‘কংগ্ৰেছ শেষ হোৱা নাই। যিসকলে কংগ্ৰেছ শেষ হৈ গৈছে বুলি ভাবিছে তেওঁলোকে ভুল ভাবিছে।’ ৰাষ্ট্ৰীয় কংগ্ৰেছৰ ১৪০ সংখ্যক প্ৰতিষ্ঠা দিৱস উপলক্ষে দেওবাৰে দিল্লীত আয়োজিত এক অনুষ্ঠানত ভাষণ দি কংগ্ৰেছৰ সভাপতি মল্লিকাৰ্জুন খাৰ্গেই এই মন্তব্য কৰে।
কংগ্ৰেছ সংসদীয় দলৰ অধ্যক্ষ ছোনিয়া গান্ধী, লোকসভাৰ বিৰোধী দলপতি ৰাহুল গান্ধী আৰু দলৰ সকলো শীৰ্ষ নেতাৰ উপস্থিতিত খাৰ্গেই দিল্লীস্থিত দলৰ মুখ্য কাৰ্যালয়ত বিজেপিকো লক্ষ্য কৰি লয়। তেওঁ দাবী কৰে যে ‘কংগ্ৰেছে কেতিয়াও ধৰ্মৰ নামত ভোট ভিক্ষা কৰা নাই। কংগ্ৰেছে কেতিয়াও মন্দিৰ আৰু মছজিদৰ নামত ঘৃণা বিয়পাই দিয়া নাই।’
এমএনৰেগা আঁচনি আৰু মহাত্মা গান্ধীৰ নাম আঁতৰাই মোডী চৰকাৰৰ নতুন গ্ৰাম্য নিয়োগ আঁচনি, ভিবিজিৰামজী আইনৰ বিৰুদ্ধে কংগ্ৰেছে অহা ৫ জানুৱাৰীৰ পৰা দেশজোৰা আন্দোলন আৰম্ভ কৰিবলৈ ওলাইছে। শনিবাৰে দলৰ নীতি নিৰ্ধাৰক উচ্চতম পৰ্যায়ৰ কৰ্মী সমিতিৰ বৈঠকত ‘মনৰেগা বচাওক’ শীৰ্ষক আন্দোলন আৰম্ভ কৰাৰ সিদ্ধান্ত গ্ৰহণ কৰা হয়।
দেওবাৰে এই প্ৰসংগ উল্লেখ কৰি খাৰ্গেই কয়, “যিসকলৰ পূৰ্বপুৰুষে দেশৰ স্বাধীনতা আন্দোলনত কোনো ভূমিকা গ্ৰহণ কৰা নাছিল, তেওঁলোকে আজি সাধাৰণ জনতাৰ ক্ষমতা আৰু মৌলিক অধিকাৰ কাঢ়ি নিয়াৰ কাম কৰি আছে। মনত ৰাখিব লাগিব যে আৰ এছ এছ আৰু বিজেপিৰ নেতাসকলে দেশৰ সংবিধান, ত্ৰিৰংগা, অশোক চক্ৰ আৰু বন্দে মাতৰমক মানি লোৱা নাছিল।”
দেশৰ স্বাধীনতা আন্দোলনত মহাত্মা গান্ধীৰ দাণ্ডী যাত্ৰা আৰু ভাৰত ত্যাগ আন্দোলনত যি উৎসাহ আৰু মনোভাৱেৰে কংগ্ৰেছৰ নেতা-কৰ্মীসকলে অংশগ্ৰহণ কৰিছিল, ঠিক তেনে উৎসাহেৰে কংগ্ৰেছৰ নেতা-কৰ্মীসকলক MGNREGA আৰু গান্ধীৰ ঐতিহ্য ৰক্ষাৰ বাবে ৰাজপথলৈ ওলাই আহিবলৈ তেওঁ আহ্বান জনায়।
