২০২৫ বৰ্ষক বিদায় দি ২০২৬ বৰ্ষক আদৰণী জনাবলৈ মাজত মাত্ৰ কেইটামান দিন বাকী থকা অৱস্থাত ৰাজ্যৰ বিত্তীয় অৱস্থাক লৈ এক উদ্বেগজনক তথ্য পোহৰলৈ আহিছে। নতুন বছৰত অসম চৰকাৰে কঢ়িয়াব লাগিব ডেৰ লাখ কোটি টকাৰো অধিক ঋণৰ বোজা। বিধানসভাৰ শীতকালীন অধিৱেশনত বিত্তমন্ত্ৰী অজন্তা নেওগে সদনত দিয়া তথ্য অনুসৰি, ২০২৫ চনৰ ৩১ মাৰ্চলৈকে অসম চৰকাৰৰ মুঠ বকেয়া ঋণৰ পৰিমাণ হ’ব ১,৫৪,৩৩৩.৪৯ কোটি টকা।
তথ্য অনুসৰি, বৰ্তমান অসমৰ জনমুৰি ঋণৰ পৰিমাণ প্ৰায় ৪২,৪১৯ টকা। বিগত কেইবছৰ ধৰি ৰাজ্য চৰকাৰে একেৰাহে হিতাধিকাৰী আঁচনি ৰূপায়ণ কৰি অহাৰ সমান্তৰালকৈ ঋণৰ পৰিমাণো উদ্বেগজনক হাৰত বৃদ্ধি পাইছে।
ঋণ গ্ৰহণ আৰু সুতৰ বোজা ২০২২-২৩ বিত্তীয় বৰ্ষত অসম চৰকাৰে ২১,৬০২ কোটি টকাৰ ঋণ গ্ৰহণ কৰিছিল। ২০২৩-২৪ বৰ্ষত এই পৰিমাণ বৃদ্ধি পাই ২৪,১১৮ কোটি টকা আৰু ২০২৪-২৫ বৰ্ষত ২৫,২৯৪ কোটি টকালৈ পাইছে। আনহাতে, ঋণৰ সুত পৰিশোধৰ বাবদ ২০২২-২৩ বৰ্ষত ৬,৮৭৫ কোটি টকা, ২০২৩-২৪ বৰ্ষত ৮,১৩৯ কোটি টকা আৰু ২০২৪-২৫ বৰ্ষত ৯,৪৬৮ কোটি টকা ব্যয় কৰিবলগীয়া হৈছে।
বিদায়ী ২০২৫ বৰ্ষটোত মাত্ৰ এবছৰতেই চৰকাৰে প্ৰায় ১৬,২০০ কোটি টকাৰ নতুন ঋণ গ্ৰহণ কৰিছে। এই ঋণ বিভিন্ন মাহত একাধিক পৰ্যায়ত লোৱা হৈছে।
কেগৰ প্ৰতিবেদনত গভীৰ উদ্বেগ ভাৰতৰ নিয়ন্ত্ৰক আৰু মহাহিচাপ পৰীক্ষক (CAG)ৰ শেহতীয়া প্ৰতিবেদনত অসমৰ বিত্তীয় অৱস্থাক লৈ গভীৰ উদ্বেগ প্ৰকাশ কৰা হৈছে। ২০২৩-২৪ বৰ্ষৰ প্ৰতিবেদন অনুসৰি, ৰাজ্য চৰকাৰৰ মুঠ ঋণৰ ৫৫.০৪ শতাংশ, অৰ্থাৎ প্ৰায় ৬৮,৪৫২ কোটি টকা অহা সাত বছৰৰ ভিতৰত পৰিশোধ কৰিব লাগিব।
প্ৰতিবেদনত উল্লেখ কৰা হৈছে যে ২০১৯-২০ বৰ্ষত ৭২,২৫৬ কোটি টকা থকা ৰাজ্যৰ বকেয়া ঋণ ২০২৩-২৪ বৰ্ষত বৃদ্ধি পাই ১,৪৬,৯২৮ কোটি টকালৈ গৈছে, যি ১০৩ শতাংশৰো অধিক বৃদ্ধি। কেগে সতৰ্ক কৰি দিছে যে অধিক ৰাজহুৱা ঋণৰ ফলত আগন্তুক বছৰসমূহত সুত পৰিশোধৰ চাপ বহুগুণে বৃদ্ধি পাব।
উল্লেখ্য যে তুলনাত্মকভাৱে ২০১৫-১৬ বিত্তীয় বৰ্ষলৈকে, তৰুণ গগৈৰ নেতৃত্বাধীন কংগ্ৰেছ চৰকাৰৰ ১৫ বছৰীয়া কাৰ্যকালৰ শেষত ৰাজ্যৰ ঋণৰ পৰিমাণ আছিল প্ৰায় ৪১,৯৬৪ কোটি টকা। এই সময়ছোৱাত সুতৰ বাবদ মুঠ ব্যয় হৈছিল ২৬,৩৬১ কোটি টকা।
সৰ্বানন্দ সোণোৱাল চৰকাৰৰ পাঁচ বছৰীয়া কাৰ্যকালত ৪৭,৭৪৫ কোটি টকাৰ ঋণ গ্ৰহণ কৰা হৈছিল আৰু সুতৰ বাবদ ব্যয় হৈছিল ১৯,৬৫১ কোটি টকা। বৰ্তমান মুখ্যমন্ত্ৰী হিমন্ত বিশ্ব শৰ্মাৰ নেতৃত্বাধীন চৰকাৰৰ সময়ছোৱাত ঋণ আৰু সুত দুয়োটাই পূৰ্বৰ সকলো অভিলেখ অতিক্ৰম কৰিছে।
