প্ৰযুক্তিৰ ক্ষেত্ৰত চীনে পুনৰবাৰ বিশ্ব অভিলেখ গঢ়িলে। এইবাৰ তেওঁলোকে সৃষ্টি কৰিছে বিশ্বৰ আটাইতকৈ দ্ৰুততম ৰে’ল। এই ৰে’লখনৰ নাম মাগলেভ। চকুৰ পলকৰ দৰে যেন ইয়াৰ গতি। মাত্ৰ ২ ছেকেণ্ডতে ঘণ্টাত ৭০০ কিলোমিটাৰ বেগত চকুৰ আগেৰে পাৰ হৈ গ’ল।
ইয়াৰ ফটো তোলাৰ আশাত থকা আটাইকেইজন ফটোগ্ৰাফাৰে বেছি সময় নাপালে। চকুৰ সন্মুখেৰে যেন ধুমুহা বলি গৈছিল। খালী চকুৰে চাবলৈ বৰ কষ্টকৰ আছিল। চীনৰ নেচনেল ইউনিভাৰ্চিটি অৱ ডিফেন্স টেকন’লজিয়ে এই কামটো কৰিছে। তেওঁলোকে নিৰ্মাণ কৰা ৰে’লখনত তেওঁলোকে ৰে’ল আৰু লাইনৰ মাজত চুম্বকীয় সংযোগ গঢ়ি তুলিছে। অন্যথা ৰে’লখন ৰে’লপথৰ পৰা পৰিব পাৰে।
৪০০ মিটাৰ দৈৰ্ঘ্যৰ এই ৰেলখনৰ ওজন প্ৰায় ১০০০ কিলোগ্ৰাম। কেৱল বেগেৰে ৰে’লখন চলোৱাই নহয়, সঠিক সময়ত ৰখাই দিয়াটোও এক কঠিন কাম আছিল। অৱশ্যে গোটেই কামটো অতি সুকলমে সম্পূৰ্ণ হ’ল। সকলোতে ভাইৰেল হোৱা ভিডিঅ’টোত দেখা গৈছে যে এচমকা পোহৰৰ জিলিকনিৰ দৰে গুচি গৈছে ৰে’লখন।
এইখন ঠিক ৰকেট বা মিছাইলৰ দৰেই। চীনৰ এখন চহৰৰ পৰা আন এখন চহৰলৈ যাবলৈ এতিয়া মিনিটৰ কথা। এই ৰে’লখন চলোৱা চালকজনক সহায় কৰিবলৈ কেইবাজনো লোক আছিল। ক’ব পাৰি যে গতিৰ যুগত চীনে আকৌ এবাৰ বিশ্বক পিছ পেলাইছে।
ইয়াক নিৰ্মাণ কৰা লোকসকলে জনায় যে তেওঁলোকে ইয়াত মহাকাশ প্ৰযুক্তি ব্যৱহাৰ কৰিছে। ৰকেট আৰু মহাকাশত এই ধৰণৰ প্ৰযুক্তি ব্যৱহাৰ কৰে। ফলত গোটেই কামটো সুকলমে আগবাঢ়িছে।
