বাংলাদেশত শেহতীয়াকৈ দুজন হিন্দু ধৰ্মৰ ব্যক্তি গণ প্ৰহাৰত প্ৰাণ হোৰুৱাৰ পাছত ভাৰতৰ বৈদেশিক পৰিক্ৰমা মন্ত্ৰালয়ে সংখ্যালঘুসকলৰ সুৰক্ষাক লৈ গভীৰ উদ্বেগ প্ৰকাশ কৰিছিল। ভাৰতৰ এই অভিযোগ নাকচ কৰি বাংলাদেশ চৰকাৰে ইয়াক ভিত্তিহীন আখ্যা দিয়ে। ২৮ ডিচেম্বৰ, দেওবাৰে বাংলাদেশৰ বৈদেশিক মন্ত্ৰালয়ে জাৰি কৰা এক বিবৃতিত এই স্থিতি স্পষ্ট কৰা হয়।
বাংলাদেশে অভিযোগ কৰে যে কিছুমান বিচ্ছিন্ন অপৰাধমূলক ঘটনাক ইচ্ছাকৃতভাৱে হিন্দুসকলৰ ওপৰত পদ্ধতিগত নিৰ্যাতন বুলি চিত্ৰিত কৰা হৈছে, যাৰ জৰিয়তে বাংলাদেশ চৰকাৰ, ইয়াৰ কূটনৈতিক অভিযান আৰু প্ৰতিষ্ঠানসমূহৰ বিৰুদ্ধে সাধাৰণ ভাৰতীয়ক উচটনি দিয়াৰ চেষ্টা কৰা হৈছে। মন্ত্ৰালয়ে কয় যে বাংলাদেশৰ দীৰ্ঘদিনীয়া সাম্প্ৰদায়িক সম্প্ৰীতিৰ পৰম্পৰাক ভুলকৈ উপস্থাপন কৰা যিকোনো ভুৱা বা অতিৰঞ্জিত বক্তব্য চৰকাৰে সম্পূৰ্ণৰূপে নাকচ কৰে।
ৰাজবাৰীত অমৃত মণ্ডলৰ মৃত্যুক লৈ ভাৰতীয় পক্ষই দিয়া বক্তব্যৰ প্ৰতিক্ৰিয়াত ঢাকাই কয় যে, এই ঘটনাটো ধন দাবীৰ সময়ত সংঘটিত হোৱা এক অপৰাধমূলক কাণ্ডহে আৰু ইয়াক সংখ্যালঘু বৈষম্যৰ দৃষ্টিকোণৰ পৰা চোৱাটো বিভ্ৰান্তিকৰ। বাংলাদেশে ভাৰতক আন্তৰিক সম্পৰ্ক আৰু পাৰস্পৰিক আস্থা অক্ষুণ্ণ ৰাখিবলৈ আহ্বান জনায়।
ইফালে, ঢাকা মহানগৰ আৰক্ষীয়ে জনোৱা মতে, ছাত্ৰ নেতা ওছমান হাদীৰ হত্যাকাণ্ডৰ দুজন মূল সন্দেহযুক্ত ব্যক্তি ময়মনসিংহৰ হালুৱাঘাট সীমান্তৰে মেঘালয়লৈ পলায়ন কৰিছে। এই সন্দৰ্ভত বাংলাদেশে অভিযুক্তসকলক গ্ৰেপ্তাৰ আৰু প্ৰত্যাৰ্পণৰ বাবে ভাৰতীয় কৰ্তৃপক্ষৰ সৈতে যোগাযোগ অব্যাহত ৰাখিছে। অৱশ্যে ভাৰতীয় পক্ষৰ পৰা এই বিষয়ত এতিয়ালৈকে কোনো আনুষ্ঠানিক সহাৰি পোৱা নাই বুলি সদৰী কৰিছ।
