মঙলবাৰে বিয়লি প্ৰায় ৫:১৫ বজাত আমেৰিকাৰ কেণ্টাকিৰ লুইছভিল মহম্মদ আলী আন্তঃৰাষ্ট্ৰীয় বিমানবন্দৰৰ পৰা উৰণৰ কিছু সময়ৰ পিছতে এখন ইউ পি এছ কাৰ্গো বিমান (UPS Flight 2976) দুৰ্ঘটনাত পতিত হয় আৰু ভয়ংকৰ অগ্নিকাণ্ডৰ সূত্ৰপাত হয়।
বিমান কৰ্তৃপক্ষই জনোৱা মতে, এই দুৰ্ঘটনাত কমেও সাতজন লোকৰ মৃত্যু হোৱাৰ লগতে ১১ জন লোক আহত হয়। মৃতকৰ সংখ্যা বৃদ্ধি পোৱাৰো আশংকা কৰা হৈছে।
জানিব পৰা মতে, মেকডনেল ডগলাছ এম ডি-১১ (McDonnell Douglas MD-11) বিমানখন হোনোলুলুৰ ডেনিয়েল কে ইনোৱে আন্তঃৰাষ্ট্ৰীয় বিমানবন্দৰলৈ গৈ আছিল। ফেডাৰেল এভিয়েশ্যন প্ৰশাসন (FAA)-এ টুইটযোগে নিশ্চিত কৰিছে যে বিমানখন উৰণৰ পিছতে তললৈ নামি আহি এটা অট্টালিকাত খুন্দা মাৰে আৰু বিশাল অগ্নিকুণ্ডত পৰিণত হয়। দুৰ্ঘটনাৰ ফলত সমগ্ৰ অঞ্চলটো ক’লা ধোঁৱাৰ কুণ্ডলীৰে আবৰি ধৰে।
লুইছভিল মেট্ৰ’ আৰক্ষী বিভাগে ঘটনাৰ বিষয়ে জনাই হতাহত হোৱাৰ খবৰ নিশ্চিত কৰিছে। আৰক্ষীয়ে বিমানবন্দৰৰ পৰা ৫ মাইল (৮ কিলোমিটাৰ) ব্যাসাৰ্ধৰ ভিতৰত খালী কৰাৰ নিৰ্দেশ জাৰি কৰিছে।
ফেডাৰেল এভিয়েশ্যন প্ৰশাসন (FAA) আৰু ৰাষ্ট্ৰীয় পৰিবহণ সুৰক্ষা ব’ৰ্ডে (NTSB) ঘটনাৰ তদন্ত কৰিব। NTSB-এ তদন্তৰ নেতৃত্ব দিবলৈ বিষয়াক দুৰ্ঘটনাস্থলীলৈ প্ৰেৰণ কৰিছে আৰু সকলো শেহতীয়া তথ্য প্ৰদান কৰিব।
আমেৰিকাৰ পৰিবহণ সচিব শ্বেন ডাফীয়ে ঘটনাটোত শোক প্ৰকাশ কৰিছে আৰু ক্ষতিগ্ৰস্ত লুইছভিল সম্প্ৰদায় তথা ক্ৰুৰ বাবে প্ৰাৰ্থনা জনাইছে। তেওঁ লগতে জনায় যে FAA আৰু NTSB-ৰ দলে তদন্তৰ কাম আৰম্ভ কৰিছে।
বৰ্তমান দুৰ্ঘটনাৰ কাৰণ সন্দৰ্ভত কোনো তাৎক্ষণিক তথ্য প্ৰকাশ কৰা হোৱা নাই আৰু জৰুৰীকালীন ক্ৰু স্থানত উপস্থিত আছে।
