প্ৰাণৰ শিল্পী জুবিন গাৰ্গ কায়িকভাৱে আমাৰ মাজৰ পৰা আঁতৰি যোৱা দুমাহ সম্পূৰ্ণ হ’ল যদিও অসমীয়াৰ হৃদয়ত তেওঁ চিৰজীৱিত। জুবিন অবিহনেও অসমবাসীয়ে তেওঁৰ জন্মদিন পালন কৰিলে, আৰু প্ৰতিটো ক্ষণতে উপলব্ধি কৰিলে যে জুবিন তেওঁলোকৰ বাবে কি আছিল—তেওঁ অবিহনে সমগ্ৰ অসম যেন উকা আৰু আধৰুৱা। তেওঁৰ অনুপস্থিতি কঠিন যদিও তেওঁৰ সংগীত আৰু আদৰ্শ চিৰকাল অসমীয়াৰ তেজে তেজে প্ৰবাহিত হৈ থাকিব।
১৮ নৱেম্বৰত অসমবাসীয়ে দুখৰ মাজতো জুবিনবিহীন প্ৰথমটো জন্মদিন পালন কৰিলে। শদিয়াৰ পৰা ধুবুৰীলৈকে অনুৰাগীসকলে বিভিন্ন কাৰ্যসূচীৰে, যেনে কেক কাটি আৰু জুবিনৰ প্ৰিয় নাহৰৰ পুলি ৰোপণ কৰি, এইগৰাকী মহান শিল্পীৰ প্ৰতি শ্ৰদ্ধা জ্ঞাপন কৰে।
জুবিনৰ জন্মদিনটোতে ভাৰতীয় ডাক বিভাগে এক গুৰুত্বপূৰ্ণ পদক্ষেপ গ্ৰহণ কৰি অসমৰ এইগৰাকী কিংবদন্তি শিল্পীৰ ৫৩সংখ্যক জন্মদিনত তেওঁৰ প্ৰতিচ্ছবিৰে এখন বিশেষ স্মৃতি পোষ্ট কাৰ্ড মুকলি কৰে। বুধবাৰে হাউলী ৰাস মহোৎসৱত আনুষ্ঠানিকভাৱে এই স্মৃতি পোষ্ট কাৰ্ডখন উন্মোচন কৰা হয়।
অসম ডাক চক্ৰৰ মুখ্য পোষ্ট মাষ্টাৰ জেনেৰেল কৰ্ণেল অৰবিন্দ বাৰ্মাৰ নেতৃত্বত এই পোষ্ট কাৰ্ডখন মুকলি কৰা হয়। তেওঁক সহযোগ কৰে হাউলী ৰাস মহোৎসৱ উদযাপন সমিতিৰ সভাপতি হেমেন দাস আৰু বি এইচ কলেজৰ অধ্যক্ষ তথা বিশিষ্ট লেখক ড০ ভূষণ চন্দ্ৰ পাঠকে।
জুবিন গাৰ্গৰ সন্মানাৰ্থে পোষ্ট কাৰ্ড মুকলি কৰি কৰ্ণেল বাৰ্মাই কয় যে এই স্মৃতি পোষ্ট কাৰ্ডখন জুবিন গাৰ্গৰ প্ৰতি এক আন্তৰিক শ্ৰদ্ধাঞ্জলি, যিগৰাকী শিল্পীয় প্ৰজন্মৰ পিছত প্ৰজন্মক প্ৰভাৱিত কৰিছে। জুবিন গাৰ্গক অসমৰ ‘আইকন’বুলি অভিহিত কৰি তেওঁ কয় যে ডাক বিভাগে তেওঁৰ জীৱন আৰু লিগেচী উদযাপন কৰি এই পোষ্ট কাৰ্ডখন মুকলি কৰাটো এক সন্মানৰ কথা।
কৰ্ণেল বাৰ্মাই লগতে আশা প্ৰকাশ কৰে যে জুবিন গাৰ্গৰ মূল্যবোধ, বিশেষকৈ তেওঁৰ মমতা আৰু দয়াশীলতাই অগণন লোকক অনুপ্ৰাণিত কৰি আহিছে আৰু এই পোষ্ট কাৰ্ডখনে তেওঁৰ আদৰ্শসমূহক আগুৱাই নিয়াত সহায় কৰাৰ লগতে তেওঁৰ আভা সমগ্ৰ ভাৰতত আৰু ভাৰতৰ বাহিৰৰ লোকসকলৰ মাজলৈও লৈ যাব। তেওঁ লগতে কয় যে এই পদক্ষেপৰ জৰিয়তে জুবিনৰ বাৰ্তা আৰু সংগীতৰ লিগেচী বিশ্বজুৰি প্ৰতিধ্বনিত হ’ব।
হাউলী ৰাস মহোৎসৱত এই বিশেষ পোষ্ট কাৰ্ডখন মুকলি অনুষ্ঠানে মহোৎসৱখনক এক বিশেষ সাংস্কৃতিক মাত্ৰা প্ৰদান কৰাৰ লগতে হাৰ্টথ্ৰ’বগৰাকীলৈ এক মৰ্মস্পৰ্শী শ্ৰদ্ধাঞ্জলি জ্ঞাপন কৰে।
