দক্ষিণ আফ্ৰিকাৰ জোহান্সবাৰ্গত অনুষ্ঠিত হোৱা জি-২০ সন্মিলনৰ মাজতে দুয়োগৰাকী নেতাই বৈঠকত মিলিত হয়। প্ৰধানমন্ত্ৰী নৰেন্দ্ৰ মোডী আৰু ইটালীৰ প্ৰধানমন্ত্ৰী জৰ্জিয়া মেলোনী। দুয়োকে হাঁহি বিনিময় কৰা দেখা গ’ল। তেওঁলোকে অলপ সময় কথাও পাতিলে। ইয়াৰ পূৰ্বে জুন মাহত কানাডাৰ কানানাস্কিছত অনুষ্ঠিত হোৱা জি-৭ শীৰ্ষ সন্মিলনত শেষবাৰৰ বাবে তেওঁলোকৰ বৈঠক হৈছিল।
উল্লেখযোগ্য যে মেলোনীৰ সৈতে প্ৰধানমন্ত্ৰী নৰেন্দ্ৰ মোডীৰ সুসম্পৰ্ক ৰাজনৈতিক মহলত চৰ্চাৰ বিষয়। ইটালীৰ প্ৰধানমন্ত্ৰী জৰ্জিয়া মেলোনীৰ সৈতে একাধিকবাৰ চেলফি লোৱাৰ সময়ত প্ৰধানমন্ত্ৰী নৰেন্দ্ৰ মোদীক দেখা গৈছে।
তেওঁলোকৰ এই ফ্ৰেম #Melodi নামেৰে ছচিয়েল মিডিয়াত ট্ৰেণ্ডিং কৰি আহিছে। এই কথা দুয়োগৰাকী নেতাৰ দৃষ্টিগোচৰ হোৱা নাছিল। মেলোনীয়ে নিজেই এবাৰ নমোৰ সৈতে চেলফি লোৱাৰ সময়ত ‘হেল্ল ফ্ৰম দ্য মেলোডী টীম’ বুলি কৈছিল।
প্ৰসংগক্ৰমে মোদীয়ে মেলোনীৰ স্মৃতিকথাৰ ভাৰতীয় সংস্কৰণৰ পৰিচয় লিখি দিছিল। প্ৰস্তাৱনাত মোদীয়ে কৈছে যে মেলোনীৰ গ্ৰন্থখনৰ পৰিচয় লিখিবলৈ পাই তেওঁ সন্মানিত অনুভৱ কৰিছে।
একে সময়তে তেওঁ কয় যে তেওঁ মেলোনীৰ প্ৰতি থকা ‘শ্ৰদ্ধা, প্ৰশংসা আৰু বন্ধুত্ব’ৰ ওপৰত ভিত্তি কৰিয়েই সেয়া লিখিছে। তেওঁ মেলোনীক ‘এগৰাকী দেশপ্ৰেমিক আৰু এগৰাকী অসাধাৰণ সমসাময়িক নেতা’ বুলি উল্লেখ কৰা দেখা গৈছে।
ইপিনে, ইটালীৰ প্ৰধানমন্ত্ৰীয়ে চলিত বৰ্ষৰ মোডীৰ জন্মদিনত এটা আৱেগিক পোষ্ট কৰিছিল। এক্স হেণ্ডেলত জৰ্জিয়া মেলোনীৰ বাৰ্তা, ‘ভাৰতৰ প্ৰধানমন্ত্ৰীগৰাকীৰ ৭৫ সংখ্যক জন্মদিনত বহু শুভেচ্ছা। তেওঁৰ শক্তি, দৃঢ়তা আৰু লাখ লাখ মানুহক নেতৃত্ব দিয়াৰ ক্ষমতা আমাৰ সকলোৰে বাবে এক প্ৰেৰণা। তেখেতৰ সুস্বাস্থ্য কামনা কৰিলোঁ। আশা কৰোঁ তেওঁ ভাৰতক এক উজ্জ্বল ভৱিষ্যতৰ দিশে লৈ যাব। আমাৰ দুয়োখন দেশৰ মাজত সম্পৰ্ক অধিক শক্তিশালী হ’ব৷’
বৰ্তমান তিনিদিনীয়া আফ্ৰিকা ভ্ৰমণত আছে প্ৰধানমন্ত্ৰী মোডী। তাত থিয় হৈ প্ৰধানমন্ত্ৰীয়ে উল্লেখ কৰে যে বিশ্বৰ সামগ্ৰিক উন্নয়নৰ বাবে আফ্ৰিকাৰ উন্নয়ন অতি গুৰুত্বপূৰ্ণ। নৰেন্দ্ৰ মোদীয়ে ভাৰত সদায় আফ্ৰিকাৰ পক্ষত থকাৰ কথাও উল্লেখ কৰে।
