ঝাৰখণ্ডৰ পশ্চিম সিংভূম জিলাৰ চাইবাছা চৰকাৰী চিকিৎসালয়ৰ বিৰুদ্ধে চিকিৎসাৰ গাফিলতি আৰু অৱহেলাৰ অভিযোগ উত্থাপন হৈছে। থেলাছেমিয়াৰ চিকিৎসাৰ বাবে তেজ ল’বলৈ আহি পাঁচটি শিশু এইচ আই ভিত আক্ৰান্ত হয়।
চৰকাৰী চিকিৎসালয়ৰ পৰা তেজ লোৱাৰ পিছতে এইচ আই ভি পজিটিভ পোৱা গৈছে ৭ বছৰীয়া থেলাছেমিয়া শিশুসহ কমেও ৫ জনৰ। এই ঘটনাই ৰাজ্যৰ স্বাস্থ্য বিভাগক কেন্দ্ৰ কৰি ব্যাপক ক্ষোভৰ সৃষ্টি কৰিছে। ইতিমধ্যে ৰাঁচীৰ পৰা এটা উচ্চ পৰ্যায়ৰ চিকিৎসা দলে তদন্ত আৰম্ভ কৰিছে।
শুকুৰবাৰে চাইবাছা সদৰ চিকিৎসালয়ৰ ব্লাড বেংকৰ পৰা এইচ আই ভি সংক্ৰমিত তেজ দিয়া বুলি অভিযোগ উত্থাপন কৰে এটি থেলাছেমিয়া শিশুৰ পৰিয়ালে। ইয়াৰ পিছতহে বিষয়টো পোহৰলৈ আহে।
একে সময়তে চিকিৎসালয়ত তেজ দিয়া শিশুসকলৰ তেজ পৰীক্ষা কৰাৰ সিদ্ধান্ত লোৱা হয়। এই অভিযোগৰ পিছতে ঝাৰখণ্ড চৰকাৰে স্বাস্থ্য সেৱা সঞ্চালক ডাঃ দীনেশ কুমাৰৰ নেতৃত্বত পাঁচজনীয়া চিকিৎসা দল এটাক তদন্তৰ বাবে প্ৰেৰণ কৰে।
প্ৰাৰম্ভিক তদন্তত অধিক ভয়াৱহ পৰিস্থিতিৰ কথা পোহৰলৈ আহিছে। তদন্তৰ সময়ত থেলাছেমিয়াত আক্ৰান্ত আৰু চাৰিটা শিশুৰ তেজ পৰীক্ষাৰ ৰিপৰ্ট পুনৰ এইচ আই ভি পজিটিভ আহিছিল। ইয়াৰ লগে লগে মুঠ আক্ৰান্ত নাবালকৰ সংখ্যা পাঁচজনলৈ বৃদ্ধি পাইছে। সকলো শিশুৱে নিয়মিতভাৱে একেখন চিকিৎসালয়ৰ পৰা তেজ লৈছিল।
ডাঃ দীনেশ কুমাৰে কয় যে প্ৰাৰম্ভিক তদন্তত থেলাছেমিয়া ৰোগীক দূষিত তেজ দিয়া বুলি জানিব পৰা গৈছে। তদন্তৰ সময়ত ব্লাড বেংকত কিছু অমিল পোৱা গৈছে আৰু সংশ্লিষ্ট ভাৰপ্ৰাপ্ত ব্যক্তিসকলক ইয়াৰ তদন্ত কৰিবলৈ নিৰ্দেশ দিয়া হৈছে।
এই তদন্তৰ বাবেই চাইবাছা চিকিৎসালয়ৰ ব্লাড বেংকক আপাততঃ জৰুৰীকালীন অপাৰেচন মোডত ৰখা হৈছে আৰু আগন্তুক কেইদিনমানৰ বাবে তাত কেৱল গুৰুতৰ ৰোগীকহে চিকিৎসা কৰা হ’ব বুলি জনোৱা হৈছে।
এই দূষিত তেজ কেনেদৰে শিশুকেইটিৰ শৰীৰত সোমাল সেই তদন্ত অব্যাহত ৰাখিছে চিকিৎসা দলটোৱে। কুমাৰৰ নেতৃত্বত তদন্তকাৰী দলটোত আছে ডাঃ শিপ্ৰা দাস, ডাঃ এছ এছ পাছোৱান, ডাঃ ভগত, জিলা অসামৰিক অস্ত্ৰোপচাৰ বিশেষজ্ঞ ডাঃ সুশান্ত মাঝি, ডাঃ শিৱচৰণ হান্সদা আৰু ডাঃ মিনু কুমাৰী।
প্ৰথমটো এইচ আই ভি পজিটিভ শিশু ব্লাড বেংকলৈ অহাৰ পিছত তাৰ পৰা ২৫ ইউনিট ৰক্ত দান কৰা হৈছিল। জিলা অসামৰিক অস্ত্ৰোপচাৰ বিশেষজ্ঞ ডাঃ সুশান্ত মাঝিয়ে জনোৱা মতে, এসপ্তাহ পূৰ্বে শিশুটিৰ এইচ আই ভি পজিটিভ ধৰা পৰিছিল। এইচ আই ভি সংক্ৰমণ কেৱল তেজৰ দ্বাৰাই নহয়, দূষিত বেজীৰ সংস্পৰ্শ আৰু অন্যান্য কাৰণতো হ’ব পাৰে।
মন কৰিবলগীয়া যে বৰ্তমান পশ্চিম সিংভূম জিলাত এইচ আই ভি পজিটিভ ৫১৫ জন আৰু ৫৬ জন থেলাছেমিয়া ৰোগী আছে।
