অসমক দেশৰ ভিতৰতে শ্ৰেষ্ঠ ৰাজ্য হিচাপে গঢ়ি তোলাৰ লক্ষ্যৰে ৰাজ্য চৰকাৰে ‘A for Assam’ লক্ষ্য স্থিৰ কৰিছে যদিও ভাৰতীয় ৰিজাৰ্ভ বেংকৰ (RBI) শেহতীয়া ‘হেণ্ডবুক অৱ ষ্টেটিষ্টিকছ অন ইণ্ডিয়ান ষ্টেটছ ২০২৪-২৫’ত প্ৰকাশ পোৱা তথ্যই ৰাজ্যখনৰ বিকাশৰ ক্ষেত্ৰত এক প্ৰত্যাহ্বানমূলক ছবিহে দাঙি ধৰিছে। এই প্ৰতিবেদন অনুসৰি, বহুমাত্রিক দৰিদ্ৰতাৰ সূচাংকত অসম এতিয়াও দেশৰ ৩৭ খন ৰাজ্য আৰু কেন্দ্ৰীয় শাসিত অঞ্চলৰ ভিতৰত চতুৰ্থ দৰিদ্ৰতম ৰাজ্য হিচাপে চিহ্নিত হৈছে, য’ত ৰাজ্যখনৰ ১৯.৩৫ শতাংশ লোক এতিয়াও দৰিদ্ৰতাৰ কবলত। স্বাস্থ্যখণ্ডৰ তথ্যইও এক উদ্বেগজনক পৰিস্থিতি প্ৰতিফলিত কৰিছে, য’ত অসমৰ মানুহৰ গড় আয়ুস ৭০.৩ বছৰৰ ৰাষ্ট্ৰীয় গড়ৰ বিপৰীতে মাত্ৰ ৬৮.৬ বছৰ। বিশেষকৈ জন্মৰ সময়ত প্রসূতি মাতৃৰ মৃত্যুৰ হাৰ আৰু শিশু মৃত্যুৰ হাৰৰ ক্ষেত্ৰত অসমৰ স্থান দেশৰ ভিতৰতে ক্ৰমে পঞ্চম আৰু তৃতীয় স্থানত আছে, যিটোৱে জনস্বাস্থ্যৰ শোচনীয় ৰূপটোকে প্ৰকট কৰিছে।
অৰ্থনৈতিক দিশত চাবলৈ গ’লে, ২০২৪-২৫ বৰ্ষত অসমৰ এজন মানুহৰ গড় জনমূৰি আয় চলিত মূল্যত ১,৫৯,১৮৫ টকা আৰু স্থিৰ মূল্যত ৮৫,৯৮৮ টকা। এই পৰিসংখ্যাই দেশৰ ৩৬ খন ৰাজ্য আৰু কেন্দ্ৰীয় শাসিত অঞ্চলৰ ভিতৰত অসমক তলৰ ফালৰ পৰা সপ্তম স্থানত ৰাখিছে। ইয়াৰ সমান্তৰালভাৱে ৰাজ্যখনত মূল্যবৃদ্ধিৰ হাৰো যথেষ্ট ঊর্ধ্বগামী। ৰাষ্ট্ৰীয় গড় মুদ্রাস্ফীতিৰ তুলনাত অসমৰ স্থান দেশৰ ভিতৰতে অষ্টম আৰু বিশেষকৈ ইন্ধন তথা বিদ্যুতৰ মূল্যবৃদ্ধিৰ ক্ষেত্ৰত অসম ষষ্ঠ স্থানত আছে। বহনক্ষম উন্নয়নৰ লক্ষ্য (SDG) লাভৰ ক্ষেত্ৰতো অসমৰ প্ৰদৰ্শন সন্তোষজনক নহয়, য’ত ৰাজ্যখনে ১০০ নম্বৰৰ ভিতৰত মাত্ৰ ৬৫ নম্বৰ লাভ কৰি ২৯ নম্বৰ স্থানত থমকি ৰৈছে।
কৃষি আৰু শিল্প খণ্ডতো ৰাজ্যখনৰ অৱস্থিতি উন্নত ৰাজ্যসমূহৰ তুলনাত বহু পিছত থকা পৰিলক্ষিত হৈছে। পঞ্জাৱৰ দৰে ৰাজ্যৰ তুলনাত অসমৰ জলসিঞ্চিত ভূমিৰ পৰিমাণ অতি নগণ্য। ধান, ঘেঁহু আৰু দাইল উৎপাদনৰ ক্ষেত্ৰত অসমৰ স্থান দেশৰ ভিতৰত ক্ৰমে ১৩, ১৭ আৰু ১৫ নম্বৰত আছে। হেক্টৰে প্ৰতি উৎপাদনৰ পৰিমাণো ৰাষ্ট্ৰীয় গড়তকৈ বহু কম।
ঔদ্যোগিক বিকাশৰ দিশটো লক্ষ্য কৰিলে দেখা যায় যে তামিলনাডু বা গুজৰাটৰ দৰে ৰাজ্যত য’ত ৩০ হাজাৰৰো অধিক কাৰখানা আছে, তাত অসমত মাত্ৰ ৬,০৪৯ টা কাৰখানাছে কাৰ্যক্ষম হৈ আছে। বিদ্যুৎ বিতৰণৰ ক্ষেত্ৰত অসমৰ অৱস্থা অধিক পুতৌজনক, য’ত এজন লোকে গড়ে বছৰি লাভ কৰা বিদ্যুতৰ পৰিমাণ ৰাষ্ট্ৰীয় গড় ১২০৮.২ কিলোৱাট/ঘণ্টাৰ বিপৰীতে মাত্ৰ ৩৫৬.২ কিলোৱাট/ঘণ্টা।
যোগাযোগ আৰু আন্তঃগাঁথনিৰ ক্ষেত্ৰত টেলিফোন গ্ৰাহকৰ ঘনত্বৰ দিশত অসম দেশৰ তলৰ ফালৰ পৰা চতুৰ্থখন ৰাজ্য হিচাপে পৰিগণিত হৈছে। ইফালে ৰাজ্যখনৰ বিত্তীয় বোজাও ক্ৰমাৎ বৃদ্ধি পাইছে। ২০২৫ চনৰ ৩১ মাৰ্চ পৰ্যন্ত অসমৰ মুঠ ঋণৰ পৰিমাণ ১,৭৭,৯৮৩.২ কোটি টকালৈ বৃদ্ধি পোৱাৰ সম্ভাৱনা আছে, যাৰ ফলত ধাৰ লোৱা ৰাজ্যৰ তালিকাত অসমৰ স্থান ১৫ নম্বৰত আছে। ৰিজাৰ্ভ বেংকৰ এই বিতং তথ্যসমূহে স্পষ্ট কৰি দিছে যে অসমক দেশৰ এক নম্বৰ ৰাজ্য হিচাপে প্ৰতিষ্ঠা কৰিবলৈ হ’লে স্বাস্থ্য, শিক্ষা, বিদ্যুৎ আৰু ঔদ্যোগিক উৎপাদনৰ দৰে মৌলিক ক্ষেত্ৰসমূহত এতিয়াও এক দীঘলীয়া পথ অতিক্ৰম কৰিবলৈ বাকী আছে।
