দেওবাৰে ছত্তীশগড়ৰ দন্তেৱাড়া জিলাত ১২ গৰাকী মহিলাসহ মুঠ ৩৭ গৰাকী নক্সালবাদীয়ে আৰক্ষীৰ ওচৰত আত্মসমৰ্পণ কৰিছে। আৰক্ষীৰ তথ্য অনুসৰি, আত্মসমৰ্পণ কৰা নক্সালবাদীসকলৰ ২৭ জনৰ ওপৰত চৰকাৰৰ ফালৰ পৰা মুঠ ৬৫ লাখ টকাৰ পুৰস্কাৰ ঘোষণা কৰা হৈছিল।
আত্মসমৰ্পণ কৰা সদস্যসকলে জ্যেষ্ঠ আৰক্ষী আৰু চি আৰ পি এফ বিষয়াৰ ওচৰত নিজকে গতাই দিয়ে। এই আত্মসমৰ্পণ ‘পুনা মাৰ্গম’ (Puna Maargam) পদক্ষেপৰ অধীনত কৰা হৈছে, যাৰ অৰ্থ হৈছে ‘পুনৰ্বাসনৰ পৰা সামাজিক পুনৰ সংযোগ’। দান্তেৱাড়াৰ আৰক্ষী অধীক্ষক গৌৰৱ ৰায়ে মন্তব্য কৰে যে, বাষ্টাৰ ৰেঞ্জ আৰক্ষীয়ে আৰম্ভ কৰা এই কাৰ্যসূচীৰ মূল লক্ষ্য হৈছে অঞ্চলটোলৈ স্থায়ী শান্তি আৰু উন্নয়ন ঘূৰাই অনা।
আত্মসমৰ্পণ কৰা নক্সালবাদীসকলৰ ভিতৰত কেইবাজনো গুৰুত্বপূৰ্ণ নেতাই আছে। ইয়াৰ ভিতৰত কুমালী ওৰফে অনিতা মাণ্ডৱী, গীতা ওৰফে লক্ষ্মী মদকাম, ৰঞ্জন ওৰফে সোমা মাণ্ডৱী, আৰু ভীমা ওৰফে জাহাজ কালমু অন্যতম। এই প্ৰত্যেকজন নেতাৰ ওপৰত ৮ লাখ টকাকৈ পুৰস্কাৰ ঘোষণা কৰা হৈছিল।
উল্লেখ্য যে চৰকাৰৰ পুনৰ্বাসন নীতিৰ অধীনত, আত্মসমৰ্পণ কৰা প্ৰতিজন নক্সালবাদীয়ে ৫০ হাজাৰ টকা লাভ কৰিব। ইয়াৰ উপৰিও, তেওঁলোকে দক্ষতা প্ৰশিক্ষণ আৰু কৃষিভূমিৰ দৰে অন্যান্য চৰকাৰী সুবিধাও লাভ কৰিব।
আৰক্ষীৰ তথ্য অনুসৰি, বিগত ২০ মাহৰ ভিতৰত দন্তেৱাড়া জিলাত মুঠ ৫০৮ জনতকৈ অধিক মাওবাদীয়ে হিংসাৰ পথ এৰি স্বাভাৱিক জীৱনত যোগদান কৰিছে। ইয়াৰ ভিতৰত ১৬৫ জন নক্সালবাদীৰ মূৰত পুৰস্কাৰ ঘোষণা কৰা হৈছিল। বহু জ্যেষ্ঠ নেতা আৰু সক্ৰিয় সদস্যই নিষিদ্ধ গোটটো ত্যাগ কৰিছে।
মুঠতে, বিগত ২৩ মাহৰ ভিতৰত ছত্তীশগড় ৰাজ্যত শীৰ্ষ নেতাকে ধৰি ২২০০ৰো অধিক নক্সালবাদীয়ে আত্মসমৰ্পণ কৰিছে। কেন্দ্ৰীয় চৰকাৰে ২০২৬ চনৰ মাৰ্চ মাহৰ ভিতৰত সমগ্ৰ ভাৰততে নক্সালবাদৰ সম্পূৰ্ণৰূপে অন্ত পেলোৱাৰ লক্ষ্য স্থিৰ কৰিছে।
