চৰকাৰে সৰ্বসাধাৰণ লোকৰ বাবে ৰাজহুৱা বিতৰণ ব্যৱস্থাৰ অধীনত যোগান ধৰা বিভিন্ন সামগ্ৰী বিশেষকৈ চাউল ক’লা বজাৰত বিক্ৰী হৈ অহা বুলি অভিযোগ উত্থাপন হোৱাৰ সময়তে বৰপেটাত বৃহৎ পৰিমাণৰ চাউল জব্দ কৰিবলৈসক্ষম হৈছে বৰপেটা জিলাৰ খাদ্য আৰু অসামৰিক যোগান বিভাগে।
কালি ১২ জুনৰ নিশা যোগান বিভাগে আকস্মিকভাৱে বৰপেটা চহৰৰ সমীপৱৰ্তী কাঁহিবাৰী গাঁৱত অভিযান চলাই এটা গুডামৰ পৰা বৃহৎ পৰিমাণৰ চাউল জব্দ কৰিবলৈ সক্ষম হয়। যোগান বিভাগৰ এক সূত্ৰই জানিবলৈ দিয়া অনুসৰি পাটবাউসী অঞ্চলৰ কাঁহিবাৰী গাঁৱত এটা গুডাম ঘৰত কালি নিশা ক্ৰমে এ এছ-১৮চি-২৯০৩ আৰু এ এছ-০১এইচ চি-৯৬০৭ নম্বৰৰ দুখন ট্ৰাকত চাউল ভৰাই বিক্ৰী কৰাৰ যো-জা চলাই আছিল।
গোপন সূত্ৰৰ পমখেদি যোগান বিভাগ গুডাম ঘৰটোত উপস্থিত হয়। যোগান বিভাগৰ মানুহ উপস্থিত হোৱাৰ পিচতে গুডাম ঘৰটোত উপস্থিত থকা লোককেইজন পলাবলৈ সক্ষম হয়।
যোগান বিভাগৰ দলটোৱে উক্ত স্থানৰ পৰা ট্ৰাক দুখন, ২৩৬ কুইণ্টল ৫২ কেজি চাউল, জেনেৰেটৰ এটা, বস্তা চিলাই কৰা মেচিন দুটা, খালী প্লাষ্টিকৰ বেগ ৬৫ খন আৰু খালী জুট বেগ ১০৬ খন জব্দ কৰিবলৈ সক্ষম হয়।
যোগান বিভাগৰ দলটোৰ নেতৃত্ব দিয়ে কাৰ্যবাহী দণ্ডাধীশ প্ৰাঞ্জল কোঁৱৰ, উপ-সঞ্চালক গোবিন্দ কলিতা, পৰিদৰ্শক ক্ৰমে মণ্টু দাস, মৃন্ময় ভৰালী, কমল কলিতা, শিৱ শালৈ, মাধৱ বৰ্মন আৰু মনহৰি বায়নে।
সাধাৰণ গৰীব শ্ৰেণীৰ লোকৰ নামত আবণ্টিত এই চাউল এক অসাধু চক্ৰই বিভিন্ন কৌশলেৰে ক’লা বজাৰত বিক্ৰী কৰি অহাৰ লগতে বাংলাদেশ পৰ্যন্ত চালান দি আহিছে।
