তথ্য অনুসৰি মণিপুৰৰ মাটিত শেষবাৰৰ বাবে প্ৰধানমন্ত্ৰী নৰেন্দ্ৰ মোদীয়ে ভৰি দিছিল ২০২২ চনৰ ২২ ফেব্ৰুৱাৰীত। ইয়াৰ পিছত ২০২৩ চনৰ মে’ মাহত মণিপুৰত গোষ্ঠীগত সংঘৰ্ষৰ ভয়ংকৰ ঘটনা সংঘটিত হৈছিল। বহুত লোকে প্ৰাণ হেৰুৱাইছিল। ২ বছৰৰ পাছতো এই উত্তৰ-পূবৰ ৰাজ্যখন সম্পূৰ্ণৰূপে শান্ত হোৱা নাই।
তাৰপিছতো প্ৰধানমন্ত্ৰীয়ে এই ৰাজ্য ভ্ৰমণ কৰাতো দূৰৰ কথা ৰাজ্যখনৰ পৰিস্থিতিৰ ওপৰত বিশেষ বক্তব্যও প্ৰকাশ কৰা দেখা যোৱা নাই। অৱশ্যে এইবাৰ প্ৰধানমন্ত্ৰী নৰেন্দ্ৰ মোডী অহা মাহত মণিপুৰ ভ্ৰমণলৈ যাব বুলি সূত্ৰই দাবী কৰিছে।
বিগত ২ বছৰত প্ৰধানমন্ত্ৰীয়ে কেইবাবাৰো বিদেশ ভ্ৰমণ কৰিছে। ইউক্ৰেইন আৰু ৰাছিয়াৰ মাজত শান্তি স্থাপনৰ বাবেও চেষ্টা কৰা দেখা গৈছে। কিন্তু বিৰোধীয়ে বাৰে বাৰে প্ৰশ্ন উত্থাপন কৰি আহিছে যে তেওঁ কিয় মণিপুৰ ভ্ৰমণৰ বাবে সময় পোৱা নাই। লোকসভা অধিৱেশন হওক বা সংবাদমেলেই হওক, বিৰোধীয়ে বাৰে বাৰে এই অস্ত্ৰৰে মোডীক বিন্ধিছে। সেই চাপৰ বাবেই এইবাৰ প্ৰধানমন্ত্ৰীৰ মণিপুৰ ভ্ৰমণৰ পৰিকল্পনা নেকি? এইটোৱেই হৈছে সংশ্লিষ্ট মহলৰ ধাৰণা।
সূত্ৰ অনুসৰি, ছেপ্টেম্বৰৰ দ্বিতীয় সপ্তাহত প্ৰধানমন্ত্ৰী নৰেন্দ্ৰ মোদীয়ে মণিপুৰ ভ্ৰমণ কৰাৰ সম্ভাৱনা আছে। ১২-১৪ ছেপ্টেম্বৰলৈ প্ৰধানমন্ত্ৰীৰ আগন্তুক মিজোৰাম আৰু অসম ভ্ৰমণৰ কাৰ্যসূচীত আছে মণিপুৰো। কোৱা হৈছে যে নৰেন্দ্ৰ মোদীয়ে অশান্ত ৰাজ্যখনৰ ইম্ফল আৰু চুৰাচান্দপুৰ জিলা ভ্ৰমণ কৰিব। গৃহহীন লোকৰ লগতো কথা পাতিব পাৰে।
প্ৰধানমন্ত্ৰীৰ এই ভ্ৰমণৰ বাবে কটকটীয়া নিৰাপত্তাৰ ব্যৱস্থা কৰা হৈছে। হেলিপেডটো মেৰামতি কৰা হৈছে।
উল্লেখ্য যে ২০২৩ চনৰ ৩ মে’ত উপত্যকাৰ মেইটেই আৰু মনিপুৰৰ পাহাৰীয়া অঞ্চলত থকা কুকি দুয়োটা গোষ্ঠীৰ মাজত হোৱা সংঘৰ্ষৰ ফলত উত্তাল হৈ পৰে ৰাজ্যখন। কমেও ২৫০ জন লোকে প্ৰাণ হেৰুৱায়। ঘৰ-দুৱাৰ হেৰুৱাই ৬০ হাজাৰৰো অধিক লোকে সাহায্য শিবিৰত বসবাস কৰি আছে।
