পশ্চিম বংগৰ দাৰ্জিলিঙত হৈছে ভয়ংকৰ ভূমিস্খলন। এই ভূমিস্খলনত কমেও ৭ জন লোকৰ মৃত্যু হোৱা বুলি জানিব পৰা গৈছে।
দাৰ্জিলিঙৰ অতিৰিক্ত আৰক্ষী অধীক্ষক অভিষেক ৰায়ে কয়, “আমি এতিয়ালৈকে ধ্বংসাৱশেষৰ পৰা সাতজন লোকৰ মৃতদেহ উদ্ধাৰ কৰিছো। বাকী দুজন লোকৰ বিষয়েও আমাৰ হাতত তথ্য আছে। তেওঁলোকৰ মৃতদেহ উদ্ধাৰৰ প্ৰচেষ্টা চলি আছে।”
তেওঁ কয়, “কুৰ্চেয়ঙৰ পৰা দাৰ্জিলিংলৈ যোৱা পথত ডিলাৰামৰ সমীপত ভূমিস্খলন হৈছে। বৰ্তমান পথটো বন্ধ হৈ আছে; পথটো মুকলি কৰাৰ প্ৰচেষ্টা চলি আছে। ৰোহিনীৰ পথো বন্ধ হৈ আছে। গৌৰীশংকৰৰ সমীপতো ভূমিস্খলন হৈছে। সেইটোও মুকলি কৰাৰ প্ৰয়াস কৰা হৈছে।”
অতিৰিক্ত আৰক্ষী অধীক্ষগৰাকীয়ে কয়, “পাংখাবাৰী পথৰ অৱস্থা অতি বেয়া। তিন্দ্ৰিয়া পথ মুকলি হৈছে। আমি সকলো পৰ্যটকক তিন্দ্ৰিয়াৰ পৰা উলিয়াই অনাৰ চেষ্টা কৰিছো।”
দাৰ্জিলিঙৰ এই ঘটনাক লৈ শোক প্ৰকাশ কৰিছে প্ৰধানমন্ত্ৰী নৰেন্দ্ৰ মোদীয়ে।
মোদীয়ে টুইটাৰত লিখিছে, “দাৰ্জিলিঙত সংঘটিত দলং দুৰ্ঘটনাৰ বাবে আমি গভীৰভাৱে দুখী। নিজৰ আপোনজনক হেৰুৱাই পেলোৱাসকলৰ প্ৰতি মোৰ সমবেদনা। আহতসকলৰ আশু আৰোগ্য কামনা কৰিলোঁ।”প্ৰধানমন্ত্ৰীয়ে কয়, “প্ৰবল বৰষুণ আৰু ভূমিস্খলনৰ পৰিপ্ৰেক্ষিতত দাৰ্জিলিং আৰু ইয়াৰ আশে-পাশে থকা অঞ্চলৰ পৰিস্থিতি তীক্ষ্ণ দৃষ্টিৰে চোৱাচিতা কৰা হৈছে। ক্ষতিগ্ৰস্তসকলক সকলো ধৰণৰ সাহায্য প্ৰদান কৰা হ’ব।”
