ভাৰতৰ নিৰ্বাচন আয়োগে (ECI) দেশৰ ১২ খন ৰাজ্য আৰু কেন্দ্ৰশাসিত অঞ্চলত চলি থকা এছ আই আৰ অভিযানত উল্লেখযোগ্য সফলতা লাভ কৰিছে। আয়োগে সদৰী কৰিছে যে দ্বিতীয় পৰ্যায়ৰ বাবে প্ৰায় ৯৯ শতাংশ ভোটাৰে তেওঁলোকৰ গণনা বা নামভৰ্তি প্ৰ-পত্ৰ (Enrolment Form–EF) লাভ কৰিছে। এই অভিযানত ১৩.৬৪ কোটিৰো অধিক প্ৰ-পত্ৰ ডিজিটেলাইজ কৰা হৈছে।
এছ আই আৰ (SIR)-ৰ দ্বিতীয় পৰ্যায়ত ২৭ অক্টোবৰলৈকে প্ৰায় ৫০.৯৭ কোটি ভোটাৰৰ ভিত্তিত ৫০.৪৩ কোটি গণনা প্ৰ-পত্ৰ বিতৰণ কৰা হৈছে। এই ১২ খন ৰাজ্যৰ ভিতৰত গোৱা আৰু লক্ষদ্বীপত ১০০ শতাংশ বিতৰণ সম্পন্ন হৈছে। গোৱাত ১১,৮৫,০৩৪ গৰাকী ভোটাৰৰ বাবে ১১.৮৫ লাখ ই এফ (EF) প্ৰদান কৰা হৈছে। আনহাতে, লক্ষদ্বীপত ৫৭,৮১৩ খন গণনা প্ৰ-পত্ৰ বিতৰণ হৈছে আৰু ইয়াত ডিজিটেলাইজেচনৰ হাৰ ৬১.৩০ শতাংশ।
কিন্তু কেৰালাত ডিজিটেলাইজেচনৰ হাৰ সৰ্বনিম্ন মাত্ৰ ৬.১৮ শতাংশ আৰু উত্তৰ প্ৰদেশত ৯.২১ শতাংশ। নিৰ্বাচন আয়োগে জোৰ দি কৈছে যে গণনা প্ৰ-পত্ৰ যোগ্য ভোটাৰ তালিকাৰ সঠিক প্ৰস্তুতিৰ বাবে অতি গুৰুত্বপূৰ্ণ। ইয়াক আয়োগৰ ৱেবছাইটত উপলব্ধ কৰা হৈছে আৰু বুথ পৰ্যায়ৰ বিষয়াসকলে (বুথ লেভেল অফিচাৰ – বিএলঅ‘) ঘৰে ঘৰে প্ৰদান কৰিব পাৰে।
উল্লেখ্য যে পশ্চিমবংগত এছ আই আৰ (SSR)-ৰ সৈতে ২০২৬ চনৰ বিধানসভা নিৰ্বাচনৰ প্ৰস্তুতিও আৰম্ভ হৈছে। উপ-নিৰ্বাচন আয়ুক্ত জ্ঞানেশ ভাৰতীয়ে কলকাতাত প্ৰথম পৰ্যায়ৰ পৰীক্ষণ (First Level Checking – FLC) দলৰ সদস্যসকলৰ সৈতে বৈঠক কৰি এছ আই আৰ, ইভিএম আৰু ভিভিপিএটিৰ মজুতকৰণ নিশ্চিত কৰাৰ ওপৰত আলোচনা কৰিছে। আয়োগৰ বিষয়াসকলৰ মতে, ৰাজ্যিক নিৰ্বাচন আয়োগৰ সকলো মেচিন ষ্টকত সুৰক্ষিত আছে।
ইভিএমত নতুন নিয়ম প্ৰৱৰ্তন হৈছে। প্ৰতিটো সমষ্টিৰ প্ৰাৰ্থীৰ ফটো সন্নিৱিষ্ট কৰা হ‘ব। ২০২৬ চনৰ নিৰ্বাচনত সমগ্ৰ ৰাজ্যত ভোটগ্ৰহণ কেন্দ্ৰৰ সংখ্যা ৮০,৬৮১ ৰ পৰা ৯৫ হাজাৰলৈ বৃদ্ধি পাব। বৰ্তমান ৰাজ্যৰ মুখ্য নিৰ্বাচন আয়ুক্তৰ কাৰ্যালয়ত ১.৩০ লাখ ইভিএম আৰু ১.৩৫ লাখ ভিভিপিএটি মেচিন মজুত আছে বুলি সদৰী কৰিছে।
উল্লেখযোগ্য যে, শাসকীয় তৃণমূল কংগ্ৰেছ (টিএমচি) আৰু কংগ্ৰেছকে ধৰি অন্যান্য বিৰোধী দলসমূহে এছ আই আৰ প্ৰক্ৰিয়াৰ তীব্ৰ বিৰোধিতা কৰি আহিছে। তেওঁলোকে কয় যে যোগ্য ভোটাৰক তালিকাৰ পৰা আঁতৰাই দিলে নাগৰিকৰ ভোটাধিকাৰ খৰ্ব কৰিব। টিএমচিয়ে এই প্ৰক্ৰিয়া বন্ধ কৰাৰ আহ্বান জনাইছে।
