবাদ মেলৰ জড়িয়তে ইণ্ডিয়া মিত্ৰজোঁটে নিৰ্বাচন আয়োগৰ জবাবদিহিতা আৰু স্বচ্ছতা নিশ্চিত কৰাৰ দাবী জনাইছে।
