ছাত্ৰ একতা সভাৰ নিৰ্বাচনৰ বতাহ বলি থকাৰ মাজতে উত্তাল হৈ পৰিছে দিল্লীৰ জৱাহৰলাল নেহৰু ইউনিভাৰ্ছিটিৰ (জে এন ইউ) কেম্পাছ। সংঘটিত হৈছে শিক্ষাৰ্থীৰ সৈতে দিল্লী আৰক্ষীৰ সংঘৰ্ষ। বাওঁপন্থী সংগঠনৰ ছাত্ৰ-ছাত্ৰীয়ে আৰক্ষীক আক্ৰমণৰ অভিযোগ উত্থাপন হৈছে। ইয়াৰ প্ৰতিক্ৰিয়াত দিল্লীৰ বসন্ত বিহাৰ থানাৰ আৰক্ষীয়ে এই অভিযোগ অস্বীকাৰ কৰিছে। জানিব পৰা মতে, এই ঘটনাত জৱাহৰলাল নেহৰু বিশ্ববিদ্যালয়ৰ ২৮ গৰাকী শিক্ষাৰ্থীক আটক কৰা হৈছে।
বাতৰি অনুসৰি, অখিল ভাৰতীয় বিদ্যাৰ্থী পৰিষদৰ সদস্যসকলৰ বিৰুদ্ধে কোনো ব্যৱস্থা গ্ৰহণ নকৰাত ক্ষুব্ধ বাওঁপন্থী ছাত্ৰ সংগঠনটোৱে কেম্পাছৰ পৰা শোভাযাত্ৰা উলিয়াই থানা ঘেৰাও কৰে। জেএনইউৰ পশ্চিম গেটত বেৰিকেড স্থাপন কৰি আৰক্ষীয়ে তেওঁলোকক বাধা দিবলৈ চেষ্টা কৰাত দুয়োপক্ষৰ মাজত ব্যাপক সংঘৰ্ষৰ সৃষ্টি হয়।
আৰক্ষীয়ে তেওঁলোকক আক্ৰমণ কৰাৰ অভিযোগ উত্থাপন কৰে শিক্ষাৰ্থীসকলে। অৱশ্যে আৰক্ষীয়ে এই দাবী খণ্ডন কৰে। ইয়াৰ বিপৰীতে তেওঁলোকে দাবী কৰে যে এই সংঘৰ্ষত ছয়জন আৰক্ষী জোৱান আহত হয়।
দিল্লী আৰক্ষীৰ সূত্ৰ অনুসৰি গ্ৰেপ্তাৰ হোৱা ছাত্ৰ-ছাত্ৰীৰ ভিতৰত আছে জে এন ইউৰ ছাত্ৰ ইউনিয়নৰ সভাপতি নীতেশ কুমাৰ, উপ-সভাপতি মনীষা আৰু সাধাৰণ সম্পাদক মুন্টিয়া ফাতিমা।
উল্লেখ্য যে শুকুৰবাৰে স্কুল অৱ ছ’চিয়েল ছায়েন্সত এখন সাধাৰণ সভা (জিবিএম)ৰ সময়ত হিংসাত্মক পৰিস্থিতিৰ সৃষ্টি হয়। অভিযোগ দাখিল কৰাৰ পাছতো আৰক্ষীয়ে কোনো ব্যৱস্থা গ্ৰহণ নকৰাৰ অভিযোগ উঠে। ইয়াৰ পিছতে প্ৰতিবাদী সমদলৰ সময়ত আৰক্ষীৰ সৈতে সংঘৰ্ষৰ সৃষ্টি হয়।
বাওঁপন্থী গোটসমূহে দাবী কৰিছে যে এবিভিপিৰ সদস্যসকলে এগৰাকী মহিলা ছাত্ৰীৰ ডিঙি চেপি ধৰে আৰু আন কেইবাগৰাকীকো মাৰপিট কৰে। আনহাতে, এবিভিপিয়েও অভিযোগ কৰিছে যে বাওঁপন্থী ছাত্ৰই এগৰাকী মহিলা ছাত্ৰীক আক্ৰমণ কৰি তাৰ পিছত আন কেইবাগৰাকীকো মাৰপিট কৰে।
এই সন্দৰ্ভত এবিভিপিৰ এক বিবৃতিত কোৱা হৈছে, ‘বাওঁপন্থী শিক্ষাৰ্থীসকলে মিছা কাহিনী প্ৰচাৰ কৰিবলৈ আৰম্ভ কৰিছে, তেওঁলোকৰ চাৰ্ট ফালি পেলাইছে আৰু নিজকে ভুক্তভোগী হিচাপে দেখাবলৈ নাটক কৰিছে।‘ লক্ষনীয় যে অহা মাহত জেএনইউছু-ৰ নিৰ্বাচন অনুষ্ঠিত হ’ব।
