কৰ্ণাটকৰ মন্ত্ৰী তথা কংগ্ৰেছ নেতা প্ৰিয়াংক খাৰ্গেক তীব্ৰ আক্ৰমণ মুখ্যমন্ত্ৰী হিমন্ত বিশ্ব শৰ্মাৰ।
উল্লেখ্য যে ইয়াৰ পূৰ্বে কৰ্ণাটকৰ মন্ত্ৰীগৰাকীয়ে কৈছিল যে অসমত উদ্যোগ প্ৰতিষ্ঠা কৰিবলৈ প্ৰতিভাৱান আৰু সক্ষম লোকৰ অভাৱ।
খাৰ্গেৰ এই মন্তব্যই ৰাজ্যজুৰি ক্ষোভৰ সৃষ্টি কৰে। সমান্তৰালকৈ মুখ্যমন্ত্ৰী হিমন্ত বিশ্ব শৰ্মাই এই মন্তব্যৰ বাবে খাৰ্গেক প্ৰথম শ্ৰেণীৰ বুৰ্বক বুলি অভিহিত কৰে।
মুখ্যমন্ত্ৰীগৰাকীয়ে কয়, “প্ৰিয়াংক খাৰ্গেই অসমীয়া যুৱক-যুৱতীক অপমান কৰিছে, আৰু কংগ্ৰেছে এতিয়াও এই কথাৰ গৰিহণা দিয়া নাই। হয়তো, আমি তেওঁৰ বিৰুদ্ধে গোচৰ ৰুজু কৰিব পাৰো কাৰণ তেওঁ কৈছে যে অসমত শিক্ষিত যুৱক-যুৱতী নাই। এয়া অসমৰ সকলো যুৱক-যুৱতীক প্ৰতি অপমান। এনে মন্তব্যই অসমৰ সামৰ্থ্যক লৈ কংগ্ৰেছ দলৰ অজ্ঞানতাক প্ৰতিফলিত কৰে।”
ইয়াৰ পূৰ্বে বিজেপিৰ ৰাজ্যিক মুখ্য কাৰ্যালয় বাজপেয়ী ভৱনত সংবাদমেল সম্বোধন কৰি দলৰ মুখপাত্ৰ জয়ন্ত কুমাৰ গোস্বামীয়ে কয় যে খাৰ্গেৰ এই মন্তব্যই অসমীয়া আৱেগক গভীৰভাৱে আঘাত কৰিছে।
গোস্বামীয়ে খাৰ্গেৰ মন্তব্যৰ বিৰোধিতা কৰি সাহস দেখুৱাবলৈ অসম প্ৰদেশ কংগ্ৰেছ কমিটীৰ সভাপতি গৌৰৱ গগৈক প্ৰত্যাহ্বান জনায়।
অসমক কংগ্ৰেছে বাৰে বাৰে অৱহেলা কৰা বুলি অভিহিত কৰি গোস্বামীয়ে কয়, “অসম আৰু উত্তৰ-পূর্বাঞ্চলক অপমান কৰাৰ কংগ্রেছ দলৰ এক দীঘলীয়া ইতিহাস আছে৷ ১৯৭১ চনৰ বাংলাদেশ মুক্তি যুদ্ধৰ সময়ত ইন্দিৰা গান্ধীয়ে লোৱা সিদ্ধান্তৰ বাবে ৰাজ্যখনলৈ ৪০ লাখ অবৈধ প্ৰব্ৰজনকাৰীৰ আগমন ঘটিছিল।”
