পেহেলগামত সংঘটিত সন্ত্ৰাসবাদী আক্ৰমণ আৰু ইয়াৰ প্ৰত্যুত্তৰত ভাৰতৰ অপাৰেচন সিন্দুৰৰ পিছতে ভাৰত-পাকিস্তানৰ সম্পৰ্ক অস্থিৰ। ক্ৰীড়াজগতটো এই উত্তেজনা বিয়পি পৰিছে। এই পৰিবেশত পাকিস্তানে প্ৰায় ২১০০ শিখক ভিছা প্ৰদান কৰিছে। দিল্লীত পাকিস্তান উচ্চায়ুক্তই এই খবৰ দিছে।
অহা মাহৰ পৰা আৰম্ভ হৈছে গুৰু নানক জয়ন্তী। জানিব পৰা মতে, এই ধৰ্মীয় অনুষ্ঠানত অংশগ্ৰহণ কৰিবলৈ প্ৰায় ২১০০ ভাৰতীয় শিখক পাকিস্তানলৈ ভিছা প্ৰদান কৰা হৈছে। নিজৰ এক্স হেণ্ডেলত পাকিস্তান উচ্চায়ুক্তৰ এটা পোষ্টত কয় যে, ‘নতুন দিল্লীত থকা পাকিস্তান উচ্চায়ুক্তই বাবা গুৰু নানক দেৱৰ জন্ম জয়ন্তী উদযাপনৰ বাবে ভাৰতৰ পৰা অহা ২১০০ৰো অধিক শিখ তীৰ্থযাত্ৰীক ভিছা প্ৰদান কৰিছে।’
প্ৰতিবছৰে নানক জয়ন্তীত ভাৰতৰ পৰা এটা প্ৰতিনিধি দল পাকিস্তানৰ শিখ ধৰ্মীয় স্থানসমূহ পৰিদৰ্শন কৰে। ভাৰত চৰকাৰে চলিত মাহৰ আৰম্ভণিতে এই শিখ ‘জাথা’সকলক পাকিস্তানলৈ যাবলৈ অনুমতি দিছিল। দিল্লীৰ মন্ত্ৰী মঞ্জিন্দৰ সিং ছিৰছাই এই সিদ্ধান্তক আদৰণি জনায়। দ্বিপাক্ষিক সম্পৰ্কত অসুবিধা হৈ থকাৰ পাছতো এই ভ্ৰমণৰ সুবিধা প্ৰদানৰ বাবে প্ৰধানমন্ত্ৰী আৰু গৃহমন্ত্ৰীলৈ কৃতজ্ঞতা প্ৰকাশ কৰে।
শেহতীয়া বছৰবোৰত কৰতাৰপুৰ কৰিডৰ ধৰ্মীয় আদান-প্ৰদানৰ এক গুৰুত্বপূৰ্ণ অংশত পৰিণত হৈছে। দুহেজাৰ উনৈশ চনত কৰতাৰপুৰ চাহাবলৈ শিখ তীৰ্থযাত্ৰীসকলৰ বাবে ভিছাবিহীন যাত্ৰা সম্ভৱ হৈ উঠাৰ বিপৰীতে বৃহৎ গোটসমূহে স্বাভাৱিক প্ৰট’কলৰ সৈতে যাত্ৰা কৰে। এইবাৰ ভাৰতে ভক্তৰ মসৃণ গতিবিধি নিশ্চিত কৰিবলৈ অতিৰিক্ত সাৱধানতা অৱলম্বন কৰিছে। ভাৰত আৰু পাকিস্তান দুয়োখন চৰকাৰে আগন্তুক তীৰ্থযাত্ৰাৰ নিৰাপত্তাৰ ব্যৱস্থাৰ ওপৰত তীক্ষ্ণ দৃষ্টি ৰাখিছে।
