অষ্ট্ৰিলয়াৰ কুইন্সলেণ্ডত ২৪ বছৰীয়া যুৱতী টয়াহ কৰ্ডিংলিক হত্যাত দোষী সাব্যস্ত হোৱা হত্যাকাৰী ভাৰতীয় ৰাজৱিন্দৰ সিঙক মঙলবাৰে ২৫ বছৰৰ নন-পেৰ’লৰ সৈতে যাৱজ্জীৱন কাৰাদণ্ডৰ শাস্তি প্ৰদান কৰা হৈছে।
৪১ বছৰীয়া সিঙে সাত বছৰ পূৰ্বে সুদূৰ উত্তৰ কুইন্সলেণ্ডৰ ৱাংগেট্টি বিচত কৰ্ডিংলিক ছুৰীৰে হানি খুচি হত্যা কৰাৰ পিছত ভাৰতলৈ পলায়ন কৰে আৰু চাৰি বছৰ আত্মগোপন কৰি থাকে।
২০১৮ চনৰ ২১ অক্টোবৰত নৃশংস হত্যাৰ বলি হোৱাৰ সময়ত কৰ্ডিংলিয়ে নিজৰ কুকুৰ ইণ্ডীৰ সৈতে সাগৰৰ পাৰত ব্যায়াম কৰি আছিল।
তেওঁৰ উদ্বিগ্ন পিতৃ ট্ৰয় কৰ্ডিংলীয়ে ঘৰলৈ উভতিব নহাৰ পিছত কন্যাক বিচাৰি ওলাই যোৱাৰ সময়ত মৃতদেহটো বালিৰ তলত পুতি থোৱা অৱস্থাত আৱিষ্কাৰ কৰে।
কুকুৰটোক কোনো ক্ষতি নোহোৱাকৈ প্ৰায় ৩০ মিটাৰ দূৰত গছত বান্ধি থোৱা অৱস্থাত উদ্ধাৰ কৰা হয়।
প্ৰাক্তন নাৰ্ছ সিঙক ভাৰতৰ পৰা প্ৰত্যাৰ্পণ কৰি ২০২২ চনত হত্যাৰ অভিযোগ উত্থাপন কৰা হৈছিল। তেওঁ এই অভিযোগত নিজকে দোষী নহয় বুলি দাবী কৰিছিল।
সোমবাৰে কেয়াৰ্নছত চাৰি সপ্তাহজোৰা পুনৰ বিচাৰৰ অন্তত জুৰীয়ে সৰ্বসন্মতিক্ৰমে দোষী সাব্যস্ত কৰিবলৈ প্ৰায় সাত ঘণ্টা সময় লৈছিল।
আদালতত দাখিল কৰা প্ৰমাণৰ ভিতৰত আছিল ফোন ৰেকৰ্ড, ডি এন এৰ নমুনা, চিচিটিভি আৰু ট্ৰেফিক কেমেৰাৰ ফুটেজৰ লগতে সিঙৰ নীলা আলফা ৰোমিঅ’ গাড়ীৰ গতিবিধি।
টয়াহৰ ফোনটোত কেয়াৰ্নছৰ মাজেৰে দক্ষিণ দিশলৈ যোৱা একেটা পথতে আৰক্ষীয়ে সিঙৰ গাড়ীখন চিচিটিভিত সাগৰৰ পাৰৰ পৰা ওলাই অহাৰ তথ্য লাভ কৰে।
আদালতে শুনানি গ্ৰহণ কৰি কয় যে সিঙে হত্যাকাণ্ডৰ পিছদিনা পৰিয়ালক এৰি অষ্ট্ৰেলিয়াৰ পৰা ভাৰতলৈ গুচি আহিছিল আৰু চাৰি বছৰতকৈও অধিক সময়ৰ পাছত নতুন দিল্লীত গ্ৰেপ্তাৰ নোহোৱালৈকে তেওঁলোকৰ সৈতে যোগাযোগ কৰা নাছিল।
ৰায়দান কৰাৰ পিছত আদালতৰ বাহিৰত টয়াহৰ পিতৃয়ে কয় যে আজিৰ ৰায়দানে এক প্ৰকাৰৰ ন্যায় প্ৰদান কৰিলে, কিন্তু আমাৰ বাবে প্ৰকৃত ন্যায় কেতিয়াও হ’ব নোৱাৰে।
“আমি এতিয়া টয়াহ অবিহনে এখন পৃথিৱীত বাস কৰোঁ, আৰু তাৰ বাবেই ই অধিক ম্ৰিয়মান ঠাই। টয়াহ আমাৰ হৃদয়ত আৰু আন বহুতৰ হৃদয়ত সদায় সজীৱ হৈ থাকিব।”
