অসমৰ বিৰোধী ঐক্যলৈ এক বিশেষ আহ্বান জনাইছে অসম নাগৰিক সন্মিলনে।অসম নাগৰিক সন্মিলনৰ হৈ হীৰেন গোহাঁই, হৰেকৃষ্ণ ডেকা, অজিত কুমাৰ ভূঞা, পৰেশ মালাকাৰ, আব্দুল মান্নান, শান্তনু বৰঠাকুৰ এক বিবৃতিযোগে কয় যে ‘মাত্ৰ কেইদিনমান আগতে আমি অসমৰ সকলো বিৰোধী একলগ হোৱা কাৰণে তেওঁলোকক অভিনন্দন জনাইছিলোঁ। তেওঁলোক ১২ তাৰিখে লগ লাগিছিলহে। মাত্ৰ দুদিন কি তিনিদিনৰ পিছতে তেওঁলোকৰ মাজত সামঞ্জস্যহীন কথা-বতৰা আৰম্ভ হৈ গ’ল।’
বিবৃতিটোত লগতে কয় যে ‘হাৰিয়ানা, মহাৰাষ্ট্ৰৰ পিছত বিহাৰ নিৰ্বাচনে আমাৰ চকুত আঙুলি থৈ দেখুৱাই দিলে যে তিনিটা শক্তিৰে বলীয়ান হৈ বিজেপিয়ে এটাৰ পিছত এটাকৈ নিৰ্বাচন জিকি আছে। এই তিনিটা হৈছে— ৰাষ্ট্ৰযন্ত্ৰ, চৰকাৰী ধন আৰু নিৰ্বাচনী কাৰচাজি। মনত ৰাখিব, এই তিনিওখন ৰাজ্যতে নিৰ্বাচনৰ আগতে ক্ষমতাত আছিল বিজেপি। অসমতো ক্ষমতাত বিজেপি। তাতে এতিয়া অসমতো নিৰ্বাচনী আয়োগে এক ধৰণৰ এচ. আই. আৰ. কৰিবলৈ ওলাইছে।তেনে অৱস্থাত বিৰোধীৰ কৰ্তব্য আছিল দেৱালৰ লিখন পঢ়ি সকলো ঐক্যবদ্ধ হৈ ৰাইজৰ ওচৰলৈ যোৱা। নিৰন্তৰ ৰাইজক সংগঠিত কৰা। তাৰ বিপৰীতে আমি বিৰোধীৰ মাজত দেখিছোঁ বেসুৰা কথা-বতৰা। সিদিনা, অৰ্থাৎ ১২ নৱেম্বৰৰ দিনা দীঘলীয়া আলোচনাৰ অন্তত সকলোৱে যদি গৌৰৱ গগৈক বিৰোধীৰ মাজত সমন্বয়ৰ দায়িত্ব দিছিল, তেন্তে অখিল গগৈ ডাঙৰীয়াই অন্য দল কেইটাৰ লগত আলোচনা নকৰাকৈ দিল্লীলৈ গৈ এইবোৰ কি কথা ক’বলৈ আৰম্ভ কৰিলে? যি কোনো ঐক্য মঞ্চৰে বুনিয়াদী নীতি হ’ল আভ্যন্তৰীণ সমস্যা ৰাজহুৱা নকৰাকৈ আলোচনাৰ যোগেদি নিষ্পত্তি কৰা।’
অসম নাগৰিক সন্মিলনৰ হৈ হীৰেন গোহাঁই, হৰেকৃষ্ণ ডেকা, অজিত কুমাৰ ভূঞা, পৰেশ মালাকাৰ, আব্দুল মান্নান, শান্তনু বৰঠাকুৰে কয় যে সকলো লগ লাগি ৰাইজৰ ওচৰলৈ যোৱাৰ সলনি এইদৰে ক্ৰিয়া-প্ৰতিক্ৰিয়া প্ৰকাশ কৰি নিজৰ মাজত খামখেয়ালী কৰি থাকিলে অহা নিৰ্বাচনত বিজেপি জয়ী হোৱাটো নিশ্চিত। তেতিয়া অসমে আৰু পাঁচ বছৰলৈ বিনাই থাকিব লাগিব। বোধহয় তেতিয়া বিৰোধী ৰাজনৈতিক দলবোৰ আমাৰ কাৰণে অপ্ৰাসংগিক হৈ পৰিব। বিৰোধী দলবোৰে এটা কথা গভীৰভাৱে উপলব্ধি কৰা উচিত যে বিজেপিয়ে আৰম্ভ কৰা ভোট কিনা, ভোট চুৰিৰ ৰাজনীতিত তেওঁলোকে যদি কেৱল গাণিতিক হিচাপ-নিকাচেৰে নিৰ্বাচন জিকিম বুলি ভাবিছে, তেওঁলোক মূৰ্খৰ স্বৰ্গত বাস কৰিছে। আৰু এটা কথা— আমি অসম নাগৰিক সন্মিলনৰ এই ছজন লোকে প্ৰায় যোৱা ছমাহে বিৰোধী ৰাজনৈতিক দলৰ দুৱাৰে দুৱাৰে ঘূৰি ঘূৰি বিজেপিৰ কুশাসনৰ বাবে তেওঁলোকক ঐক্যবদ্ধ হোৱাৰ বাবে অহোপুৰুষাৰ্থ কৰি আছিলোঁ। কিন্তু এবাৰ কি দুবাৰত বাহিৰে অনবৰতে প্ৰচাৰ মাধ্যমৰ আগত আমি সেইবোৰ গাই বাই থকা নাছিলোঁ। প্ৰচাৰ মাধ্যমৰ মাইকৰ আগত বিৰোধী ঐক্য গঢ়াটো অসম্ভৱ। দলীয় সংকীৰ্ণতা নহয় জনগণৰ স্বাৰ্থহে বিৰোধী ঐক্যৰ চালিকা শক্তি হ’ব লাগিব। পৰিতাপৰ কথা যে সেইটো এতিয়ালৈ হৈ উঠা নাই।
