পশ্চিমবংগ আৰু তামিলনাডুৰ পিছত এতিয়া কেৰালায়ো নিৰ্বাচনী তালিকাৰ বিশেষ নিবিড় সংশোধন (Special Intensive Revision – SIR) প্ৰক্ৰিয়া স্থগিত ৰাখিবলৈ উচ্চতম ন্যায়ালয়ৰ কাষ চাপিছে। কেৰালা চৰকাৰে দাবী কৰিছে যে আহি থকা পৌৰসভা আৰু পঞ্চায়ত নিৰ্বাচনৰ কাৰণে এছআইআৰ প্ৰক্ৰিয়া পিছুৱাই নিনিলে প্ৰশাসনিক জটিলতা উৎপন্ন হ’ব।
কেৰালাত অহা ৯ আৰু ১১ ডিচেম্বৰত পৌৰসভা আৰু পঞ্চায়ত নিৰ্বাচন হ‘ব। ভোটগণনা ১২ ডিচেম্বৰত, আৰু সমগ্ৰ প্ৰক্ৰিয়া ১৮ ডিচেম্বৰত সম্পন্ন হ’ব। কেৰালা চৰকাৰে উচ্চতম ন্যায়ালয়ত দাখিল কৰা আবেদনত উল্লেখ কৰিছে যে একেলগে এছআইআৰ আৰু নিৰ্বাচন প্ৰক্ৰিয়া চলাই নিলে আৰক্ষী, প্ৰশাসন আৰু ব্যৱস্থাপনা সকলোৰে ওপৰত গভীৰভাৱে প্ৰভাৱ পৰিব।
আইনী বাতৰি ৱেবছাইট লাইভ ল’ (Live Law)-ৰ উদ্ধৃতি দি কেৰালা চৰকাৰে কয় যে স্থানীয় নিৰ্বাচন পৰিচালনাৰ বাবে ৬৮ হাজাৰ নিৰাপত্তাৰক্ষী আৰু ১.৭৬ লাখ জোৱানৰ প্ৰয়োজন। আৰু এছআইআৰ প্ৰক্ৰিয়াৰ বাবে অতিৰিক্ত ২৫,৬৬৮ জন কৰ্মচাৰী লাগে।
এই দুয়োটা কাম একেলগে চলাই যাবলৈ হ’লে প্ৰশাসন “অচল” হৈ পৰিব বুলি কেৰালা চৰকাৰে জনাইছে। ৫ নৱেম্বৰত মুখ্য নিৰ্বাচন আয়ুক্তলৈ লিখা পত্ৰতো কোনো সঁহাৰি নোপোৱাৰ বাবে তেওঁলোকে উচ্চতম ন্যায়ালয়ত আবেদন কৰিবলৈ বাধ্য হৈছে।
ইতিমধ্যে পশ্চিমবংগ আৰু তামিলনাডু চৰকাৰে এছআইআৰ প্ৰক্ৰিয়াক উচ্চতম ন্যায়ালয়ত প্ৰত্যাহ্বান জনাইছে। এতিয়া কেৰালা সেই শাৰীত যোগ দিলে। আইনী বাতৰি ৱেবছাইট বাৰ এণ্ড বেঞ্চ (Bar and Bench)-ৰ মতে, কেৰালাই ভবিষ্যতে এছআইআৰ প্ৰক্ৰিয়াক সম্পূৰ্ণৰূপে প্ৰত্যাহ্বান জনাই বৃহত্তৰ গোচৰ দাখিল কৰিবও পাৰে। চৰকাৰখনৰ আপাতত লক্ষ্য হৈছে আহি থকা নিৰ্বাচন সম্পন্ন নোহোৱা পৰ্যন্ত এছআইআৰ প্ৰক্ৰিয়া স্থগিত ৰখা।
