জনপ্ৰিয় শিল্পী জুবিন গাৰ্গৰ ৰহস্যজনক মৃত্যুৰ গোচৰত গ্ৰেপ্তাৰ হোৱা শ্যামকানু মহন্ত আৰু সিদ্ধাৰ্থ শৰ্মাৰ বিপদ দিনে দিনে বৃদ্ধি পাইছে। বৰ্তমান বাক্সা কাৰাগাৰত থকা দুই অভিযুক্তক আজি কাৰাগাৰৰ ভিতৰতে এনফ’ৰ্চমেণ্ট ডাইৰেক্টৰেট (ED) দলৰ জেৰাৰ সন্মুখীন হ’বলগীয়া হয়।
জুবিন গাৰ্গৰ হত্যাৰ লগতে অৰ্থনৈতিক অপৰাধৰ গোচৰতো অভিযুক্ত দুয়োকে CIDৰ বিশেষ তদন্তকাৰী দলৰ (SIT) সমান্তৰালকৈ এনফ’ৰ্চমেণ্ট ডাইৰেক্টৰেও গোচৰটোৰ তদন্ত চলাই আছে। এইটোৱেই প্ৰথমবাৰ যে EDৰ দলে জে’লত উপস্থিতহৈ জুবিন হত্যাৰ ২ অভিযুক্তক জেৰা চলায়।
উলেখ্য যে, যোৱা ১৯ ছেপ্টেম্বৰত ছিংগাপুৰত প্ৰাণৰ শিল্পী জুবিন গাৰ্গে ৰহস্যজনক মৃত্যুক আঁকোৱালি লৈছিল। এই ৰহস্যজনক মৃত্যুৰ পিছতে ৰাজ্যজুৰি সিদ্ধাৰ্থ আৰু শ্যামকানুৰ বিৰুদ্ধে একাধিক এজাহাৰ দাখিল কৰা হৈছিল। পৰৱৰ্তী সময়ত CIDৰ SITএ দুয়োৰে বিৰুদ্ধে তদন্ত আৰম্ভ কৰে।
জুবিন গাৰ্গৰ বিয়োগৰ পিছৰে পৰা পলায়ন কৰি থকা শ্যামকানু মহন্ত আৰু সিদ্ধাৰ্থ শৰ্মাক ১৩ দিন লুকাই থকাৰ পিছত ১ অক্টোবৰৰ পুৱাই গ্ৰেপ্তাৰ কৰা হৈছিল।
।
প্ৰাপ্ত তথ্য অনুসৰি, ‘ৰঙালী’ আৰু ‘নৰ্থ ইষ্ট ফেষ্টিভেল’ অনুষ্ঠান আয়োজন কৰা শ্যামাকানু মহন্তৰ ঘৰৰ পৰা একাধিক চৰকাৰী চীল আৰু বিভিন্ন বিত্তীয় লেন-দেনৰ আপত্তিজনক তথ্য উদ্ধাৰ হৈছিল। আনহাতে, জুবিন গাৰ্গৰ মেনেজাৰ সিদ্ধাৰ্থ শৰ্মাৰ বিৰুদ্ধে জুবিন গাৰ্গৰ ধনৰ খেলিমেলি আৰু জুবিন গাৰ্গৰ ধন আত্মসাৎ কৰাৰ গুৰুতৰ অভিযোগ উত্থাপন হৈছিল।
১৪ দিনৰ আৰক্ষীৰ জিম্মা শেষ হোৱাৰ পিছত ১৫ অক্টোবৰত শ্যামকানু মহন্ত আৰু সিদ্ধাৰ্থ শৰ্মাক বাক্সা জিলা কাৰাগাৰলৈ প্ৰেৰণ কৰা হৈছিল। EDৰ এই নতুন জেৰাই গোচৰটোত নতুন গতি প্ৰদান কৰাৰ লগতে অভিযুক্ত দুয়োৰে বিপদ অধিক বঢ়াই তুলিছে বুলি ধাৰণা কৰা হৈছে।
