বীৰ লাচিত সেনাৰ বহিষ্কৃত নেতা বিকাশ অসমৰ বিৰুদ্ধে গুৱাহাটীৰ দিছপুৰ থানাত ধন দাবীৰ আন এক গুৰুতৰ অভিযোগ ৰুজু হৈছে। এইবাৰ দীপাৱলীৰ সময়ত ফাঁচীবজাৰৰ ফটকা ব্যৱসায়ীৰ পৰা বৃহৎ পৰিমাণৰ ধন দাবী কৰাৰ অভিযোগ উত্থাপন হৈছে।
বিকাশ অসমে ১ নৱেম্বৰ, শনিবাৰে শিল্পী জুবিন গাৰ্গৰ ছবি ‘ৰৈ ৰৈ বিনালে’ উপভোগ কৰি দিছপুৰ থানাত আত্মসমৰ্পণ কৰাৰ পিছত আৰক্ষীয়ে তেওঁক পূৰ্বৰ ৰাহুল মিশ্ৰ অপহৰণ সম্পৰ্কীয় ৮৭৫/২৫ নম্বৰৰ গোচৰত গ্ৰেপ্তাৰ কৰিছিল। ইয়াৰ পিছতে আৰক্ষীৰ তদন্তত তেওঁৰ বিৰুদ্ধে আন এক কু-কীৰ্তি পোহৰলৈ আহে।
উপ আৰক্ষী আয়ুক্ত (DCP) মৃণাল ডেকাই সংবাদ মাধ্যমক জনোৱা অনুসৰি, গ্ৰেপ্তাৰৰ পাছত ফটকা ব্যৱসায়ী জিতেন্দ্ৰ শালৈ, বিকি ৰয়, আৰু মিথুন কোঁৱৰে বিকাশ অসমৰ বিৰুদ্ধে নতুনকৈ এজাহাৰ দাখিল কৰে।
ব্যৱসায়ীসকলে অভিযোগ কৰে যে দীপাৱলীৰ সময়ত বিকাশ অসমে তেওঁলোকৰ ফটকা বিক্ৰীত প্ৰথমে বাধা দিছিল, আৰু পিছত সেই বাধা নিদিয়াৰ বাবদ তেওঁলোকৰ পৰা ৪ৰ পৰা ৫ লাখ টকা দাবী কৰিছিল।
মৃণাল ডেকাই সংবাদ মাধ্যমৰ আগত কয়, “তেওঁলোকে জনোৱা অনুসৰি মহানগৰীৰ এখন আগশাৰীৰ হোটেলত বিকাশ অসমে ডেৰ লাখ টকা লৈছিল। এই নতুন এজাহাৰৰ ভিত্তিত বিকাশ অসমৰ বিৰুদ্ধে ৮৮৩/২৫ নম্বৰৰ এক নতুন গোচৰ ৰুজু কৰা হৈছে।”
ইফালে, ৰাহুল মিশ্ৰক অপহৰণৰ গোচৰত আৰক্ষীয়ে বিকাশ অসমক কামৰূপ মুখ্য ন্যায়িক দণ্ডাধীশৰ আদালতত হাজিৰ কৰাই ১০ দিনৰ জিম্মা বিচাৰিছিল। অৱশ্যে, আদালতে বিকাশ অসমক তিনি দিনৰ আৰক্ষী জিম্মালৈ প্ৰেৰণ কৰে।
উল্লেখ্য যে কিছুদিন পূৰ্বে এক ধন দাবীৰ গোচৰত বীৰ লাচিত সেনাৰ কেইবাজনো সদস্যক গ্ৰেপ্তাৰ কৰা হৈছিল আৰু বিকাশ অসমৰ স্বাক্ষৰ থকা এক ধনদাবী পত্ৰও আৰক্ষীয়ে জব্দ কৰিছিল। ইয়াৰ পিছৰে পৰা আৰক্ষীয়ে তেওঁক বিচাৰি আছিল আৰু অৱশেষত শনিবাৰে তেওঁ আত্মসমৰ্পণ কৰিছিল।
