সোমবাৰে তেলেংগানাৰ ৰঙ্গাৰেড্ডী জিলাত এক ভয়ংকৰ পথ দুৰ্ঘটনাত শিশুসহ ২১ জন লোক নিহত হোৱাৰ লগতে কেইবাজনো লোক গুৰুতৰভাৱে আহত হয়। তাণ্ডুৰ ডিপোৰ এখন আৰ টি চি (RTC) বাছৰ সৈতে শিলগুটি ভৰ্তি এখন টিপাৰ ট্ৰাকৰ সংঘৰ্ষৰ ফলত এই শোকাৱহ দুৰ্ঘটনাটো সংঘটিত হয়।
নিহতসকলৰ ভিতৰত আছে ১০ জন পুৰুষ, ৯ গৰাকী মহিলা আৰু এটি শিশু।
আৰ টি চি বাছখন তাণ্ডুৰৰ পৰা হায়দৰাবাদ অভিমুখে গৈ আছিল। ৰঙ্গাৰেড্ডী জিলাৰ চেভেলা সংমণ্ডলৰ মিৰ্জাগুডাৰ সমীপত এই দুৰ্ঘটনাটো ঘটে। বাছখনত প্ৰায় ৭০ জন যাত্ৰী আছিল, যাৰ অধিকাংশই আছিল ছাত্ৰ-ছাত্ৰী আৰু কৰ্মচাৰী। জানিব পৰা মতে, তেওঁলোকে দেওবাৰৰ বন্ধৰ পাছত হায়দৰাবাদস্থিত নিজৰ শিক্ষানুষ্ঠান বা কৰ্মস্থানলৈ উভতি গৈ আছিল।
সংঘৰ্ষৰ ফলত ট্ৰাকখনৰ শিলগুটিৰ বোজা বাছখনৰ ওপৰত বাগৰি পৰে, যাৰ বাবে কেইবাজনো যাত্ৰী বাছৰ ভিতৰতে আবদ্ধ হৈ পৰে। ঘটনাস্থলীত আৰক্ষী আৰু প্ৰশাসনৰ লোক উপস্থিত হৈ জে চি বিৰ সহায়ত উদ্ধাৰ অভিযান চলায়।
আৰক্ষীয়ে বাছ কণ্ডাক্টৰ ৰাধাকে ধৰি কেইবাজনো যাত্ৰীক উদ্ধাৰ কৰে। উদ্ধাৰ অভিযানৰ সময়ত চেভেলা আৰক্ষী আয়ুক্ত ভূপাল শ্ৰীধৰৰ বাওঁ ভৰিত জে চি বি পাৰ হৈ যোৱাত তেওঁ আঘাতপ্ৰাপ্ত হয় আৰু তেওঁক হাস্পতাললৈ প্ৰেৰণ কৰা হয়।
তেলেংগানাৰ মুখ্যমন্ত্ৰী ৰেৱন্ত ৰেড্ডীয়ে এই ভয়াবহ দুৰ্ঘটনাক লৈ গভীৰ শোক প্ৰকাশ কৰে। তেওঁ বিষয়াসকলক তৎকালীনভাৱে ঘটনাস্থলীত উপস্থিত হৈ যুদ্ধকালীন তত্পৰতাৰে সাহায্য আৰু উদ্ধাৰ অভিযান চলাই আহতসকলক হায়দৰাবাদলৈ স্থানান্তৰ কৰি উন্নত চিকিৎসাৰ ব্যৱস্থা কৰিবলৈ নিৰ্দেশ দিয়ে।
ইফালে, প্ৰধানমন্ত্ৰী নৰেন্দ্ৰ মোদীয়েও দুৰ্ঘটনাটোত প্ৰাণ হেৰুওৱা লোকৰ পৰিয়াললৈ গভীৰ শোক ব্যক্ত কৰে আৰু প্ৰধানমন্ত্ৰীৰ ৰাষ্ট্ৰীয় সাহায্য পুঁজি (PMNRF) ৰ পৰা এককালীন সাহাৰ্য ঘোষণা কৰে মৃতকৰ পৰিয়াললৈ ২ লাখ টকা আৰু আহতসকললৈ ৫০ হাজাৰ টকা ঘোষণা কৰা হয়।
