ভেনিজুৱেলাৰ বিৰোধী নেত্ৰী মাৰিয়া ক’ৰিনা মাচাডো ২০২৫ চনৰ শান্তি নোবেল বঁটা লাভ কৰাৰ পিছত আন্তঃৰাষ্ট্ৰীয় পৰ্যায়ত আলোচনাৰ কেন্দ্ৰবিন্দু হৈ পৰিছে। তেওঁৰ সংগ্ৰামৰ আঁৰত আছে এক অটল বিশ্বাস— অহিংস প্ৰতিৰোধৰ জৰিয়তে গণতন্ত্ৰৰ বিজয়। মহাত্মা গান্ধীৰ উদ্ধৃতি দি তেওঁ নিজেই সেই বিশ্বাসৰ উৎস বহুবাৰ ৰাজহুৱাভাৱে উল্লেখ কৰিছে।
২০১০ চনৰ মাচাডোৰ দুটা পুৰণি টুইট নোবেল ঘোষণাৰ পিছত পুনৰ ভাইৰেল হৈছে। প্ৰথমটো ২০১০ চনৰ ২ মে’ত কৰা হৈছিল—“ Almost everything I do will be insignificant, but it is very important that I do it.” (“মোৰ কামটো তুচ্ছ যেন লাগিব পাৰে, কিন্তু সেইটো কৰাটো মোৰ বাবে অতি গুৰুত্বপূৰ্ণ।”)
ইয়াৰ কেইসপ্তাহমান আগতে ২০১০ চনৰ ১৪ এপ্ৰিলত মাচাডোৱে আন এটা টুইটত গান্ধীৰ আন এটা উক্তি উদ্ধৃত কৰিছিল—“As soon as someone understands that obeying unjust laws is contrary to their human dignity, no tyranny can dominate them.” (“ কোনোবাই অন্যায় আইন মানি চলাটো তেওঁলোকৰ মানৱীয় মৰ্যাদাৰ পৰিপন্থী বুলি বুজি পোৱাৰ লগে লগে কোনো অত্যাচাৰে তেওঁলোকৰ ওপৰত আধিপত্য বিস্তাৰ কৰিব নোৱাৰে।”)
গান্ধীৰ এই দুটা কথা উদ্ধৃত কৰাৰ জৰিয়তে মাচাডোৰ ৰাজনৈতিক দৰ্শনৰ ভিত্তিও স্পষ্ট হৈ পৰে। শাসকৰ বিৰুদ্ধে হিংসাত্মক প্ৰতিশোধ নহয়, অন্যায়ৰ আগত শিৰণত নকৰাৰ তেওঁ সবল মানসিকতা দেখুৱাইছিল।
গান্ধীৰ দৰেই মাচাডোৰ মতে ক্ষমতাৰ বিৰুদ্ধে সৰ্বাধিক শক্তি হৈছে জনসাধাৰণৰ ঐক্য আৰু নৈতিক সাহস। তেওঁ কেতিয়াও হিংসাৰ আশ্ৰয় লোৱা নাছিল, বৰঞ্চ নিৰ্বাচন, নাগৰিক অধিকাৰ আৰু নৈতিক প্ৰতিবাদকেই বাছি লৈছিল।
মহাত্মা গান্ধীৰ নাম কেইবাবাৰো শান্তি বঁটাৰ বাবে মনোনীত হৈছিল। অৱশ্যে যি গান্ধীয়ে নিজে কেতিয়াও নোবেল বঁটা লাভ কৰা নাই, সেই গান্ধীৰ আদৰ্শৰে অনুপ্ৰাণিত হৈ এগৰাকী মহিলা আজি এই সন্মানেৰে সন্মানিত হৈছে। বহুতে বিশ্বাস কৰে যে মাৰিয়া মাচাডোৰ এই বিজয় আচলতে অহিংস সংগ্ৰামৰ দৰ্শনৰ ঐতিহাসিক স্বীকৃতি।
