ঘৰৰ বাহিৰত ওলালেই প্ৰায়েই আমি কাগজৰ কাপত একাপ গৰম চাহ বা কফিৰ সোৱাদ লওঁ। দেখাত স্বাস্থ্যকৰ যেন লাগিলেও, এই সাধাৰণ অভ্যাসটোৱে আমাৰ শৰীৰৰ বাবে কিমান ডাঙৰ বিপদ কঢ়িয়াই আনিছে, সেই বিষয়ে হয়তো আমি কল্পনাও কৰিব পৰা নাই। শেহতীয়াকৈ স্বাস্থ্য বিশেষজ্ঞসকলে কাগজৰ কাপৰ ব্যৱহাৰৰ ফলত হ’ব পৰা গুৰুতৰ স্বাস্থ্যজনিত ক্ষতিৰ বিষয়ে সতৰ্ক কৰি দিছে।
বৰ্তমান সময়ত প্লাষ্টিকৰ ব্যৱহাৰ হ্ৰাস কৰাৰ প্ৰচেষ্টা চলি আছে যদিও, মাইক্ৰ’প্লাষ্টিক এতিয়া সকলোতে বিয়পি পৰিছে। খোৱা বস্তুৰ পৰা আৰম্ভ কৰি দৈনন্দিন জীৱনত ব্যৱহৃত বহু বস্তুতে এইবিধ প্লাষ্টিক পোৱা যায়। আশ্চৰ্যজনকভাৱে, আমি স্বাস্থ্যকৰ বুলি ভবা এই কাগজৰ কাপবোৰতো মাইক্ৰ’প্লাষ্টিকৰ উপস্থিতি আছে।
কাগজৰ কাপসমূহ কাগজৰ দ্বাৰা নিৰ্মিত হ‘লেও, সেইবোৰক পানী নোসোমোৱাকৈ ৰাখিবলৈ ভিতৰৰ ফালে পলিইথাইলিন (Polyethylene) নামৰ প্লাষ্টিকৰ এটা পাতল আৱৰণ লগোৱা হয়।
বিশেষজ্ঞসকলৰ মতে, চাহ বা কফিৰ দৰে অতি গৰম পানীয় যেতিয়া এনে কাপত ভৰোৱা হয়, তেতিয়া তাপৰ ফলত কাগজৰ আৱৰণৰ পৰা প্লাষ্টিকৰ সূক্ষ্ম কণিকা বা মাইক্ৰ’প্লাষ্টিক পানীয়ৰ লগত মিহলি হৈ পৰে।
এজন বিশেষজ্ঞৰ দাবী অনুসৰি, গৰম পানীয়ে প্লাষ্টিক স্পৰ্শ কৰিলে প্ৰায় ২৫ হাজাৰতকৈও অধিক মাইক্ৰনতকৈ সৰু প্লাষ্টিক কণিকা তৰল পদাৰ্থৰ লগত মিহলি হৈ যায়।
এই কণাবোৰ অতি সহজে আমাৰ শৰীৰত প্ৰৱেশ কৰে আৰু দীৰ্ঘদিন ধৰি এনেদৰে চাহ-কফি খাই থকাৰ ফলত ই গুৰুতৰ স্বাস্থ্যজনিত সমস্যাৰ সৃষ্টি কৰিব পাৰে।
মাইক্ৰ’প্লাষ্টিকৰ বিপদৰ পৰা হাত সাৰিবলৈ বিকল্প উপায়
মাইক্ৰ’প্লাষ্টিকৰ এই বিপদৰ পৰা হাত সাৰিবলৈ স্বাস্থ্য বিশেষজ্ঞসকলে কিছুমান সহজ বিকল্প গ্ৰহণ কৰিবলৈ পৰামৰ্শ দিছে:
গ্লাছ বা ষ্টেইনলেছ ষ্টীলৰ কাপ: গৰম পানীয়ৰ বাবে সৰ্বোত্তম আৰু সুৰক্ষিত বিকল্প হ‘ল গ্লাছ বা ষ্টেইনলেছ ষ্টীলৰ পাত্ৰ। এইবোৰত কোনো ধৰণৰ প্লাষ্টিক নাথাকে আৰু এই পাত্ৰবোৰে পানীয়ৰ উষ্ণতাও দীৰ্ঘদিন ধৰি নিয়ন্ত্ৰণ কৰে।
নিজৰ কাপ লৈ ফুৰক: ঘৰৰ বাহিৰত চাহ বা কফি খোৱাৰ সময়ত নিজৰ ফ্লাস্ক বা কাপটো লগত লৈ যোৱাটো এক বুদ্ধিমানৰ কাম। ইয়াৰ ফলত মাইক্ৰ’প্লাষ্টিকৰ শৰীৰত প্ৰৱেশৰ আশংকা একেবাৰে নোহোৱা হয়।
এই অভ্যাস সলনি কৰি আমি কাগজৰ কাপৰ পৰা হোৱা অনিষ্টৰ পৰা নিজকে ৰক্ষা কৰাৰ লগতে প্লাষ্টিক প্ৰদূষণ নিয়ন্ত্ৰণতো অৰিহণা যোগাব পাৰোঁ। সেয়ে, আজিৰে পৰা বাহিৰত গৰম পানীয় উপভোগ কৰোঁতে অধিক সজাগতা অৱলম্বন কৰক।
