প্ৰথম ৰাউণ্ডত কোনো প্ৰাৰ্থীয়ে ৫০ শতাংশতকৈ অধিক ভোট লাভ নকৰাত চিলিৰ ৰাষ্ট্ৰপতি নিৰ্বাচনে দ্বিতীয় ৰাউণ্ড (ৰাণ অফ)ত প্ৰৱেশ কৰিছে। অহা ডিচেম্বৰ মাহত অনুষ্ঠিত হ’ব দ্বিতীয় ৰাউণ্ডৰ ভোটগ্ৰহণ।
দেওবাৰে প্ৰথম ৰাউণ্ডৰ ভোটগ্ৰহণ অনুষ্ঠিত হয়। প্ৰায় ৮৩ শতাংশ ভোট গণনা কৰাৰ পিছত দেখা গ’ল বাওঁপন্থী মিত্ৰজোঁটৰ প্ৰাৰ্থী জেনেট জাৰাই ২৬.৭১ শতাংশ ভোট লাভ কৰে। তেওঁৰ পিছত উগ্ৰ সোঁপন্থী ৰক্ষণশীল নেতা জোচে এণ্টনিঅ’ কাষ্টাই ২৪.১২ শতাংশ ভোট লাভ কৰে। দ্বিতীয় ৰাউণ্ডৰ ভোটগ্ৰহণত তেওঁলোক দুজনে মুখামুখি হ’ব।
এই বছৰৰ নিৰ্বাচনৰ আশে-পাশে চিলিত হত্যা, অপহৰণ আৰু ধন দাবীৰ দৰে হিংসাত্মক অপৰাধ বহু পৰিমাণে বৃদ্ধি পাইছে। ইয়াৰ ফলত জনসাধাৰণৰ মাজত গভীৰ আতংকৰ সৃষ্টি হৈছে। বেছিভাগ ক্ষেত্ৰতে এই অপৰাধৰ দায়িত্ব বিদেশী অপৰাধী চক্ৰৰ ওপৰত ন্যস্ত কৰা হৈছে।
৫৯ বছৰীয়া কেষ্টে ভেনিজুৱেলাৰ দৰে উত্তৰাঞ্চলৰ দৰিদ্ৰ দেশৰ পৰা অহা প্ৰব্ৰজনকাৰীক ৰুধিবলৈ চিলি-বলিভিয়া সীমান্তত দেৱাল, বেৰ আৰু খাদ নিৰ্মাণ কৰাৰ প্ৰতিশ্ৰুতি দিছে।
আনহাতে, ৫১ বছৰীয়া জাৰা বিদায়ী মধ্য বাওঁপন্থী ৰাষ্ট্ৰপতি গেব্ৰিয়েল বৰিকৰ অধীনত শ্ৰম মন্ত্ৰী আছিল। তেওঁ দেশৰ আইন-শৃংখলা উন্নত কৰাৰ বাবে আৰু অধিক আৰক্ষী নিযুক্তি, সংঘটিত অপৰাধৰ বিৰুদ্ধে যুঁজিবলৈ বেংকিং ক্ষেত্ৰত গোপনীয়তা উঠাই দিয়া আৰু জীৱন-যাপনৰ খৰচৰ সমস্যা সমাধানৰ প্ৰতিশ্ৰুতি দিছে।
