অষ্ট্ৰেলিয়াৰ তাৰকা খেলুৱৈ, বেগী বলাৰ মিচেল ষ্টাৰ্কৰ ডাঙৰ ঘোষণা। অৱসৰৰ কথা ঘোষণা কৰিলে ক্ৰিকেট তাৰকাগৰাকীয়ে। এই খবৰ শুনি তেওঁৰ অনুৰাগীসকল স্তম্ভিত হৈ পৰিছে।
মিচেল ষ্টাৰ্কে কয় যে তেওঁ টি-২০ ইণ্টাৰনেশ্যনেল ক্ৰিকেটৰ পৰা অৱসৰ গ্ৰহণ কৰিছে। তেওঁৰ লক্ষ্য এতিয়া দেশৰ ব্যস্ত টেষ্ট সূচীত নিজকে আত্মনিয়োগ কৰি ২০২৭ চনৰ এদিনীয়া বিশ্বকাপৰ বাবে নিজকে ফিট কৰি ৰখা।
৩৫ বছৰীয়া ষ্টাৰ্কে শেষবাৰৰ বাবে ২০২৪ চনৰ টি-২০ বিশ্বকাপত খেলিছিল। সেইবাৰ আমেৰিকা আৰু ৱেষ্ট ইণ্ডিজত অনুষ্ঠিত হৈছিল। ভাৰত আৰু শ্ৰীলংকাত পৰৱর্তী বিশ্বকাপ আৰম্ভ হোৱাৰ ছমাহ পূর্বে তেওঁ টি-২০ৰ পৰা অৱসৰ লয়৷
২০১২ চনত পাকিস্তানৰ বিৰুদ্ধে অভিষেক ঘটোৱাৰ পিছত অষ্ট্ৰেলিয়াৰ হৈ ৬৫খন টি-২০ মেচ খেলিছে ষ্টাৰ্কে। ৭.৭৪ ইকনমি ৰেটত ৭৯টা উইকেট দখল কৰিছে, যিটো অষ্ট্ৰেলিয়াৰ ইতিহাসত দ্বিতীয় সৰ্বাধিক। তেওঁতকৈ ওপৰত আছে কেৱল এডাম জাম্পাই। তেওঁ ছয়খন টি-২০ বিশ্বকাপৰ ভিতৰত ৫খনতে খেলিছে। আঘাতৰ বাবে ২০১৬ চনৰ বিশ্বকাপতহে অংশ ল’ব নোৱাৰিলে। ২০২১ চনত ডুবাইত অষ্ট্ৰেলিয়াৰ বিশ্বকাপ জয়ৰ ক্ষেত্ৰত তেওঁৰ ভূমিকা আছিল গুৰুত্বপূৰ্ণ।
ষ্টাৰ্কে কয়, “টেষ্ট ক্ৰিকেট মোৰ বাবে সদায় শীৰ্ষ অগ্ৰাধিকাৰ। অষ্ট্ৰেলিয়াৰ হৈ খেলা প্ৰতিখন টি-২০ মেচ মই উপভোগ কৰিছো, বিশেষকৈ ২০২১ চনৰ বিশ্বকাপ। কেৱল জয়ৰ বাবেই নহয়, এটা ডাঙৰ দলৰ সৈতে কটোৱা অবিশ্বাস্য সময়ৰ বাবেও ই স্মৰণীয় হৈ আহিছে।”
তেওঁ লগতে কয়, “আগন্তুক ভাৰতৰ বিৰুদ্ধে বিদেশত টেষ্ট শৃংখলা, এছেছ আৰু ২০২৭ চনৰ এদিনীয়া বিশ্বকাপৰ কথা মনত ৰাখিয়েই মই এই সিদ্ধান্ত লৈছো । ইয়াৰ ফলত মই ফিট, সজীৱ আৰু শীৰ্ষ ফৰ্মত থাকিব পাৰিম। লগতে আগন্তুক টি-২০ বিশ্বকাপৰ বাবে বলাৰসকলৰ প্ৰস্তুতিৰ বাবে সময়ো পোৱা যাব।”
