নতুন দিল্লীত মুখ্য নিৰ্বাচন আয়ুক্তৰ বিৰুদ্ধে হোৱা প্ৰতিবাদৰ বাতৰি সংগ্ৰহ কৰি থকা সাংবাদিকৰ ওপৰত আৰক্ষীয়ে নিৰ্যাতন আৰু দুৰ্ব্যৱহাৰ কৰাৰ অভিযোগ উত্থাপন হৈছে। এই ঘটনাক তীব্ৰ গৰিহণা দিছে গুৱাহাটী প্ৰেছ ক্লাবে। সাংবাদিকৰ সুৰক্ষা আৰু সংবাদ মাধ্যমৰ স্বাধীনতাৰ প্ৰশ্নত উদ্বেগ প্ৰকাশ কৰি অহা ১৭ অক্টোবৰত এক প্ৰতিবাদী সমাৱেশৰ আহ্বান জনাইছে সংগঠনটোৱে।
গুৱাহাটী প্ৰেছ ক্লাবৰ মতে, পৰিচয়-পত্ৰ প্ৰদৰ্শন কৰাৰ পিছতো সাংবাদিকসকলক আৰক্ষীয়ে লক্ষ্য কৰি লোৱাৰ ঘটনাই সংবাদ মাধ্যমৰ স্বাধীনতা আৰু সাংবাদিকৰ নিৰাপত্তাক লৈ গুৰুতৰ প্ৰশ্নৰ সৃষ্টি কৰিছে। বিশেষকৈ ডিজিটেল সংবাদ মাধ্যমৰ সাংবাদিকসকলক লক্ষ্য কৰি হাৰাশাস্তি কৰাৰ অভিযোগকো গৰিহণা দিছে প্ৰেছ ক্লাবে।
ৰাজধানী দিল্লীত সাংবাদিকৰ ওপৰত সংঘটিত এনে ঘটনা আৰু সংবাদ সংগ্ৰহৰ ক্ষেত্ৰত সাংবাদিকসকলে সন্মুখীন হোৱা বাধা তথা হাৰাশাস্তিৰ প্ৰতিবাদত সাংবাদিকৰ সুৰক্ষা, সংবাদ মাধ্যমৰ স্বাধীনতা আৰু পেছাগত অধিকাৰ সুনিশ্চিত কৰাৰ দাবী জনাইছে সংগঠনটোৱে।
এই দাবীৰ সমৰ্থনত অহা ১৭ অক্টোবৰ, শনিবাৰে পুৱা ১০ বজাত গুৱাহাটী প্ৰেছ ক্লাবৰ চৌহদত এখন শান্তিপূৰ্ণ প্ৰতিবাদী সমাৱেশ অনুষ্ঠিত হ’ব। উক্ত সমাৱেশত সকলো সাংবাদিক আৰু সংবাদকৰ্মীক অংশগ্ৰহণ কৰিবলৈ আহ্বান জনাইছে গুৱাহাটী প্ৰেছ ক্লাবে।
সাংবাদিকৰ অধিকাৰ, সুৰক্ষা আৰু সংবাদ মাধ্যমৰ স্বাধীনতাৰ সপক্ষে ঐক্যবদ্ধ কণ্ঠ শক্তিশালী কৰাৰ লক্ষ্যৰে এই প্ৰতিবাদী কাৰ্যসূচী গ্ৰহণ কৰা হৈছে।
