পশ্চিম কাৰ্বি আংলং জিলাৰ খেৰণিত শেহতীয়াকৈ সংঘটিত উত্তপ্ত পৰিস্থিতিৰ বুজ ল’বলৈ মঙলবাৰে ৰাজ্যৰ কেইবাটাও বিৰোধী ৰাজনৈতিক দলৰ এটা সজাতি দল ঘটনাস্থলীত উপস্থিত হয়। কংগ্ৰেছ, ৰাইজৰ দল, চি পি আই (এম), এ জে পি আৰু অন্যান্য বিৰোধী দলৰ প্ৰতিনিধিক লৈ গঠিত এই দলটোৱে স্থানীয় লোকৰ সৈতে মত-বিনিময় কৰে। ঘটনাটোক অত্যন্ত দুখজনক বুলি আখ্যা দি সজাতি দলটোৱে ইয়াৰ এক স্থায়ী সমাধানৰ দাবী উত্থাপন কৰে।
এই সজাতি দলটোক নেতৃত্ব দিয়ে বিৰোধী দলপতি দেৱব্ৰত শইকীয়া, ৰাইজৰ দলৰ সভাপতি তথা বিধায়ক অখিল গগৈ, চি পি আই (এম)ৰ বিধায়ক মনোৰঞ্জন তালুকদাৰ, এ জে পিৰ জগদীশ ভূঞা, কংগ্ৰেছ বিধায়ক ভাস্কৰ বৰুৱা আৰু এ পি এইচ চি (APHLC)ৰ জন ইংতি কাথাৰে।
ঘটনাস্থলী পৰিদৰ্শনৰ পিছত দেৱব্ৰত শইকীয়াই কয় যে অঞ্চলটোত দীৰ্ঘদিনীয়া ক্ষোভে গা কৰি উঠিছে আৰু চৰকাৰ তথা প্ৰশাসন ভূমিপুত্ৰসকলৰ স্বাৰ্থ ৰক্ষাত সম্পূৰ্ণৰূপে ব্যৰ্থ হৈছে। তেওঁ লোকপ্ৰিয় গোপীনাথ বৰদলৈয়ে কাৰ্বিসকলক প্ৰদান কৰা সাংবিধানিক অধিকাৰ সুৰক্ষিত থাকিব লাগিব বুলিও উল্লেখ কৰে।
আনহাতে, অখিল গগৈয়ে কয় যে আৰক্ষীৰ কঠোৰ ব্যৱস্থা আৰু কাৰ্বি পৰিষদৰ (KAAC) ভূমিকাই এই ঘটনাৰ অন্যতম কাৰণ। তেওঁ সংঘৰ্ষ পৰিহাৰ কৰি গণতান্ত্ৰিক পদ্ধতিৰে সমস্যা সমাধানৰ আহ্বান জনায়।
বিৰোধীৰ সজাতি দলটোৱে চৰকাৰৰ ব্যৰ্থতাৰ বাবেই প্ৰাণহানিৰ দৰে ঘটনা ঘটিছে বুলি গুৰুতৰ অভিযোগ উত্থাপন কৰে। ইয়াৰ লগতে তেওঁলোকে ক্ষতিগ্ৰস্ত লোকসকলক উপযুক্ত ক্ষতিপূৰণ প্ৰদান, পুনৰ সংস্থাপন আৰু ষষ্ঠ অনুসূচীৰ অধীনত সাংবিধানিক সুৰক্ষা নিশ্চিত কৰাৰ দাবী জনায়। এই দাবীসমূহ উত্থাপন কৰিবলৈ বুধবাৰে দলটোৱে ৰাজ্যপালক সাক্ষাৎ কৰিব বুলি সংবাদ মাধ্যমক জানিবলৈ দিয়ে।
