ভাৰতীয় টকা ২০২৫ চনৰ এই জানুৱাৰী-ডিচেম্বৰ সময়ছোৱাত আমেৰিকান ডলাৰৰ বিপৰীতে ৪.৩% তীব্ৰভাৱে হ্ৰাস পাই এছিয়াৰ আটাইতকৈ বেয়া মুদ্ৰা হিচাপে পৰিগণিত হৈছে। বৈদেশিক মুদ্ৰা বিশ্লেষকসকলে কয় যে যদিহে ভাৰত-আমেৰিকাৰ বাণিজ্যিক চুক্তি শীঘ্ৰে নহয়, তেন্তে প্ৰতি ডলাৰত টকা আৰু হ্ৰাস পাই ৯০ টকা হ’ব পাৰে।
দ্য হিন্দুত প্ৰকাশিত এক প্ৰতিবেদন অনুসৰি চয়ছ ৱেলথৰ অক্ষত গাৰ্গে কয় যে, “চীনা ইউয়ান (Yuan) আৰু ইণ্ডোনেছিয়ান ৰূপীয়াৰ দৰে মুদ্ৰাৰ বিপৰীতে টকাৰ মূল্য দুৰ্বল হৈছে। অৱশ্যে এতিয়াও ই জাপানী য়েন আৰু কোৰিয়ান ৱনৰ দৰে গাঁথনিগতভাৱে দুৰ্বল মুদ্ৰাৰ তুলনাত দুৰ্বল প্ৰদৰ্শন কৰি আছে।”
তেওঁ আৰু কয়, “সামগ্ৰিকভাৱে টকাৰ দিশ এতিয়া ঘৰুৱা অৰ্থনীতিতকৈ বিশ্ব ডলাৰৰ শক্তিৰ ওপৰত অধিক নিৰ্ভৰশীল।”
এক্সিছ বেংকৰ জ্যেষ্ঠ উপ-সভাপতি (ব্যৱসায় আৰু অৰ্থনৈতিক গৱেষণা) তনয় দালালে কয় যে কেইবামাহো ধৰি টকাৰ মূল্য হ্ৰাসৰ হেঁচা পৰিছে। এই চাপ চলিত একাউণ্টৰ বাবে নহয়, বৰঞ্চ মূলধনৰ বহিঃপ্ৰবাহৰ বাবেহে।
তেওঁ ব্যাখ্যা কৰে যে, “এছিয়াৰ মুদ্ৰাৰ বিপৰীতে বিশেষকৈ কাৰেণ্ট একাউণ্টৰ উদ্বৃত্ত থকা মুদ্ৰাৰ বিপৰীতে টকা দুৰ্বল হৈছে। ২০২৫ চনৰ কেলেণ্ডাৰ বৰ্ষত এতিয়ালৈকে টকাৰ মূল্য ৪% হ্ৰাস পাইছে, আনহাতে ইণ্ডোনেছিয়ান ৰূপিয়াৰ ২.৯% আৰু ফিলিপাইনছৰ পেছ‘ ১.৩% দুৰ্বল হৈছে।”
তেওঁ কয় যে এছিয়াৰ অন্যান্য মুদ্ৰাসমূহ শক্তিশালী হৈছে, মূলতঃ চীনৰ ইউয়ানৰ বাবে।
২১ নৱেম্বৰত ডলাৰৰ বিপৰীতে টকাৰ মূল্য নতুন ঐতিহাসিক নিম্নতম স্তৰত উপনীত হয়। ৮৮.৮ স্তৰ অতিক্ৰম কৰি ৮৯.৬৬ লৈ হ্ৰাস পায়। কিন্তু তাৰ পাছত টকাৰ মূল্য কিছু উন্নত হৈছে আৰু মঙলবাৰে ডলাৰৰ বিপৰীতে ৮৯.২২ ত আছিল।
একুইট ৰেটিংছ এণ্ড ৰিচাৰ্চৰ এমডি তথা চিইঅ’ শংকৰ চক্ৰৱৰ্তীয়ে কয় যে, “বিগত দুমাহ ধৰি ডলাৰৰ মূল্য ৩.৬% শক্তিশালী হোৱাটোৱে টকাকে ধৰি বেছিভাগ মুদ্ৰাৰ ওপৰত হেঁচা প্ৰয়োগ কৰিছে। ভাৰতে দ্বৈত বাহ্যিক প্ৰত্যাহ্বানৰ সন্মুখীন হৈছে: আমেৰিকাৰ শুল্ক বৃদ্ধি আৰু মূল্যৱান ধাতুৰ মূল্য বৃদ্ধি। এই প্ৰতিকূল পৰিস্থিতিয়ে ভাৰতৰ বাণিজ্যিক ঘাটিত প্ৰভাৱ পেলাইছে।”
ড০ বিজয়কুমাৰে বুজাই দিলে যে শ্বেয়াৰ বজাৰত বিদেশী বিনিয়োগকাৰীয়ে (এফ আই আই) বিক্ৰী অব্যাহত ৰখাটোৱেও টকাৰ ওপৰত হেঁচা প্ৰয়োগ কৰিছে। ভাৰত-আমেৰিকাৰ বাণিজ্য চুক্তিত পলম হোৱাৰ ফলত বিনিয়োগকাৰীৰ আস্থা দুৰ্বল হৈ পৰিছে।
তেওঁ কয় যে যদিহে এই বাণিজ্যিক চুক্তি শীঘ্ৰে হয় আৰু ভাৰতৰ ওপৰত শুল্কৰ হাৰ হ্ৰাস পায় তেন্তে টকাৰ শক্তিশালী উত্থান দেখা যাব পাৰে।
তেওঁ ভৱিষ্যদ্বাণী কৰিছিল যে ২০২৬ চনৰ প্ৰথম ত্ৰৈমাসিকৰ ভিতৰত প্ৰথমে টকা ৯০ লৈ হ্ৰাস পাব পাৰে আৰু তাৰ পিছত প্ৰায় ৮৮.৫০ লৈ ঘূৰি আহিব পাৰে।
অক্ষত গাৰ্গে কয়, “ভাৰতৰ ওপৰত শুল্কৰ প্ৰভাৱ অধিক আছিল কাৰণ যোৱা কেইটামান সপ্তাহত বাণিজ্যিক ঘাটি বৃদ্ধি পাইছে আৰু বিদেশী বিনিয়োগকাৰীয়ে বিক্ৰী অব্যাহত ৰাখিছে। আৰ বি আইয়ে হস্তক্ষেপ কৰিলে, কিন্তু যেতিয়া টকা মানসিক স্তৰৰ তললৈ নামি গ‘ল, তেতিয়া হ্ৰাস ত্বৰান্বিত হ‘ল।”
